ពលរដ្ឋចិនបានបង្ហាញសញ្ញាបង្កើនការចំណាយ ក្រោយរឹតត្បិតក្នុងអំឡុងវិបត្តិកូវីដ-១៩

ទិន្នន័យផ្លូវការបានបង្ហាញថា ប្រាក់ចំណូលពីវិស័យទេសចរណ៍នៅក្នុងប្រទេសចិនក្នុងអំឡុងពេលថ្ងៃឈប់សម្រាកបុណ្យចូលឆ្នាំចិន ដែលទើបបញ្ចប់កាលពីពេលថ្មីៗបានកើនឡើងប្រមាណជាង៤៧%ដោយសារការកើនឡើងនូវការធ្វើដំណើរក្នុងស្រុកចំពេលមានការសម្រាកយូរជាងធម្មតា។ សារព័ត៌មានបរទេសធំៗបានរាយការណ៍ថា ទិន្នន័យនេះអាចផ្តល់ស្ថានភាពវិជ្ជមាន បណ្តោះអាសន្នដល់អ្នកបង្កើតគោលនយោបាយ ដោយសារប្រទេសចិនដែលជាមហាអំណាចសេដ្ឋកិច្ចធំបំផុតទីពីររបស់ពិភពលោកកំពុងប្រឈមនឹងហានិភ័យបរិត្តផរណា ចំពេលតម្រូវការអ្នកប្រើប្រាស់ខ្សោយ ប៉ុន្តែនិរន្តរភាពនៃការជំរុញវិស័យទេសចរណ៍នៅតែមិនប្រាកដប្រជា។ ក្នុងអំឡុងពេលវិស្សមកាលដែលគេស្គាល់ថា ជាពេលដែលពលរដ្ឋចិនធ្វើចំណាកស្រុកប្រចាំឆ្នាំដ៏ធំបំផុតរបស់ពិភពលោកនោះ គេឃើញចលនាប្រជាពលរដ្ឋចិន គឺខ្លាំងក្លាឡើងវិញ។

យោងតាមទិន្នន័យរបស់ក្រសួងវប្បធម៌ និងទេសចរណ៍ចិន ការចំណាយលើវិស័យទេសចរណ៍ក្នុងស្រុកមានតម្លៃរហូតដល់ទៅជិត៨៨ពាន់លានដុល្លារ ពោលគឺកើនឡើងប្រមាណជាង៤៧% បើធៀបនឹងព្រឹត្តិការណ៍ និងស្ថានភាពកាលពីឆ្នាំ២០២៣ កន្លងទៅ។

ប្រភពដដែលបានបន្តថា ចំនួនស្ថិតិនៃការធ្វើដំណើរក្នុងស្រុក ដែលបានធ្វើឡើងក្នុងអំឡុងពេលវិស្សមកាលឆ្នាំ២០២៤ បានកើនឡើងជាង៣៤% បើធៀបនឹងឆ្នាំមុន ដែលមានចំនួនសរុប៤៧៤លាននាក់ ហើយបើធៀបនឹងថ្ងៃឈប់សម្រាកបុណ្យចូលឆ្នាំចិន ឆ្នាំ២០១៩ មុនពេលជំងឺកូវីដ១៩ រាតត្បាត ការចំណាយលើទេសចរណ៍ក្នុងស្រុកកើនឡើងជិត៨% រីឯការធ្វើដំណើរក្នុងស្រុកកើនឡើង១៩%៕

ដោយៈ សរ សុជាតិ