ទិន្នន័យពីក្រសួងវប្បធម៌ និងទេសចរណ៍របស់ចិន បានឲ្យដឹងថា នៅអំឡុងថ្ងៃឈប់សម្រាករយៈពេល៣ថ្ងៃ នៃបុណ្យឈីងមិញ ឬហៅថាសែនឆេងម៉េងនៅក្នុងប្រទេសចិន មានការធ្វើដំណើរដល់ទៅ ជាង១០០លានការធ្វើដំណើរ ដោយមានការកើនឡើងដល់ទៅ ជាង ១៤០% ធៀបនឹងឆ្នាំមុន ខណៈដែលចំណូលពីវិស័យទេសចរណ៍ក៏មានការកើនឡើងប្រមាណ ២៣០%ផងដែរ ជាមួយទឹកប្រាក់ប្រមាណជាង ៤ពាន់លានដុល្លារអាមេរិក។ ការកើនឡើងដ៏គំហុកនៃការធ្វើដំណើរកម្សាន្ដ និងប្រាក់ចំណូល នៅក្នុងវិស័យទេសចរណ៍នៅអំឡុងថ្ងៃឈប់សម្រាកបុណ្យឆេងម៉េងយ៉ាងដូច្នេះ ក៏ដោយសារតែ កាលពីថ្ងៃបុណ្យឆេងម៉េងឆ្នាំមុន ប្រទេសចិនមិនមានការធ្វើដំណើរអ្វីនោះទេ ដ្បិតថាកាលនោះ មេរោគកូវីដ-១៩ បានរីករាលដាលខ្លាំងនៅក្នុងប្រទេសចិន។
របាយការណ៍បានឲ្យដឹងទៀតថា ប្រព័ន្ធដឹកជញ្ជូនទាំងមូលរបស់ចិន បានទទួលអ្នកដំណើរ ១៤៥លាននាក់ នៅអំឡុងពេលថ្ងៃឈប់សម្រាក៣ថ្ងៃ នៃបុណ្យឆេងម៉េងនេះ កើនឡើង១៤២% ធៀបនឹងឆ្នាំមុន ក្នុងនោះ មានអ្នកដំណើរតាមផ្លូវអាកាសជាង៤លាននាក់។
អត្ថបទទាក់ទង
សូមបញ្ជាក់ថា វិស័យទេសចរណ៍របស់ចិន បានរងផលប៉ះពាល់ខ្លាំងបំផុតធៀបនឹងវិស័យផ្សេងៗទៀត នៅអំឡុងពេលដែលបិទប្រទេស ដោយសារតែវិធានការការពារការឆ្លងរីករាលដាលកូវីដ-១៩ ដែលវាបានធ្វើឲ្យរំខានដល់គម្រោងធ្វើដំណើរកម្សាន្ដជាច្រើនផងដែរ ហើយជាលទ្ធផលនៅឆ្នាំ២០២០ ចំណូលពីវិស័យនេះ បានដាំក្បាលុះដល់ទៅ ជាង៦០%។
យ៉ាងណាក៏ដោយ សម្រាប់ឆ្នាំ២០២១នេះ វិស័យទេសចរណ៍របស់ចិន រំពឹងថានឹងងើបប្រសើរឡើងវិញច្រើន ដ្បិតថាមួយផ្នែកត្រូវបានរុញច្រានដោយកំណើនទេសចរណ៍ក្នុងស្រុកផង និងមួយផ្នែកទៀតចិនកំពុងរៀបចំឲ្យមានការធ្វើដំណើរចេញចូលប្រទេស តាមរយៈលិខិតឆ្លងដែនដែលមានការចាក់វ៉ាក់សាំងផងដែរ ហើយបច្ចុប្បន្នមានប្រទេសមួយចំនួនហើយ បានចាប់ផ្ដើមធ្វើការងារនេះ ដើម្បីអាចទទួលបានភ្ញៀវទេសចរចិនធ្វើដំណើរកម្សាន្ដនៅក្នុងប្រទេសរបស់ពួកគេ៕
None
