លោក ហ្សង់ ដូមីនីក សេណា បាននិយាយក្នុងសម្ភាសន៍មួយថា ការសម្រេចចិត្តរបស់ប្រទេសចិនថ្មីៗនេះ ក្នុងការរឹតត្បិតការនាំចេញលោហធាតុសំខាន់២ គឺហ្គាលីយ៉ូម និងជើម៉ានីញ៉ូម ដែលប្រើនៅក្នុងបន្ទះឈីប និងរថយន្តអគ្គិសនី គួរតែធ្វើឱ្យក្រុមមេដឹកនាំអឺរ៉ុបយកចិត្តទុកដាក់ខ្លាំង ព្រោះវាឆ្លុះបញ្ចាំងឱ្យឃើញការពឹងផ្អែកខ្លាំងជ្រុលរបស់ទ្វីបនេះលើប្រទេសចិន និងតម្រូវការក្នុងការកសាងខ្សែសង្វាក់ផ្គត់ផ្គង់ថ្មីដែលថ្លៃខ្លាំង។
លោក សេណា បាននិយាយថា នៅពេលលោកនិយាយពី«ព្យុះចិន»នោះ គឺលោកចង់និយាយអំពីសម្ពាធដ៏ខ្លាំងមួយដែលកំពុងកើតឡើងសព្វថ្ងៃនេះ ទាក់ទងនឹងការនាំចូលរថយន្តអគ្គិសនីរបស់ប្រទេសចិនទៅកាន់អឺរ៉ុប។
អត្ថបទគួរអាន
នាយកក្រុមហ៊ុនរឺណូបានសង្កត់ធ្ងន់ក្នុងសម្ដីដើមថា៖ «យើងមានសមត្ថភាពផលិតរថយន្តអគ្គិសនី ប៉ុន្តែយើងកំពុងតស៊ូដើម្បីធានាសុវត្ថិភាពនៃការផ្គត់ផ្គង់របស់យើង»។ លោកបានបន្ថែមថា ឧស្សាហកម្មរថយន្តអគ្គិសនី និងប្រព័ន្ធផ្គត់ផ្គង់វត្ថុធាតុដើម[ពីប្រទេសចិន] គឺបានមកពីការវិនិយោគជាច្រើនឆ្នាំ។ លោក សេណា យល់ឃើញថា គេនឹងចំណាយអស់រាប់ពាន់លានអឺរ៉ូ ដើម្បីធ្វើឡើងវិញ។
ការរឹតត្បិតរបស់ចិនចំពោះការនាំចេញ កំពុងបង្កើនសង្គ្រាមបច្ចេកវិទ្យាជាមួយសហរដ្ឋអាមេរិក ដែលអាចធ្វើឱ្យមានការរំខានបន្ថែមទៀតដល់ខ្សែសង្វាក់ផ្គត់ផ្គង់ពិភពលោក។ អឺរ៉ុបដឹងថា ខ្លួនស្ថិតនៅកណ្ដាលជម្លោះនេះ ជាហេតុទាមទារឱ្យអឺរ៉ុបស្វែងរកជម្រើសជំនួស សម្រាប់ត្រៀមទុកក្នុងករណីដែលមានព្រឹត្តិការណ៍អាក្រក់បំផុតកើតឡើង។
លោក សេណា បានព្រមានក្នុសម្ដីដើមថា៖ «ប្រសិនបើមានវិបត្តិភូមិសាស្ត្រនយោបាយពិតប្រាកដមែននោះ ការខូចខាតរបស់រោងចក្រផលិតអាគុយ ដែលពឹងផ្អែកតែលើវត្ថុធាតុដើមមកពីក្រៅ នឹងមានទំហំធំធេងណាស់» ហើយថា «នោះហើយជាបញ្ហា»៕
អត្ថបទ៖ សុខ ជា
