ប្រទេសកំពុងអភិវឌ្ឍន៍រងបញ្ហាបំណុលកាន់តែអាក្រក់ ដោយសារវិបត្តិសង្គ្រាមនៅអ៊ុយក្រែន

សង្គ្រាមនៅប្រទេសអ៊ុយក្រែនកំពុងធ្វើឱ្យរដ្ឋាភិបាលនៃប្រទេសដែលមានទីផ្សារកំពុងតែរីកចម្រើនជាច្រើន បានជួបនូវភាពយ៉ាប់យ៉ឺនកាន់តែខ្លាំងក្លាក្នុងការទូទាត់បំណុលដល់ម្ចាស់បំណុលបរទេសជំរុញឱ្យមានការព្រួយបារម្ភកាន់តែខ្លាំងពីលទ្ធភាពកើតមានវិបត្តិ ដែលអាចធ្វើឲ្យរង្គោះរង្គើទីផ្សារនិងធ្វើឱ្យប៉ះពាល់ដល់ការស្តារសេដ្ឋកិច្ចពិភពលោកឡើងវិញ។ នេះបើយោងតាមការចុះផ្សាយដោយសារព័ត៌មាន The Wall Street Journal។

សង្គ្រាមអ៊ុយក្រែន កំពុងធ្វើឱ្យ ប្រទេសដែលមានទីផ្សារកំពុងអភិវឌ្ឈជាច្រើន ជួបភាពយ៉ាប់យ៉ឺនកាន់តែខ្លាំង។

ប្រទេសដែលកំពុងអភិវឌ្ឍន៍ជាច្រើនមានបំណុលកើនឡើងគរដូចភ្នំនៅក្នុងអំឡុងពេល ១ទស្សវត្សរ៍កន្លងមកនេះ ខណៈដែលអតិផរណា និង អត្រាការប្រាក់មានកម្រិតទាប ហើយក្នុងរយៈពេល ២ឆ្នាំចុងក្រោយនេះ ការចំណាយហាក់បីដូចមានការកើនឡើងខ្លាំង ដោយសារតែជំងឺកូវីដ១៩។

បន្ថែមពីនេះ ការឈា្លនពានរបស់រុស្ស៊ីទៅលើប្រទេសអ៊ុយក្រែន និងការដាក់ទណ្ឌកម្មរបស់បស្ចិមលោកទៅលើរុស្ស៊ីបានធ្វើឱ្យស្បៀងអាហារ ថាមពល និងតម្លៃទំនិញផ្សេងៗទៀតបានកើនឡើង ស្របពេលធនាគារកណ្ដាលធំៗជាច្រើនកំពុងបង្កើនអត្រាការប្រាក់ដើម្បីទប់អតិផរណា។

ឥឡូវនេះចាប់ពីទីក្រុង Islamabad ប្រទេសប៉ាគីស្ថានរហូតដល់ទីក្រុងគែរ (Cairo) ប្រទេសអេហ្ស៊ីប បន្តទៅទីក្រុង ប៊ូណូស៊ែរ (Buenos Aires) ប្រទេសអាហ្សង់ទីន គឺថា មន្ត្រីរដ្ឋាភិបាលនៃប្រទេសទាំងអស់នេះកំពុងជួបបញ្ហានៃការកើនឡើងតម្លៃនាំចូល និងវិក្កយបត្របំណុលបន្ថែមពីលើវិបត្តិជំងឺកូវីដ១៩ ដែលកំពុងញ៉ាំញីដល់សេដ្ឋកិច្ច។

នៅទ្វីបអាស៊ីឯណេះវិញ កាលពីសប្ដាហ៍មុន ប្រទេសស្រីលង្កាបាននិយាយថា ខ្លួននឹងផ្អាកការទូទាត់បំណុលបរទេស និងបានស្នើសុំជំនួយហិរញ្ញវត្ថុបន្ទាន់ពីមូលនិធិរូបិយវត្ថុអន្តរជាតិ (IMF)។ ក្រសួងហិរញ្ញវត្ថុរបស់ប្រទេសនេះ បាននិយាយថាសង្គ្រាមនៅអ៊ុយក្រែន និងជំងឺកូវីដ១៩បានប៉ះពាល់ដល់ប្រាក់ចំណូលពីវិស័យទេសចរណ៍ជាហេតុធ្វើឱ្យប្រទេសដីកោះមួយនេះ មិនអាចសងបំណុលគេបាន។

លោក កេណិត រ៉ូហ្គូហ្វ (Kenneth Rogoff) សេដ្ឋវិទូនៅសកលវិទ្យាល័យ Harvard បាននិយាយក្នុងអំឡុងកិច្ចពិភាក្សាជាមួយនឹងអង្គការមូលនិធិរូបិយវត្ថុអន្តរជាតិ IMF នាពេលថ្មីៗនេះថា វានឹងមានការខកខានសងបំណុល ហើយវាក៏នឹងមានវិបត្តិជាច្រើនផងដែរ។ នៅពេលដែលពួកគេមានភាពតក់ស្លុតខ្លាំងបែបនេះ គឺអ្វីៗអាចនឹងកើតឡើងបានគ្រប់ពេលវេលា។

លោកស្រី ស៊ីឡា ផាហ្សាបា ស៊ីអូគ្លូ (Ceyla Pazarbasioglu) នាយិកា IMF ផ្នែកយុទ្ធសាស្ត្រ គោលនយោបាយ និងការត្រួតពិនិត្យបាននិយាយថា ខណៈដែល IMF មិនបានព្យាករណ៍ពីវិបត្តិបំណុលសកលនៅពេលនេះ ដោយសារតែពួកគេមានការព្រួយបារម្ភខ្លាំងពីហានិភ័យ។

លោកស្រីបានបញ្ជាក់ថា ការខ្ចីប្រាក់ជាសកលរួមគ្នារបស់រដ្ឋាភិបាល ក្រុមហ៊ុនសាជីវកម្ម និងគ្រួសារបានកើនឡើង ២៨ ភាគរយដល់អត្រា ២៥៦ ភាគរយនៃផលិតផលក្នុងស្រុកសរុបរបស់ពិភពលោកក្នុងឆ្នាំ២០២០ ហើយវាគឺជាកម្រិតមួយដែលមិនធ្លាប់មានចាប់តាំងពីសង្គ្រាមលោកទាំងពីរ។

សូមបញ្ជាក់ថា មានប្រហែល ៦០% នៃប្រទេសចំណូលទាប ពោលគឺមានប្រហែល៧០ប្រទេស គឺត្រូវបានចាត់ចូលនៅក្នុងកម្មវិធីផ្អាកការទូទាត់បំណុលជាសកលនៅក្នុងអំឡុងវិបត្តិជំងឺរាតត្បាតកូវីដ១៩ ដែលស្ថិតនៅក្នុងកម្រិតជាហានិភ័យខ្ពស់នៃវិបត្តិបំណុល។ នេះបើតាមទិន្នន័យពី IMF៕

អត្ថបទ៖ សុខ ជា