ក្រុមហ៊ុនផលិតរថយន្តអគ្គិសនីរបស់មហាយក្សចិន កំពុងពង្រីកឥទ្ធិពលទីផ្សាររថយន្តមកកាន់តំបន់អាស៊ីអគ្នេយ៍។ ក្រុមហ៊ុនផលិតរថយន្តចិន ដែលកំពុងប្រជែងគ្នាដណ្តើមចំណែកទីផ្សារថយន្តប្រណិតៗនៅក្នុងតំបន់ដែលមានទីផ្សារប្រមាណ៧០០លាននាក់នេះ រួមមានក្រុមហ៊ុនផលិតរថយន្តរបស់រដ្ឋចិន GAC Aion និងក្រុមហ៊ុនផលិតរថយន្ត BYD។
ក្រុមហ៊ុនទាំងពីរកំពុងប្រកួតប្រជែងគ្នាដណ្តើមចំណែកទីផ្សាររថយន្តប្រណិតកម្លាំងខ្លាំង ដែលមានតម្លៃចាប់ពីជាង១៨ ម៉ឺនដុល្លារ ទៅដល់ជាង២០ម៉ឺនដុល្លារ។ បច្ចុប្បន្នរថយន្តប្រណិតៗរបស់ក្រុមហ៊ុនទាំងពីរនេះកំពុងព្យាយាមដណ្តើមសក្តានុពលនៃចំណែកទីផ្សារថយន្តនៅក្នុងប្រទេស ដែលមានសេដ្ឋកិច្ចធំៗរបស់អាស៊ាន ដូចជា ថៃ ឥណ្ឌូនេស៊ី និងសិង្ហបុរី ជាដើម ដែលកន្លងមកជាទីផ្សាររបស់ក្រុមហ៊ុនផលិតរថយន្តនៅបស្ចិមប្រទេស និងជប៉ុន។
លោក អឺណេស តាន (Ernest Tan) នាយកក្រុមហ៊ុន Vincar ដែលជាក្រុមហ៊ុន ចែកចាយរថយន្តនៅសិង្ហបុរី បានឲ្យដឹងថា សព្វថ្ងៃនេះ ចិនកំពុងបញ្ជូនរថយន្តម៉ាកយីហោថ្មីៗជាច្រើនចូលមកទីផ្សារ ដើម្បីប្រកួតប្រជែងក្នុងទីផ្សារថយន្តយន្តរបស់សិង្ហបុរី។ នាយកក្រុមហ៊ុនរូបនេះទទួលស្គាល់ថា រថយន្តចិន ជាពិសេសរថយន្តអគ្គិសនីបច្ចុប្បន្នទំនើបណាស់ ដោយវាអាចបើកបរបានរហូតដល់ទៅ៥២០គីឡូម៉ែត្រនៅក្នុងមួយម៉ោង ហើយការសាកថ្មកាន់លឿន ពោលគឺពី១០% ទៅដល់៧០% ត្រឹមតែ១៥ នាទីប៉ុណ្ណោះ។ ក្រុមហ៊ុន GAC Aion កំពុងតែបញ្រ្ជៀតចូលទីផ្សារសិង្ហបុរី ខណៈបច្ចុប្បន្នរថយន្តអគ្គិសនីរបស់ក្រុមហ៊ុន BYD ប្រមាណ៨ពាន់៥០០គ្រឿង និងរថយន្តអគ្គិសនីរបស់ក្រុមហ៊ុន Tesla ប្រមាណ៥ពាន់១រយគ្រឿង កំពុងចរាចរនៅដងផ្លូវក្នុងប្រទេសសិង្ហបុរី៕
ដោយៈ សរ សុជាតិ
