រដ្ឋបាលគយទូទៅ (GAC) បាននិយាយកាលពីថ្ងៃអង្គារថា ក្នុងរយៈពេល ៤ ខែដំបូងនៃឆ្នាំ ២០២៣ នេះ ការនាំចេញ និងនាំចូលសរុបរបស់ប្រទេសចិនបានកើនឡើងជិត ៦% បើធៀបនឹងរយៈពេលដូចគ្នាកាលពីឆ្នាំមុន ដោយឡើងដល់ទំហំទឹកប្រាក់ប្រហែលជិត ២ ទ្រីលានដុល្លារអាមេរិក។ ស្ថាប័នដដែលបានបន្តថា កំណើនបានកើនឡើង ១ ពិន្ទុភាគរយ លើសល្បឿនកំណើនដែលត្រូវបានកត់ត្រានៅក្នុងត្រីមាសទីមួយឆ្នាំនេះ។
រដ្ឋបាលគយទូទៅបានបន្ថែមថា ការនាំចេញ បានកើនឡើង ១០,៦% បើធៀបនឹងឆ្នាំមុន ខណៈដែលការនាំចូលបានកើនឡើងតែ ០,០២% ប៉ុណ្ណោះ ក្នុងរយៈពេល ៤ ខែដំបូងនៃឆ្នាំនេះ។
ទិន្នន័យខាងលើបានបង្ហាញលម្អិតថា ចាប់ពីខែមករាដល់ខែមេសា អត្រាកំណើនពាណិជ្ជកម្មរបស់ចិនជាមួយសមាគមប្រជាជាតិអាស៊ីអាគ្នេយ៍មានចំនួនជិត ១៤% និងជាមួយសហភាពអឺរ៉ុបមានចំនួនជាង ៤%។
ពាណិជ្ជកម្មរបស់ប្រទេសចិនជាមួយបណ្តាប្រទេសក្នុងក្របខណ្ឌគំនិតផ្ដួចផ្ដើម«ខ្សែក្រវាត់និងផ្លូវ»របស់ចិន បានកើនឡើង ១៦% បើធៀបនឹងឆ្នាំមុន ពោលគឺឡើងដល់ទំហំជាង ៦៦៥ ពាន់លានដុល្លារនៅក្នុងរយៈពេលដដែលនេះ។
អត្ថបទគួរអាន
ជាពិសេស ពាណិជ្ជកម្មរបស់ប្រទេសចិនជាមួយប្រទេសអាស៊ីកណ្តាលចំនួន ៥ គឺកាហ្សាក់ស្ថាន កៀហ្ស៊ីស៊ីស្ថាន តាជីគីស្ថាន តួកម៉េនីស្ថាន និងអ៊ូសបេគីស្ថាន ដែលជាទីផ្សារថ្មី បានកើនឡើង ៣៧,៤%។ កំណើននេះជួយប៉ះប៉ូវការបាត់បង់មួយចំណែកដែលបណ្ដាលមកពីតម្រូវការខ្សោយនៅក្នុងទីផ្សារប្រពៃណី។
សហគ្រាសឯកជនបានឃើញអត្រាកំណើនយ៉ាងឆាប់រហ័ស នៅពេលដែលការនាំចូលនិងការនាំចេញបានកើនឡើងជិត ១៦% ដោយឡើងដល់ទំហំជាង ១ ទ្រីលានដុល្លារក្នុងរយៈពេល ៤ ខែដំបូង ពោលគឺស្មើនឹងជាងពាក់កណ្តាលនៃចំនួនសរុបរបស់ប្រទេសចិន។
ពាក់ព័ន្ធនឹងប្រភេទទំនិញវិញ ការនាំចេញផលិតផលគ្រឿងម៉ាស៊ីននិងគ្រឿងអគ្គិសនីបានកើនឡើង ១០,៥% ឬស្មើនឹងជិត ៥៨% នៃការនាំចេញសរុប ហើយការនាំចេញរថយន្តបានកើនឡើងជាង ១២០% បើធៀបនឹងរយៈពេលដូចគ្នាកាលពីឆ្នាំមុន៕
