ក្រសួងឧស្សាហកម្ម និងបច្ចេកវិទ្យាព័ត៌មាន ព្រមទាំងរដ្ឋាភិបាលក្រុងសៀងហៃ ថ្មីៗនេះបានចេញផ្សាយបញ្ជីរឈ្មោះក្រុមហ៊ុនចំនួន ៦៦៦ ដើម្បីទទួលបានជំនួយពីរដ្ឋាភិបាលបន្ត ឬចាប់ផ្តើមប្រតិបត្តិការឡើងវិញនៅក្នុងទីក្រុងនេះ។ បញ្ជីឈ្មោះរួមមានក្រុមហ៊ុនជាប្រតិបត្តិករហេដ្ឋារចនាសម្ព័ន្ធ និងអ្នកផ្តល់សេវាវេជ្ជសាស្ត្រ ដែលបម្រើដល់ទីក្រុងសៀងហៃ ក៏ដូចជាអាជីវកម្មដែលមានសារៈសំខាន់មួយចំនួនទៀតសម្រាប់សេដ្ឋកិច្ចចិន។
នៅទីក្រុងសៀងហៃ មានក្រុមហ៊ុនផលិត និងអ្នកផ្គត់ផ្គង់រថយន្ត មានចំនួនជិត ៤០% ច្រើនជាងវិស័យដទៃទៀត។ ទាំងនេះរួមមាន ក្រុមហ៊ុន Tesla និង ក្រុមហ៊ុន SAIC Motor ដែលមានប្រតិបត្តិការបណ្តាក់ទុនរួមគ្នាជាច្រើនជាមួយក្រុមហ៊ុនផលិតរថយន្តសំខាន់ៗរបស់សហរដ្ឋអាមេរិក និងអឺរ៉ុប។
អត្ថបទគួរអាន
ជាមួយគ្នាដែរ ក្រុមហ៊ុនឱសថ និងសុខាភិបាលមានជិត ៣០% ខណៈដែលក្រុមហ៊ុន ផលិតបន្ទះឈីប ថាមពល និងគីមីឥន្ធនៈមានប្រហែល ១០% ។ ក្នុងបញ្ជីនេះក្រុមហ៊ុនដែលអាចទទួលបានជំនួយពីរដ្ឋ ឬបើកប្រតិបត្តិការឡើងវិញនោះ ក៏មានរួមបញ្ចូលក្រុមហ៊ុនជប៉ុន និងក្រុមហ៊ុនបរទេសផ្សេងទៀតដែលកំពុងប្រតិបត្តិការនៅទីក្រុងសៀងហៃ ក្នុងវិស័យផលិតសម្ភារប្រើប្រាស់ផងដែរ។
ទីក្រុងសៀងហៃ គឺជាចំណុចក្ដៅមួយ ដែលកំពុងមានករណីឆ្លងកូវីដ១៩កាន់តែច្រើន ហើយអាជ្ញាធរទីក្រុងនេះ មានគោលបំណងបញ្ឈប់ការរីករាលដាលនៃ កូវីដ-១៩ នៅតាមតំបន់ដែលត្រូវបានបិទខ្ទប់មួយចំនួន ដោយមានការដាក់ចេញនូវវិធានការដ៏តឹងរ៉ឹងជាច្រើន។ ការអនុវត្តវិធានការតឹងរ៉ឹងកាន់តែយូរ វាក៏កំពុងធ្វើឲ្យប្រជាពលរដ្ឋកាន់តែជួបការលំបាកកាន់តែខ្លាំងផងដែរ។
សូមជម្រាបជូនថា ទីក្រុងសៀងហៃបានរាយការណ៍ពីករណីឆ្លងកូវីដ-១៩ក្នុងស្រុកថ្មីចំនួនជាង២ម៉ឺននាក់ កាលពីថ្ងៃអាទិត្យ។ ទោះបីជាមានការរីករាលដាលយឺតក៏ដោយ ការរឹតបន្តឹងការធ្វើដំណើរនៅតែមានទូទាំងទីក្រុងជាច្រើនហើយអាជ្ញាធរបាននឹងកំពុងបង្ក្រាបលើការកើនឡើងនៃព័ត៌មានក្លែងក្លាយទាក់ទងនឹងជំងឺរាតត្បាតកូវីដ-១៩ផងដែរ។
អត្ថបទ៖ ម៉ុន សុកែវ
None
