ទីផ្សារអចលនទ្រព្យវៀតណាម ត្រូវបានរំពឹងនឹងមានការប្រកួតប្រជែងកាន់តែខ្លាំងក្លានៅឆ្នាំនេះ

សមាគមអចលនទ្រព្យវៀតណាមបាននិយាយថា ការផ្គត់ផ្គង់ទីផ្សារថ្មីៗនៅក្នុងវិស័យសំណង់ និងអចលនទ្រព្យនៅវៀតណាមក្នុងឆ្នាំនេះ នឹងមានស្ថិរភាព ហើយកាន់តែខ្ពស់ជាងឆ្នាំមុន ដោយអ្នកជំនាញបានប៉ាន់ប្រមាណថា គម្រោងលំនៅឋានចំនួន១ម៉ឺន៥ពាន់គម្រោងនឹងចូលទៅក្នុងទីផ្សារនៅក្នុងទីក្រុងហូជីមិញ និងខេត្ត ប៊ិញ ឌុង នៅក្នុងឆមាសទីមួយនៃឆ្នាំនេះ។ថ

ពាក់ព័ន្ធនឹងស្ថានភាពនេះក្រុមហ៊ុនប្រឹក្សាអចលនទ្រព្យវៀតណាមបានព្យាករណ៍ថា គម្រោងអភិវឌ្ឈន៍នៅទីក្រុងហូជីមិញនឹងកើនឡើង៤ដង បើធៀបនឹងឆ្នាំមុន ហើយគេរំពឹងថា គម្រោងជាង៤ម៉ឺនយូនីត នឹងត្រូវសាងសង់រួចនៅឆ្នាំ២០២៦ ដោយឡែកនៅក្នុងឆ្នាំនេះ គឺអាចមានគម្រោងប្រមាណជា១ម៉ឺន២ពាន់ ទៅ១ម៉ឺន៥ពាន់យូនីតត្រូវបានសាងសង់រួចរាល់។

ពាក់ព័ន្ធនឹងស្ថានភាពនេះ លោក វូ ហុង ថាន (Vo Hong Thang) នាយកផ្នែកប្រឹក្សាយោបល់ និងអភិវឌ្ឍន៍គម្រោងនៅ DKRA Group បាននិយាយថា សញ្ញាវិជ្ជមានគឺមាននៅក្នុងឆ្នាំ២០២៤ ប៉ុន្តែអ្នកទិញនៅតែមានការប្រុងប្រយ័ត្ន។

ដោយឡែក លោក ឌិញ មិញ ធួន ( Dinh Minh Tuan ) អ្នកជំនាញនៅក្រុមហ៊ុនជួញដូរអចលនទ្រព្យ Batdongsan បាននិយាយថា នឹងមានការប្រកួតប្រជែងដ៏ខ្លាំងក្លាក្នុងចំណោមអ្នកអភិវឌ្ឍន៍ ដើម្បីលក់គម្រោងរបស់ពួកគេនៅឆ្នាំនេះ។

លោកបានអះអាងថា អ្នកអភិវឌ្ឍន៍គម្រោងដែលមានស្រាប់នឹងចាប់យកឱកាសលក់យ៉ាងឆាប់រហ័សក្នុងឆមាសទីមួយនៃឆ្នាំនេះ ពីព្រោះនៅចុងឆ្នាំនេះ ការផ្គត់ផ្គង់ថ្មីជាមួយនឹងគោលនយោបាយលក់ដែលមិនអាចទាយទុកជាមុនបាននឹងចាក់ចូលក្នុងទីផ្សារបន្ថែមទៀត។

នេះគឺជានិន្នាការសម្រាប់ឆ្នាំ២០២៤ ស្របពេលដែលធនាគាររដ្ឋវៀតណាមបានប្រកាសថា នៅក្នុងឆ្នាំ២០២៣ កន្លងទៅនេះ ធនាគារនៅក្នុងស្រុកទាំងអស់បានចាក់បញ្ចូលទុនរហូតដល់ទៅ៤១ពាន់លានដុល្លារ ចូលទៅក្នុងទីផ្សារអចលនទ្រព្យ ដោយកើនឡើងជិត៧%បើធៀបនឹងឆ្នាំ២០២២៕

ដោយៈ សរ សុជាតិ