ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាលបានចាត់ទុករបាយការណ៍ ដែលចេញផ្សាយដោយ Our World in Data និងការសិក្សារបស់មជ្ឈមណ្ឌលស្រាវជ្រាវនៃសាកលវិទ្យាល័យ Oxford កាលពីពេលថ្មីៗ ដែលថា ពលរដ្ឋកម្ពុជាមានសុភមង្គលទាបជាងគេ និងកើតជំំងឺផ្លូវចិត្តច្រើនជាងគេនៅតំបន់អាស៊ាន ហាក់មានភាពមិនប្រក្រតី និងមិនគួរឱ្យជឿជាក់បាន។
មិនគួរឱ្យជឿជាក់បាន ក៏ដោយសារតែរបាយការណ៍នេះបានចាត់ចំណាត់ថ្នាក់មីយ៉ាន់ម៉ា ដែលកំពុងហែកហួរដោយសង្គ្រាមផ្ទៃក្នុង និងមានប្រជាជនជាច្រើនរត់ភៀសខ្លួនទៅកាន់ប្រទេសនានា បែរជាមានប្រជាជនមានភាពសប្បាយរីករាយជាងកម្ពុជាទៅវិញ។ តែយ៉ាងណា ឯកឧត្តម បានចាត់ទុកការចាត់ចំណាត់ថ្នាក់ប្រទេសណាមួយរបស់អង្គការមួយចំនួន គឺជាការងាររបស់អង្គការទាំងនោះ ហើយការចាត់ចំណាត់ថ្នាក់ថ្មីៗៗនេះមិនបានធ្វើឱ្យប៉ះពាល់ដល់កម្ពុជានោះទេ ដ្បិតថា របាយការណ៍នេះមិនត្រូវបានទទួលស្គាល់ដោយប្រទេសនៅក្នុងតំបន់អាស៊ាន ឬប្រទេសណាមួយ។
អត្ថបទគួរអាន
ស្រដៀងគ្នានេះលោកបណ្ឌិត ឈត ប៊ុនថង អ្នកស្រាវជ្រាវ និងជាអ្នកជំនាញទស្សនវិជ្ជា នៃរាជបណ្ឌិត្យសភាកម្ពុជាបានចាត់ទុករបាយការណ៍ស្រាវជ្រាវខាងលើ ហាក់គ្មានប្រភព និងការស្រាវជ្រាវបែបវិទ្យាសាស្ត្រច្បាស់លាស់ ដែលអាចជឿទុកចិត្តបាន។ ទន្ទឹមនេះ អ្នកជំនាញរូបនេះកត់សម្គាល់ឃើញថា ដោយសារបច្ចុប្បន្នមានការប្រកួតប្រជែងខ្លាំងខាងផ្នែកភូមិសាស្ត្រនយោបាយ អាចជំរុញឱ្យប្រទេសមួយចំនួនប្រើប្រាស់ការស្រាវជ្រាវធ្វើជាឧបករណ៍ក្នុងការវាយប្រហារមកលើប្រទេសមួយទៀត ក៏មានដែរ។ យ៉ាងណាក៏ដោយអ្នកជំនាញរូបនេះទទួលស្គាល់ថា បញ្ហាផ្លូវចិត្តរបស់ប្រជាជនកម្ពុជាមួយចំនួនអាចកើតមានពិតប្រាកដមែននៅប៉ុន្មានឆ្នាំចុងក្រោយនេះ ដែលអាចបង្កឡើងដោយវិបត្តិជំងឺកូវីដ-១៩ សេដ្ឋកិច្ចគ្រួសារ សុខភាពផ្លូវចិត្ត និងវិបត្តិសង្គមមួយចំនួន។
បើយោងតាមការចុះផ្សាយរបស់គេហទំព័រ Our World in Data កាលពីពេលថ្មីៗ កម្ពុជាត្រូវបានចាត់ចំណាត់ថ្នាក់ជាប្រទេសមានពលរដ្ឋកើតជំងឺផ្លូវចិត្តខ្ពស់ជាងគេនៅតំបន់អាស៊ាន ដែលមានរហូតដល់១២% ដែលតាមពីក្រោយដោយឡាវ ម៉ាឡេស៊ី និងហ្វីលីពីន ខណៈដែលមីយ៉ាន់ម៉ាដែលកំពុងហែកហួរដោយសង្គ្រាមផ្ទៃក្នុងបានឈរចំណាត់ថ្នាក់លេខ៤ ជាមួយពលរដ្ឋមានវិបត្តិផ្លូវចិត្ត១០,៥៧%។ ទន្ទឹមនេះ ការសិក្សាថ្មីមួយរបស់មជ្ឈមណ្ឌលសិក្សាស្រាវជ្រាវនៃសាកលវិទ្យា Oxford បានវាយតម្លៃថា កម្ពុជាមានពលរដ្ឋមិនសូវមានសុភមង្គលខ្ពស់ជាងគេបើធៀបនឹងប្រទេសអាស៊ាន៨ផ្សេងទៀត ដោយមិនរាប់បញ្ចូលព្រុយណេ៕
អត្ថបទ៖ បូ ដូឡា
None
