![វិនិយោគិនបរទេស](https://cdn.cambonomist.com/media/images/China_WMl1lvc.2e16d0ba.fill-960x540.jpg)
នៅក្នុងកិច្ចប្រជុំរយៈពេល៤ថ្ងៃរបស់បក្សកុម្មុយនិស្តចិន ដែលត្រូវបានធ្វើឡើងក្រោមការឃ្លាំមើលយ៉ាងដិតដល់ពីប្រទេសផ្សេងៗ រដ្ឋាភិបាលចិន បានដាក់ចេញ និងអនុម័តលើគោលនយោបាយមួយចំនួន សំដៅលើកទឹកចិត្តដល់ការវិនិយោគបរទេស ដែលបានធ្លាក់ចុះយ៉ាងខ្លាំងនៅក្នុងប៉ុន្មានឆ្នាំថ្មីៗនេះ។ នៅក្នុងសេចក្តីថ្លែងការណ៍របស់ខ្លួន រដ្ឋាភិបាលចិន បានបន្តប្តេជ្ញាចិត្តក្នុងការរក្សាគោលនយោបាយមូលដ្ឋាននៃការបើកចំហទៅកាន់ពិភពខាងក្រៅ និងបន្តជំរុញការធ្វើកំណែទម្រង់តាមរយៈការបើកចំហរសេដ្ឋកិច្ច។
ជាមួយគ្នានេះ រដ្ឋាភិបាលចិន ប្តេជ្ញានឹងប្រើប្រាស់សក្តានុពលនៃទីផ្សារដ៏ធំសម្បើមរបស់ខ្លួន ដើម្បីបង្កើនសមត្ថភាពបើកចំហសេដ្ឋកិច្ច និងការបន្តកិច្ចសហប្រតិបត្តិការល្អជាមួយប្រទេសផ្សេងៗ។ បន្ថែមលើនេះ ចិនក៏បង្ហាញពីឆន្ទៈក្នុងការឆ្លើយតបទៅនឹងបញ្ហា ដែលជាគោលដៅនៃការរិះគន់របស់សហរដ្ឋអាម៉េរិក និងអឺរ៉ុប តាមរយៈការខិតខំពង្រីកតម្រូវការក្នុងស្រុក និង ធ្វើឱ្យស៊ីជម្រៅនូវកំណែទម្រង់រចនាសម្ព័ន្ធផ្នែកផ្គត់ផ្គង់ ដើម្បីកាត់បន្ថយសមត្ថភាពដែលលើសពីតម្រូវការ។
បើយោងតាមសារព័ត៌មាន South China Morning Post បន្ទាប់ពីកិច្ចប្រជុំនេះគេរំពឹងថា នឹងមានគណៈប្រតិភូធុរកិច្ចអាម៉េរិកមួយក្រុមនឹងមកទស្សនកិច្ចនៅទីក្រុងប៉េកាំង ដោយសមាជិកនៃប្រតិភូនេះរួមមានទាំងនាយកប្រតិបត្តិក្រុមហ៊ុន Goldman Sachs, ក្រុមហ៊ុន Qualcomm, ក្រុមហ៊ុន Nike និង Starbucks ជាដើម។
លោក ថេស៊ូរ៉ូ ហូមម៉ា (Tetsuro Homma )ប្រធានសភាពាណិជ្ជកម្ម និងឧស្សាហកម្មជប៉ុនក្នុងប្រទេសចិន បាននិយាយថា ជាងពាក់កណ្តាលនៃក្រុមហ៊ុនបានចាត់ទុកប្រទេសចិន ជាទីផ្សារដ៏សំខាន់មួយរបស់ពួកគេ ហើយសារៈសំខាន់នៃទីផ្សារចិន ក៏កំពុងកើនកើនឡើងផងដែរ៕
ដោយៈ សរ សុជាតិ