មែនទែនទៅ អាល្លឺម៉ង់គឺជាប្រទេសដៃគូពាណិជ្ជកម្មដ៏ធំបំផុតរបស់ប៉ូឡូញ និងជាសមាជិករួមនៃសហភាពអឺរ៉ុប ព្រមទាំងអង្គការណាតូផងដែរនោះ បានអះអាងកាលពីពេលមុនមកហើយថា ការទាមទារសំណងហិរញ្ញវត្ថុទាំងឡាយរបស់ប៉ូឡូញទាក់ទិននឹងសង្គ្រាមលោកទីពីរ ដែលខ្លួនបង្កឡើងនោះ ត្រូវបានដោះស្រាយរួមជាស្ថាពរហើយ។
ក៏ប៉ុន្តែ ចាប់តាំងពីគណបក្សច្បាប់ និងយុត្តិធម៌ (PiS) របស់ប្រទេសប៉ូឡូញ បានឡើងកាន់អំណាចក្នុងឆ្នាំ ២០១៥ មក គណបក្សនេះបានអំពាវនាវម្តងហើយម្តងទៀត ឲ្យអាល្លឺម៉ង់សងថ្លៃខូតខាតកាន់តែច្រើនឡើងៗ ប៉ុន្ដែខ្លួនមិនដែលទាមទារសំណងជាផ្លូវការនោះទេ ដោយក្នុងឆ្នាំ ២០១៩ កន្លងទៅ សមាជិកសភាប៉ូឡូញដែលមកពីបក្សដដែលនេះ បានប៉ានប្រមាណថ្លៃខូតខាតដល់ទៅ ៨៥០ ពាន់លានដុល្លារឯណោះ។
លោកចារូស្លរ កាហ្សីនស្គី (Jaroslaw Kaczynski) ដែលជាប្រធានគណបក្សច្បាប់ និងយុត្តិធម៌ (PiS) នៃប្រទេសប៉ូឡូញបានប្រាប់សន្និសីទសារព័ត៌មានមួយថា៖ «ការថ្លឹងថ្លែងពីទំហំខាតបង់នេះ ត្រូវបានអនុម័តដោយវិធីសាស្រ្តដ៏សុក្រិតបំផុត ដែលទំហំនោះអាចនឹងលើសនេះក៏ថាបាន»។
ជារឿយៗ គណបក្សកាន់អំណាចប៉ូឡូញនេះតែងប្រើជំហរសើរើ និងបង្កអរិភាពជាមួយប្រទេសអាល្លឺម៉ង់ ដើម្បីកៀរគរការគាំទ្របក្សរបស់ខ្លួន ហើយក៏ធ្វើឲ្យទំនាក់ទំនងជាមួយទីក្រុងប៉ែរឡាំងកាន់តែល្អក់កករផងដែរ។ លើសពីនេះ ទីក្រុងវ៉សរបានរិះគន់អាល្លឺម៉ង់កាន់តែខ្លាំងឡើងនៅពេលដែលប្រទេសនេះបន្តពឹងផ្អែកឧស្ម័នរុស្សី នឹងភាពយឺតយ៉ាវក្នុងការជួយប្រទេសអ៊ុយក្រែន ក្រោយរុស្ស៊ីចូលឈ្លានពាន។
អត្ថបទគួរអាន
ទោះជាយ៉ាងណា គេនៅចាំមិនទាន់ភ្លេចទេថា ប្រទេសប៉ូឡូញត្រូវបានញាំញីដោយសង្គ្រាមលោកលើកទីពីរ ដោយមានប្រជាជនប៉ូឡូញប្រាំមួយលាននាក់ រួមទាំងមានជនជាតិប៉ូឡូញកាត់ជ្វីបជាងបីលាននាក់ផ្សេងទៀត ត្រូវបានសម្លាប់រង្គាលដោយរបបណាស៊ីអាល្លឺម៉ង់ ហើយនិងការបះបោរក្នុងឆ្នាំ ១៩៤៤ បានធ្វើឲ្យមនុស្ស ២០ ម៉ឺននាក់ត្រូវបានសម្លាប់ផងដែរ។
គួររលឹកថា នៅក្នុងឆ្នាំ ១៩៥៣ មេដឹកនាំកុម្មុយនិស្តប៉ូឡូញនៅពេលនោះ បានបោះបង់ចោលការទាមទារទាំងអស់ចំពោះសំណងនៃសង្គ្រាមរបស់អាល្លឺម៉ង់ក្រោមសម្ពាធពីសហភាពសូវៀត ដែលចង់ឲ្យអាល្លឺម៉ង់ខាងកើត ជាប់ជាប្រទេសរណបសូវៀតផងដែរ។
តែយ៉ាងណា គណបក្សកាន់អំណាចបច្ចុប្បន្នរបស់ប្រទេសប៉ូឡូញនិយាយថា កិច្ចព្រមព្រៀងនោះមិនត្រឹមត្រូវទេ ព្រោះប៉ូឡូញមិនបានចរចាឲ្យមាននូវសំណងសមរម្យណាមួយនោះឡើយ។
ទន្ទឹមនឹងនេះ អ្នកនាំពាក្យក្រសួងការបរទេសអាល្លឺម៉ង់បាននិយាយថា៖ «ជំហររបស់រដ្ឋាភិបាលអាល្លឺម៉ង់គឺមិនមានការផ្លាស់ប្តូរឡើយ ដែលសំណុំរឿងសំណងនោះត្រូវបានបិទបញ្ចប់ហើយ»។
ស្របគ្នានេះដែរ លោកដូណាល ថុសក៍ (Donald Tusk) មេដឹកនាំគណបក្សប្រឆាំងដ៏ធំបំផុតរបស់ប្រទេសប៉ូឡូញ បាននិយាយកាលពីថ្ងៃព្រហស្បតិ៍ដែរថា ការប្រកាសរបស់លោក ចារូស្លរ កាហ្សីនស្គី (Jaroslaw Kaczynski) ដែលជាប្រធានគណបក្សកាន់អំណាចនៃប្រទេសប៉ូឡូញនេះគឺ៖ «មិនមែនផ្ដោទៅលើសំណងឡើយ តែជាយុទ្ធនាការឃោសនានយោបាយផ្ទៃក្នុង ដើម្បីទទួលបានការគាំទ្រឡើងវិញរបស់បក្សកាន់អំណាចប៉ុណ្ណោះ»៕
