សំណើគ្រោងបង្កើតអង្គភាពនេះកើតឡើង នៅពេលដែលទីក្រុងប៉េកាំងប្រញាប់ប្រញាល់ក្នុងការកសាងខ្សែចង្វាក់ផ្គត់ផ្គង់ក្នុងស្រុក សម្រាប់បន្សាំ ឬទប់ទល់ទៅនឹងការដាក់ទណ្ឌកម្មរបស់សហរដ្ឋអាមេរិក។ ទោះជាយ៉ាងណាក៏ដោយ រដ្ឋាភិបាលប្រទេសនានាទំនងជាមានការប្រុងប្រយ័ត្នខ្ពស់ចំពោះកិច្ចខិតខំប្រឹងប្រែងរបស់ចិនមួយនេះ ដោយសារការភ័យខ្លាចថា បច្ចេកវិទ្យាដ៏សំខាន់នេះនឹងត្រូវបានផ្ទេរពីប្រទេសរបស់ពួកគេទៅកាន់ប្រទេសចិន។
អង្គភាពនេះ មានឈ្មោះថា "គណៈកម្មាធិការការងារគ្រឿងបន្ទះអេឡិចត្រូនិកឆ្លងដែន" ដែលនឹងត្រូវបានដាក់ឱ្យដំណើរការនៅឆមាសទី ១ នៃឆ្នាំនេះ។ អង្គភាពនេះ ក៏នឹងត្រូវបានត្រួតពិនិត្យដោយក្រសួងពាណិជ្ជកម្ម សហការជាមួយក្រសួងឧស្សាហកម្ម និងបច្ចេកវិទ្យាព័ត៌មានដែលមានយុត្តាធិការលើការវិនិយោគ និងពាណិជ្ជកម្មក្នុងស្រុក និងអន្តរជាតិ។
យោងតាមប្រភពព័ត៌មាន តួនាទីរបស់គណៈកម្មាធិការនេះ នឹងពង្រឹងកិច្ចសហប្រតិបត្តិការរវាងឧស្សាហកម្មផលិតបន្ទះអេឡិចត្រូនិក ឬបន្ទះឈីបរបស់ចិន និងបរទេស។ គួរជម្រាបថា ប្រធានាធិបតីចិន លោក ស៊ី ជីនពីង បានកំណត់គោលដៅក្នុងការកសាងខ្សែចង្វាក់ផ្គត់ផ្គង់បន្ទះឈីបចិនឯករាជ្យមួយ ហើយអង្គភាពនេះហាក់ដូចជាត្រូវបានបង្កើតឡើង ជាមធ្យោបាយមួយ ដើម្បីទទួលបានបច្ចេកវិទ្យា ផលិតបន្ទះឈីបកម្រិតខ្ពស់ពីសហរដ្ឋអាមេរិក ជប៉ុន និងអឺរ៉ុប ដែលវាត្រូវបានចាត់ទុកថា ជាកត្តាជួយជំរុញបន្ថែមដល់គោលដៅរបស់ទីក្រុងប៉េកាំងផងដែរ។
អត្ថបទគួរអាន
ទន្ទឹមនេះ គណៈកម្មាធិការនេះ នឹងទាក់ទងាញក្រុមហ៊ុនបរទេសឱ្យបង្កើតមូលដ្ឋានអភិវឌ្ឍន៍ ឬផលិតកម្ម តាមរយៈការផ្ដល់មូលនិធិ និងការធ្វើការជាមួយរដ្ឋាភិបាលក្នុងតំបន់ ហើយវាក៏មានគោលបំណងក្នុងការផ្តល់ការគាំទ្រផ្នែកហិរញ្ញវត្ថុដល់ក្រុមហ៊ុនចិន ដែលស្វែងរកការទិញក្រុមហ៊ុនដែលទាក់ទងនឹងការផលិតបន្ទះឈីបនៅបរទេសផងដែរ។
យ៉ាងណាក៏ដោយចុះ ជុំវិញការបង្កើតអង្គភាពនេះ អ្នកតំណាងក្រុមហ៊ុនបរទេសមួយរូបបានឱ្យដឹងថា បើទោះបីជាពួកគេនឹងមានបំណងពង្រីកអាជីវកម្មនៅក្នុងប្រទេសចិនក្នុងកម្រិតណាមួយក៏ដោយ ក៏វាមិនផ្ទុយនឹងបទប្បញ្ញត្តិនៅក្នុងសហរដ្ឋអាមេរិក និងប្រទេសដទៃទៀតនោះទេ ប៉ុន្ដែ បញ្ហានៅត្រង់ថា ស្ថានភាពតានតឹងកើនឡើង នោះក្រុមហ៊ុននឹងត្រូវក្លាយជាផ្ទាំងស៊ើបសម្រាប់ការប្រជែងឥទ្ធិពលរបស់រដ្ឋាភិបាល ពោលគឺអាចត្រូវគោរពការទាមទារពីរដ្ឋចិន និងត្រូវរក្សាការសម្ងាត់នៃបច្ចេកវិទ្យាជាដើម៕
អត្ថបទ ស៊ើង និមល់
None
