តើមានកត្តាអ្វីបានជាចិន ដែលជាប្រទេសស្ដេចល្បែង ព្រមានដាក់ទោសពលរដ្ឋខ្លួន ដែលលេងល្បែងស៊ីសងឆ្លងដែនទៅវិញ?

នៅអំឡុងសន្និសីទកាសែតនៅទីក្រុងប៉េកាំង ប្រទេសចិន កាលពីថ្ងៃចន្ទ ដើមសប្ដាហ៍នេះ លោក លីន ជៀន (Lin Jian) អ្នកនាំពាក្យក្រសួងការបរទេសចិន បានព្រមានពលរដ្ឋចិន ឱ្យជៀសឆ្ងាយពីការលេងល្បែងស៊ីសង ខណៈកាស៊ីណូស្របច្បាប់មួយនៅប្រទេសសិង្ហបុរី ត្រូវបានប្រទេសចិន ដាក់ទណ្ឌកម្ម។

ស្ថានទូតចិន ប្រចាំប្រទេសសិង្ហបុរី បានចេញសេចក្ដីថ្លែងការណ៍ទាក់ទិននឹងការលេងល្បែងស៊ីសងឆ្លងដែនថា ទោះបីជាកាស៊ីណូណាមួយត្រូវបានបង្កើតឡើងដោយស្របច្បាប់នៅក្រៅព្រំដែនប្រទេសចិន ឬចិនដីគោកយ៉ាងណាក៏ដោយ ក៏ពលរដ្ឋចិនមិនអាចចូលលេងបានដែរ ហើយបើហ៊ានចូលលេង វាជាការបំពានច្បាប់របស់ប្រទេសចិន ស្ដីពីការជាប់ពាក់ព័ន្ធនឹងល្បែងឆ្លងដែន ដែលត្រូវប្រឈមចំពោះមុខច្បាប់​។

តំណាងមកពីស្ថាប័នសារព័ត៌មានបានចោទសួរថា ពលរដ្ឋចិនលេងល្បែងស៊ីសងនៅក្នុងប្រទេសផ្សេង ហេតុអ្វីថា ពួកគេបំពានច្បាប់នៅក្នុងប្រទេសចិន? ឆ្លើយតបនឹងសំណួរនេះលោក លីន ជៀន (Lin Jian) អ្នកនាំពាក្យក្រសួងការបរទេសចិន បានបកស្រាយថា ជំហររបស់ប្រទេសចិន លើការលេងល្បែងស៊ីសងឆ្លងដែន គឺមិនផ្លាស់ប្ដូរ និងមានភាពច្បាស់លាស់ណាស់។

លោកគូសបញ្ជាក់ថា ប្រទេសចិន មិនអនុញ្ញាតឱ្យពលរដ្ឋចិន បោះទុនវិនិយោគលើកាស៊ីណូនៅបរទេសឡើយ ហើយក៏មិនអនុញ្ញាតឱ្យពលរដ្ឋចិន ចូលរួមពាក់ព័ន្ធនឹងការធ្វើអាជីវកម្មកាស៊ីណូនៅបរទេសដែរ ហើយថែមទាំងមិនអនុញ្ញាតឱ្យកាស៊ីណូក្រៅប្រទេសទាក់ទាញពលរដ្ឋចិន ឱ្យចូលលេងល្បែងស៊ីសងផងដែរ។

លោកបានបន្ថែមទៀតថា ប្រទេសចិនមានឆន្ទៈបន្តជំរុញកិច្ចសហប្រតិបត្តិការជាមួយភាគីពាក់ព័ន្ធបង្កើនការប្រយុទ្ធប្រឆាំងនឹងឧក្រិដ្ឋកម្មឆ្លងដែន និងការពារស្ថិរភាពសង្គម និងសណ្តាប់ធ្នាប់ក្នុងតំបន់ ព្រមទាំងការពារអាយុជីវិត និងទ្រព្យសម្បត្តិរបស់ពលរដ្ឋចិន។

លោក លីន ជៀន (Lin Jian) បានលើកឡើងក្នុងសន្និសីទដដែលនេះឆ្លើបតបនឹងសំណួរដាច់ដោយឡែកមួយទៀតថា បណ្ដាប្រទេសក្រោមកិច្ចសហប្រតិបត្តិការទន្លេមេគង្គ-ឡានឆាង (Lancang-Mekong Cooperation) រួមមានប្រទេសចិន កម្ពុជា ឡាវ មីយ៉ាន់ម៉ា វៀតណាម និងថៃ ជាដើមបានធ្វើការរួមគ្នា ដើម្បីប្រយុទ្ធប្រឆាំងនឹងល្បែងអនឡាញ ការឆបោកតាមទូរគមនាគមន៍ និងបទល្មើសឆ្លងដែនផ្សេងៗទៀត ដែលបានការពារសន្តិសុខក្នុងតំបន់ប្រកបដោយប្រសិទ្ធភាព៕

ដោយ: តែម សុខុម