លោក សេង សុងចេង (Sheng Songcheng) អតីតនាយកផ្នែកស្ថិតិ និងវិភាគនៅធនាគារកណ្តាលចិន បាននិយាយថា នៅឆ្នាំ២០២៤ ខាងមុខ អាជ្ញាធរចិនត្រូវបានគេរំពឹងថា នឹងបន្តអនុវត្តគោលនយោបាយសារពើពន្ធវិជ្ជមាន ពោលគឺជាគោលនយោបាយរូបិយវត្ថុ ដែលស្របតាមគោលនយោបាយសារពើពន្ធរបស់ប្រទេស ដើម្បីកាត់បន្ថយសមាមាត្រនូវតម្រូវការប្រើប្រាស់ទុនបម្រុង ដើម្បីជាជំនួយរក្សាស្ថិរភាពសេដ្ឋកិច្ច។
ការអត្ថាធិប្បាយនេះបានកើតឡើងស្របពេលដែលសេដ្ឋកិច្ចចិនត្រូវបានគេអះអាងថា កំពុងតែស្ថិតនៅក្នុងស្ថានភាពមួយដែលកំពុងតស៊ូ និងជំរុញការងើបឡើងវិញបន្ទាប់ពីត្រូវបានរំខានដោយវិធានការទប់ស្កាត់ជំងឺរាតត្បាតដ៏យូរ ខណៈអ្នកឃ្លាំមើលទីផ្សារបារម្ភថា វិបត្តិបំណុលធ្ងន់ធ្ងរក្នុងចំណោមអ្នកអភិវឌ្ឍន៍អចលនទ្រព្យធំៗអាចហៀរទៅដល់វិស័យផ្សេងៗ។
លោក សេង បាននិយាយថា ទន្ទឹមនឹងដាក់ចេញវិធានការកំណត់អត្រាការប្រាក់ និងអត្រាប្រាក់កម្ចីក្នុងកម្រិតទាបហើយនោះ ចិននៅតែមានចន្លោះ និងមធ្យោបាយជាច្រើនទៀត ដើម្បីកាត់បន្ថយសមាមាត្រតម្រូវការប្រើប្រាស់ទុនបម្រុងរបស់ធនាគារជាជាងយកបញ្ហាអត្រាការប្រាក់ធ្វើជាចំណាប់ខ្មាំងសេដ្ឋកិច្ច។
អត្ថបទគួរអាន
ធនាគារកណ្តាលចិនបានទម្លាក់សមាមាត្រតម្រូវការប្រើប្រាស់ទុនបម្រុងនៅក្នុងខែកញ្ញា ជាលើកទីពីរក្នុងឆ្នាំនេះ ដើម្បីបង្កើនសាច់ប្រាក់ងាយស្រួល និងគាំទ្រការងើបឡើងវិញនៃសេដ្ឋកិច្ច ហើយអ្នកវិភាគរំពឹងថា ចិនក៏នឹងដាក់ចេញនូវគោលនយោបាយសង្រ្គោះសេដ្ឋកិច្ចមួយផ្សេងទៀតនៅចុងឆ្នាំនេះផងដែរ។
សមាមាត្រតម្រូវការប្រើប្រាស់ទុនបម្រុងជាមធ្យមសម្រាប់ស្ថាប័នហិរញ្ញវត្ថុនានា ត្រូវបានកំណត់ក្នុង អត្រាប្រហែល៧,៤ភាគរយ បន្ទាប់ពីការកាត់បន្ថយការចំណាយទប់សេដ្ឋកិច្ច។
យ៉ាងណាមិញអ្នកជំនាញរូបនេះកត់សម្គាល់ឃើញថា ប្រទេសចិនមានការប្រុងប្រយ័ត្នក្នុងការកាត់បន្ថយអត្រាការប្រាក់ ខណៈដែលគោលនយោបាយរូបិយវត្ថុរបស់ខ្លួនត្រូវពិចារណាលើតុល្យភាពខាងក្នុង និងខាងក្រៅយ៉ាងហ្មត់ចត់។
តាមការរំពឹងទុកទាក់ទងនឹងការដាក់ចេញនូវគោលនយោបាយសេដ្ឋកិច្ចនានាកន្លងមក គេសន្និដ្ឋានថា លុយយ័នរបស់ចិននឹងមានស្ថិរភាពនិងអាចរក្សាបាននូវនិន្នាការឡើងថ្លៃនៅមានកម្រិតនៅឆ្នាំក្រោយ៕
ដោយៈ សរ សុជាតិ
None
