ការចាត់វិធានយ៉ាងឆាប់រហ័សនេះ ក្នុងគោលបំណងជៀសវាងនូវវិធានការដ៏តឹងរ៉ឹង ឬការបិទខ្ទប់នានាដូចដែលបានធ្វើនៅទីក្រុងសៀងហៃ ដ្បិតថា ប្រសិនបើឈានដល់ដំណាក់កាលធ្ងន់ធ្ងរដូច្នេះ នោះវាអាចបំផ្លាញជំនឿចិត្តរបស់ប្រជាជន ទៅលើការដឹកនាំរបស់ប្រធានាធិបតីលោក ស៊ីន ជីនពីង ជុំវិញនឹងការអនុវត្តគោលនយោបាយគ្មានកូវីដ១៩ដ៏តឹងរ៉ឹងរបស់លោក ស្របពេលដែល ការបោះឆ្នោតសមាជបក្សកុម្មុយនិស្តចិនរៀងរាល់ ៥ ឆ្នាំម្តងក៏នឹងខិតចូលមកដល់ក្នុងពេលឆាប់ៗនេះផងដែរ។ នេះបើតាមការចុះផ្សាយសារព័ត៌មានជប៉ុន Nikkei។
ការបិទខ្ទប់នៅក្នុងទីក្រុងធំៗមួយចំនួននៃប្រទេសចិន អាចត្រូវបានចាត់ទុកថា កំពុងធ្វើឲ្យសេដ្ឋកិច្ចចិនក៏កំពុងជួបប្រទះនឹងដំណើរលូតលាស់យឺតផងដែរ នៅគ្រាដែលចិន កំពុងអនុវត្តគោលនយោបាយគ្មានកូវីដដ៏តឹងរ៉ឹង ប៉ុន្ដែ ករណីឆ្លងនៅតែបន្ដកើតមានកាន់តែច្រើន ហើយឥឡូវនេះរដ្ឋធានីប៉េកាំងក៏កំពុងប្រឈមកាន់តែខ្លាំងដែរ។
ការឆ្លងថ្មីនៃកូវីដ១៩ នៅក្នុងទីក្រុងប៉េកាំង បានហក់ឡើងក្នុងរយៈពេលប៉ុន្មានថ្ងៃចុងក្រោយនេះ ដោយមានការរាយការណ៍សរុបចំនួន ៧០ នាក់ នៅចន្លោះថ្ងៃទី២២ ដល់ថ្ងៃទី ២៥មេសា ខណៈដែលកាលពីមុន ករណីឆ្លងនៅក្នុងរដ្ឋធានីរបស់ចិនមួយនេះ មានតួលេខមិនដល់១០នាក់នោះទេក្នុងមួយថ្ងៃ។ អាជ្ញាធរកំពុងតម្រូវឱ្យប្រជាជន និង អ្នកធ្វើការនៅក្នុងស្រុក ឆាវយ៉ាង (Chaoyang) ធ្វើតេស្ត PCR ៣ ដង ក្នុងសប្តាហ៍បន្តបន្ទាប់គ្នា ខណៈដែលស្រុកមួយនេះ មានប្រជាជនរស់នៅសរុបជាង៣លាននាក់។
ស្របពេលជាមួយគ្នានេះផងដែរ ដោយសារការភ័យខ្លាចនៃការបិទខ្ទប់ដោយសារការរត្បាតកូវីដ១៩ ពលរដ្ឋរស់នៅនៅក្នុងទីក្រុងប៉េកាំងកំពុងផ្អើលឈូរឆរទៅកាន់ផ្សារទំនើប ដើម្បីទិញទំនិញស្ដុកទុករាប់ចាប់តាំងបន្លែស្រស់ រហូតដល់មីកញ្ចប់ជាដើម។
អត្ថបទគួរអាន
គួរកត់សម្គាល់ឃើញថា តម្រូវការធ្វើតេស្តដ៏តឹងតែងនៅក្នុងទីក្រុងប៉េកាំង កំពុងធ្វើឲ្យមានការបារម្ភថា អាជ្ញាធរនឹងចាត់វិធានការគ្រប់គ្រងដ៏តឹងរ៉ឹង។ អ្នករស់នៅ ក្នុងទីក្រុងប៉េកាំងបារម្ភថា ប្រសិនបើគេរកឃើញថា មានករណីឆ្លងកើនឡើងកាន់តែច្រើន នោះអាជ្ញាធរអាចនឹងចាត់វិធានការតឹងរ៉ឹង ដូចដែលកំពុងធ្វើនៅទីក្រុងសៀងហៃដែរ។
គួរជម្រាបថា រដ្ឋាភិបាលហាក់មានការតាំងចិត្តខ្ពស់ក្នុងការបន្តអនុវត្តគោលនយោបាយគ្មានកូវីដ១៩បច្ចុប្បន្នរបស់ខ្លួន ដោយលោក ស៊ី ជីនពីង បានអះអាងម្តងហើយម្តងទៀតថា ប្រទេសចិននឹងមិនបន្តរស់នៅជាមួយកូវីដ១៩ នោះឡើយ បើទោះបីជា បច្ចុប្បន្នមានប្រទេសជាច្រើន បានបើកទ្វារប្រទេសរស់នៅជាមួយកូវីដ១៩ក៏ដោយចុះ។ ប៉ុន្តែវិធានការប្រឆាំងមេរោគដ៏តានតឹងកាន់តែខ្លាំងឡើងរបស់ចិននេះ កំពុងធ្វើឱ្យសេដ្ឋកិច្ចចិន ក៏ដូចជាពិភពលោកទាំងមូលប្រឈមនឹងភាពរង្គោះរង្គើកាន់តែខ្លាំង ខណៈខ្សែចង្វាក់ផ្គត់ផ្គង់មានការរអាក់រអួល ហើយរោងចក្រជាច្រើនត្រូវបង្ខំចិត្តបិទទ្វារ៕
អត្ថបទ៖ វ៉ាន់ ស្រីរ័ត្ន
None
