តើអ្វីនឹងក្លាយជារបៀបវារៈនយោបោយ និងសេដ្ឋកិច្ចក្នុងកិច្ចប្រជុំបក្សកុម្មុយនីស្តចិន នៅខែកក្កដា ខាងមុខ?

តាមការគ្រោងទុកសមាជិកគណៈកម្មាធិការកណ្តាលទាំងអស់របស់គណបក្សកុម្មុយនីស្តចិន ដែលមានសមាជិក២០៥នាក់ និងសមាជិកអចិន្រ្តៃយ៍១៧១រូប ដោយរួមទាំងលោក ប្រធានាធិបតី ស៊ី ជីនពីង ផងនោះ នឹងជួបប្រជុំគ្នាជាថ្មីម្តងទៀតនៅអំឡុងខែកក្កដា ខាងមុខនេះ។ បើតាមការចុះផ្សាយរបស់សារព័ត៌មាន Nikkei កិច្ចប្រជុំនាពេលខាងមុខនេះ គឺជាព្រឹត្តិការណ៍ដ៏សំខាន់ ដែលមេដឹកនាំចិននឹងសម្រេចលើរបៀបវារៈនយោបាយ និងសេដ្ឋកិច្ចដាក់នៅក្នុងប្រតិទិនប្រតិបត្តិនយោបាយរបស់ប្រទេសមហាយក្សមួយនេះ។

ពាក់ព័ន្ធនឹងកិច្ចប្រជុំនេះ អ្នកវិភាគបានអះអាងថា ថ្នាក់ដឹកនាំចិននឹងផ្តោតលើការកែទម្រង់ស៊ីជម្រៅបន្ថែមទៀត ដើម្បីធ្វើយ៉ាងណាជំរុញការលើកកម្ពស់ទំនើបភាវូបនីយកម្មនៃប្រទេសចិន។ កិច្ចប្រជុំនេះគ្រោងរៀបចំឡើង ស្របពេលដែលចិន កំពុងប្រឈមមុខនឹងការធ្លាក់ចុះនៃសេដ្ឋកិច្ច ហើយវិស័យអចលនទ្រព្យកំពុងជំពាក់ជំពិននឹងបញ្ហាចាក់ស្រេះ លំហូរវិនិយោគទុនចេញក្រៅប្រទេសច្រើន និងការធ្វើពាណិជ្ជកម្មជួបការរឹតត្បិតជាដើម។

ទីភ្នាក់ងារសារព័ត៌មានរដ្ឋ ស៊ីនហួរ បានរាយការណ៍កាលពីថ្ងៃអង្គារ៍ ថា កិច្ចប្រជុំពេញអង្គលើកទីបីនេះ ជាធម្មតាត្រូវបានធ្វើឡើងនៅរដូវស្លឹកឈើជ្រុះ ចាប់តាំងពីទសវត្សរ៍នៃឆ្នាំ១៩៩០មក នឹងរៀបចំជាថ្មីបន្ទាប់ពីខកខានការរៀបចំកាលពីឆ្នាំ២០២៣។

ពាក់ព័ន្ធនឹងបញ្ហានេះ លោក ស៊ី ជិនពីង ធ្លាប់បាននិយាយកាលពីខែមីនា ថា ប្រទេសចិន មិនបានដួលរលំដូចការព្យាករ​ឡើយ ផ្ទុយទៅវិញចិនបានពង្រឹងលើការធ្វើកំណែទម្រង់ ដើម្បីឆ្លើយតបនឹងបញ្ហា។ ថ្នាក់ដឹកនាំរូបនេះបានសង្កត់ធ្ងន់ម្តងហើយម្តងទៀតថា កំណែទម្រង់ និងការបើកចំហរ គឺជាឧបករណ៍ដ៏សំខាន់សម្រាប់ប្រទេសចិន សម័យទំនើប ដើម្បីតាមឲ្យទាន់ដំណើរវិវត្តន៍នៃសង្គម ហើយបានប្តេជ្ញាថា នឹងលើកកម្ពស់ការរៀបចំផែនការ និងអនុវត្តវិធានការសំខាន់ៗជាបន្តបន្ទាប់ ដើម្បីកែទម្រង់ស៊ីជម្រៅគ្រប់ជ្រុងជ្រោយ៕

ដោយៈ សរ សុជាតិ