ទីផ្សារលក់លំនៅឋាននៅចិន ធ្លាក់ចុះដល់កម្រិតទាបបំផុត ក្នុងរយៈពេលជិត២ទស្សវត្សរ៍កន្លងមកនេះ

ការិយាល័យស្ថិតិជាតិចិន បានបង្ហាញថា ការលក់លំនៅឋានថ្មីតាមគំរូនៃការឃោសនាផ្សព្វផ្សាយលក់មុនសំណង់សង់រួចរាល់បានអនុញ្ញាតឱ្យអ្នកអភិវឌ្ឍន៍អចលនទ្រព្យនានា នៅក្នុងប្រទេសនេះ ទទួលបានកម្លាំងជំរុញល្បឿននៃការអភិវឌ្ឈ លឿនជាងមុន ដែលធ្វើឱ្យវាកាន់តែងាយស្រួលក្នុងការបន្តគម្រោងថ្មីៗ ប៉ុន្តែទោះបីជាយ៉ាងណាក៏ដោយ ក៏ស្ថិតិបង្ហាញថា ពលរដ្ឋចិន មិនសូវចាប់អារម្មណ៍នៅក្នុងស្ថានភាពនេះនោះទេ។

ការិយាល័យស្ថិតិជាតិរបស់រដ្ឋាភិបាលចិន បានអះអាងថា ការលក់លំនៅឋានមុនពេលដែលគម្រោងសាងសង់បញ្ចប់នៅរយៈពេល៧ខែដើមឆ្នាំ២០២៤ គឺសុ្រតចុះប្រហែល ៣០% ប៉ុន្តែការលក់គម្រោងដែលសាងសង់រួចកើនឡើង២០%។ តែយ៉ាងណាការលក់លំនៅឋានសាងសង់ថ្មីជារួមនៅចិន ក្នុងរយៈពេល៧ខែ នៅតែបន្តធា្លក់ចុះរហូតដល់ ២១% ដែលជាកម្រិតទាបបំផុតមិនធ្លាប់មានក្នុងរយៈពេលជិត២ទស្សវត្សរ៍កន្លងមកនេះ។

ការធ្លាក់ចុះបរិមាណលក់លំនៅឋាននេះ បានបណ្តាលឱ្យមានវិបត្តិសាច់ប្រាក់យ៉ាងធ្ងន់ធ្ងរក្នុងចំណោមអ្នកអភិវឌ្ឍន៍ ដែលមួយចំនួនបានបញ្ឈប់ការងារសាងសង់តាំងពីមុនឆ្នាំ២០២២ ដែលនាំឲ្យអ្នកទិញលំនៅឋានដែលបានបង់ប្រាក់ហើយផ្ទុះការតវ៉ា និងការធ្វើកូដកម្ម។

នៅពេលនេះរដ្ឋាភិបាលក្នុងតំបន់ បានបង្កើតវិធានការដោយផ្អែកលើគោលការណ៍អនុគ្រោះជាច្រើន រួមទាំងការផ្លាស់ប្តូរដើម្បីផ្តល់ឱ្យអ្នកអភិវឌ្ឍន៍ទទួលបានអនុគ្រោះពន្ធ និងបង្កើនកម្មវិធីឥណទានលើវិស័យនេះ។ កាលពីខែសីហា ទីក្រុងក្វាងចូវ បានប្រកាសពីផែនការអនុគ្រោះ ដែលនាំឲ្យមានការរំពឹងទុកថា ការលក់លំនៅឋាននឹងមានភាពប្រសើរឡើងនាពេលអនាគត តែអ្នកវិភាគខ្លះថា បញ្ហាវាមិនងាយស្រួលនោះទេ៕

ដោយៈ សរ សុជាតិ