កត្តាអ្វីខ្លះជំរុញប្រាក់យន់របស់ចិន ហក់ឡើងដល់កម្រិតខ្ពស់បំផុតធៀបនឹងប្រាក់ដុល្លារ គិតត្រឹម១៦ខែចុងក្រោយនេះ?

តម្លៃប្រាក់យន់របស់ចិន ដែលចរាចរនៅក្រៅចិនដីគោក បានហក់ឡើងភ្លាមៗដល់ប្រមាណ ៧ យន់ក្នុងមួយដុល្លារអាម៉េរិក ដែលជាតម្លៃមួយខ្ពស់បំផុតចាប់តាំងពីខែឧសភា ឆ្នាំ២០២៣ ខណៈដែលតម្លៃប្រាក់យន់នៅចិនដីគោកវិញ បច្ចុប្បន្នកំពុងជួញដូរក្នុងតម្លៃជាង ៧យន់ឯណោះក្នុងមួយដុល្លារអាម៉េរិក ហើយវាក៏ស្ថិតក្នុងកម្រិតខ្ពស់បំផុតគិតចាប់ពីខែឧសភា ឆ្នាំមុនមក។

លោក Wei Liang Chang អ្នកយុទ្ធសាស្ត្រផ្នែកការជួញដូរ Forex និងឥណទាន នៅក្រុមហ៊ុន DBS បានបញ្ជាក់នៅក្នុងកិច្ចសម្ភាស​ជាមួយ CNBC ថា ទន្ទឹមនឹងប្រាក់យន់ហក់ឡើងថ្លៃខ្ពស់នេះ អ្នករៀបចំគោលនយោបាយរបស់ចិន ក៏ត្រូវប្រុងប្រយ័ត្នខ្ពស់ដែរ ដើម្បីកុំឲ្យបញ្ហានេះ ធ្វើឲ្យប៉ះពាល់ដល់វិស័យនោះចេញ ខណៈសេដ្ឋកិច្ចចិន នៅតែមានភាពផុយស្រួយ។ លោកបន្ថែមថា កំណើនសេដ្ឋកិច្ចខ្សោយ និងបរិយាកាសអតិផរណាចុះទាប នៅក្នុងប្រទេសចិន គួរតែដាក់អាចដាក់សម្ពាធខ្លះ ដល់ការហក់ឡើងនៃប្រាក់យន់។

ការឡើងថ្លៃរបស់ប្រាក់យន់ចិននេះ បានកើតឡើងក្រោយពីទេសាភិបាលធនាគារប្រជាជនចិន លោក ផាន ហ្គ័ងសេង (Pen Gongsheng) បានប្រកាសថា ធនាគារកណ្ដាល នឹងកាត់បន្ថយ ០,៥% នៃសមាមាត្រតម្រូវការសាច់ប្រាក់បម្រុង ដែលធនាគារពាណិជ្ជទាំងត្រូវមាន ដែលវានឹងជួយធ្វើឲ្យសាច់ប្រាក់ងាយស្រួលរយៈពេលវែង ឬហៅថា Long-term Liquidity ប្រហែល ១៤០ពាន់លានដុល្លារ នឹងហូរចូលទៅក្នុងទីផ្សារ ដែលជាផ្នែកមួយក្នុងការជំរុញដល់សកម្មភាពសេដ្ឋកិច្ច៕

អត្ថបទ៖ សុខ មង្គល