ធនាគារកណ្តាលចិន នៅថ្ងៃអង្គារ ទី១៣ ខែមិថុនា បានទម្លាក់អត្រាការប្រាក់កម្ចីរយៈពេលខ្លីជាលើកដំបូងក្នុងរយៈពេល ១០ ខែកន្លងទៅនេះ។ នេះជាវិធានការមួយសំដៅស្តារទំនុកចិត្តទីផ្សារ និងជំរុញសេដ្ឋកិច្ចឱ្យស្ទុះងើបឡើងវិញ នៅក្រោយសម័យជំងឺរាតត្បាតកូវីដ១៩។
មុននេះមិនយូរប៉ុន្មាន ទិន្នន័យសេដ្ឋកិច្ចបានបង្ហាញថា សេចក្ដីត្រូវការបានធ្លាក់ចុះ ហើយអារម្មណ៍វិនិយោគិនប្រែជាចុះខ្សោយ។ ស្ថានភាពដូច្នេះបានធ្វើឱ្យគេរំពឹងទុកថា អាជ្ញាធររបស់មហាអំណាចសេដ្ឋកិច្ចទី២ក្នុងពិភពលោកមួយនេះ នឹងបន្ធូរបន្ថយវិធានការរូបិយវត្ថុ ដើម្បីរក្សាចីរភាពកំណើនសេដ្ឋកិច្ច។
លោក ខិន ជើង (Ken Cheung) ប្រធានផ្នែកយុទ្ធសាស្ត្រទីផ្សារប្ដូរប្រាក់អាស៊ីនៅធនាគារ មីហ្ស៊ុហូ (Mizuho) បាននិយាយថា ធនាគារប្រជាជនចិនប្រហែលជាចង់កាត់បន្ថយផលប៉ះពាល់ពីការបន្ធូរបន្ថយវិធានការរូបិយវត្ថុនាពេលអនាគត មកលើប្រាក់យ័នរបស់ចិន នៅមុនពេលមានមានកិច្ចប្រជុំគោលនយោបាយនៅធនាគារកណ្តាលសហរដ្ឋអាមេរិកក្នុងសប្តាហ៍នេះ។
អត្ថបទគួរអាន
ប្រៀបធៀបនឹងសហរដ្ឋអាមេរិក ការកាត់បន្ថយអត្រាការប្រាក់នៅក្នុងប្រទេសចិនអាចធ្វើឱ្យប្រាក់ចំណេញពីការប្រាក់កម្ចីនៅប្រទេសចិនកាន់តែទាបជាងនៅសហរដ្ឋអាមេរិក បើទោះបីជាធនាគារកណ្ដាលសហរដ្ឋអាមេរិកផ្អាកការដំឡើងអត្រាការប្រាក់ក្នុងខែនេះក៏ដោយ។
ជាធម្មតា ការផ្លាស់ប្តូរអត្រាការប្រាក់កម្ចីរយៈពេល ៧ ថ្ងៃ នៅប្រទេសចិន តែងបង្ហាញថា ការផ្លាស់ប្តូរអត្រាការប្រាក់កម្ចីរយៈពេលវែងទំនងជានឹងកើតមានដែរ។ នៅថ្ងៃព្រហស្បតិ៍សប្ដាហ៍នេះ ចិនគ្រោងផ្តល់ប្រាក់កម្ចីរយៈពេលមធ្យមប្រហែល ២៨ ប៊ីលានដុល្លារអាមេរិក។
គួរកត់សម្គាល់ថា បន្ទាប់ពីការសម្រេចចិត្តបន្ទាបអត្រាការប្រាក់ដោយធនាគារកណ្ដាលចិន តម្លៃប្រាក់យ័នបានចុះទាបបំផុត បើគិតពីចុងខែវិច្ឆិកា ឆ្នាំ ២០២២ មក ដោយ ១ ដុល្លារអាមេរិក ស្មើនឹងជាង ៧,១៦ យ័ន៕
ដោយ៖ ឯម មាឃ
