ក្នុងអាជីពការងារដោះមីន កណ្ដុរ ម៉ាហ្កាវ៉ា បានហិតរកឃើញគ្រាប់មីនចំនួន ៣៩ គ្រាប់ និងគ្រាប់មិនទាន់ផ្ទុះចំនួន ២៨ គ្រាប់ ។
អង្គការសប្បុរសធម៌បសុព្យាបាលរបស់ចក្រភពអង់គ្លេស ឈ្មោះ PDSA បានផ្ដល់មេដាយមាសដល់កណ្ដុរ ម៉ាហ្កាវ៉ា ជាការតបស្នងចំពោះ“ការលះបង់ជីវិតដើម្បីបំពេញកាតព្វកិច្ចក្នុងការរុករក និងការបោសសំអាតគ្រាប់មីនដែលអាចបង្កគ្រោះថ្នាក់ដល់ជីវិត នៅក្នុងប្រទេសកម្ពុជា” ។
នៅក្នុងប្រទេសកម្ពុជា ដែលកាលពីច្រើនទសវត្សរ៍មុន ត្រូវបានញាំញីដោយសង្គ្រាមនិងជម្លោះរ៉ាំរ៉ៃ គេប៉ាន់ស្មានថា មានគ្រាប់មីនដល់ទៅ ៦លានគ្រាប់ ។
អត្ថបទទាក់ទង
ក្នុងចំណោមសត្វចំនួន ៣០ ដែលត្រូវទទួលមេដាយមាសរបស់ PDSA កណ្ដុរ ម៉ាហ្កាវ៉ា គឺជាអ្នកទទួលរង្វាន់ដែលឈរលេខរៀងទីមួយ នៅលើគេបង្អស់ ។
កណ្ដុរ ម៉ាហ្កាវ៉ា មានអាយុ ៧ឆ្នាំ និងត្រូវបានបង្វឹកដោយអង្គការសប្បុរសធម៌ដែលបានចុះបញ្ជីនៅប្រទេសប៊ែលហ្សិក ឈ្មោះ Apopo និងមានមូលដ្ឋាននៅប្រទេសតង់ហ្សានី ។ អង្គការនេះបានចិញ្ចឹមសត្វកណ្ដុរ ដែលគេឲ្យឈ្មោះថា HeroRAT (វីរកណ្ដុរ) ដើម្បីហិតរកគ្រាប់មីននិងជំងឺរបេង ចាប់តាំងពីទសវត្សរ៍ឆ្នាំ១៩៩០មកម្ល៉េះ ។ បន្ទាប់ពីទទួលការបង្វឹកបានមួយឆ្នាំ សត្វកណ្ដុរទាំងនេះនឹងទទួលបានវិញ្ញាបនបត្របញ្ជាក់សមត្ថភាពហិតរកគ្រាប់មីន ។
លោក Christophe Cox នាយកអង្គការ Apopo បានប្រាប់ទីភ្នាក់ងារសារព័ត៌មានថា "ការទទួលបានមេដាយនេះ ពិតជាកិត្តិយសសម្រាប់ពួកយើង។ ហើយវាក៏ជាកិត្តិយសធំធេងផងដែរ សម្រាប់ប្រជាជននៅកម្ពុជា និងប្រជាជនទាំងអស់នៅជុំវិញពិភពលោក ដែលកំពុងរងគ្រោះដោយសារគ្រាប់មីន។"
យោងតាមអង្គការ Apopo កណ្ដុរ ម៉ាហ្កាវ៉ា បានកើតនិងធំធាត់នៅក្នុងប្រទេសតង់ហ្សានី។ វាមានទម្ងន់ ១,២គីឡូក្រាម និងមានប្រវែងខ្លួន ៧០សង់ទីម៉ែត្រ ។ ទោះបីវាធំជាងកណ្ដុរពូជធម្មតាក្ដី ម៉ាហ្កាវ៉ា នៅតែមានទំហំខ្លួនតូចនិងទម្ងន់ស្រាលល្មម ដែលអាចឲ្យវាដើរលើគ្រាប់មីនបាន ដោយមិនធ្វើឲ្យគ្រាប់មីននោះផ្ទុះឡើយ ។
កណ្ដុរ ម៉ាហ្កាវ៉ា មានសមត្ថភាបស្វែងរកគ្រាប់មីននៅលើផ្ទៃដីប៉ុនទីលានតារាងវាយកូនបាល់ ដោយប្រើពេលតែ ២០នាទីប៉ុណ្ណោះ ដែលអង្គការ Apopo និយាយថា បើមនុស្សវិញ ត្រូវចំណាយពេលធ្វើការងារនេះ ជាមួយនឹងឧបករណ៍រាវរកគ្រាប់មីន ពី ១ថ្ងៃ ទៅ ៤ថ្ងៃឯណោះ ៕
