ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការ រោងចក្រប្រព្រឹត្តកម្មទឹកស្អាតបាក់ខែងជំហានទី១ នាព្រឹកថ្ងៃទី១៩ ខែមិថុនា ឆ្នាំ២០២៣ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ថា អតុល្យភាពនៃតម្រូវការ និងការផ្គត់ផ្គងទឹកស្អាតនៅតែបន្តកើតមាន បើទោះបីជាពេលនេះ រោងចក្រផលិតទឹកស្អាតបាក់ខែងជំហានទី១ ត្រូវបានដាក់ឲ្យប្រើប្រាស់ជាផ្លូវការ និងមានសមត្ថភាពផ្គត់ផ្គង់ទឹកបានគ្រប់គ្រាន់សម្រាប់រាជធានីភ្នំពេញ និងក្រុងតាខ្មៅក៏ដោយ។ យ៉ាងណាក៏ដោយចុះ សម្ដេចតេជោ អះអាងថា កម្ពុជានឹងអាចបញ្ចប់នូវអតុល្យភាពនេះ នៅពេលសម្រេចជោគជ័យនៅជំហានចុងក្រោយ ពោលគឺនៅពេលរដ្ឋាករទឹកស្វយ័តក្រុងភ្នំពេញអាចផលិតទឹកស្អាតបានដល់ជាង១លានម៉ែត្រគូបក្នុងមួយថ្ងៃ។
បើតាមសម្តេចតេជោ ហ៊ុន សែន ការធ្វើទំនើបកម្មអាងប្រព្រឹត្តកម្មទឹកស្អាតត្រូវធ្វើឡើងជាជំហានៗ ពោលគឺរោងចក្រផលិតទឹកស្អាតបាក់ខែងជំហានទី១ សាងសង់រួចរាល់នេះ មានសមត្ថភាពផលិតទឹកស្អាតបានចំនួន១៩ម៉ឺន៥ពាន់ម៉ែត្រគូបក្នុងមួយថ្ងៃ បានបន្ថែមលើសមត្ថភាពផលិតទឹកស្អាត ដែលមានស្រាប់ចំនួន៦៤ម៉ឺនម៉ែត្រគូបក្នុងមួយថ្ងៃ ដែលនាំឲ្យមានសមត្ថភាពផលិតទឹកស្អាតសរុបបានដល់ទៅ ៨៣ម៉ឺន៥ពាន់ម៉ែត្រគូបក្នុងថ្ងៃ។ ទន្ទឹមនឹងនេះ សម្តេចតេជោ បានអះអាងដែរថា នៅឆ្នាំ២០២៤ ខាងមុខ រោងចក្រប្រព្រឹត្តកម្មទឹកស្អាត បាក់ខែងជំហានទី២ ដែលមានសមត្ថភាពផលិត ១៩ម៉ឺន៥ពាន់ម៉ែត្រគូបក្នុងមួយថ្ងៃ នឹងត្រូវសាងសង់រួចរាល់ ដែលនឹងធ្វើឲ្យសមត្ថភាពផលិតទឹកស្អាតសរុបកើនដល់៩៨ម៉ឺនម៉ែត្រគូបក្នុងមួយថ្ងៃ។ លើសពីនេះ ចាប់ពីខែមករា ឆ្នាំ២០២៥ ទៅ រដ្ឋាករទឹកស្វយ័តភ្នំពេញនឹងអាចផលិតទឹកស្អាតបានរហូតដល់១លាន១សែន៧ពាន់ ម៉ែត្រគូបក្នុងមួយថ្ងៃ ហើយចន្លោះឆ្នាំ២០២៥ដល់២០៣០ នឹងមានសមត្ថភាពផលិតបានដល់ដល់១លាន៨សែនម៉ែត្រគូបក្នុងមួយថ្ងៃ។
អត្ថបទគួរអាន
សូមបញ្ជាក់ថា រោងចក្រប្រព្រឹត្តកម្មទឹកស្អាតបាក់ខែងជំហានទី១ ចាប់ផ្តើមសាងសង់ឡើងនៅថ្ងៃទី០៥ ខែឧសភា ឆ្នាំ២០២០ ដោយចំណាយថវិកាចំនួន២៤៧លានដុល្លារអាមេរិក ក្រោមកិច្ចព្រមព្រៀងឥណទានសម្បទានរវាងរាជរដ្ឋាភិបាលកម្ពុជា និងទីភ្នាក់ងារបារាំងសម្រាប់ការអភិវឌ្ឍន៍ និងធនាគារវិនិយោគអឺរ៉ុប។ ក្នុងនោះទីភ្នាក់ងារបារាំងសម្រាប់ការអភិវឌ្ឍផ្ដល់ថវិកាចំនួន៨៥លានដុល្លារ, ធនាគារវិនិយោគអឺរ៉ុបផ្តល់ថវិកាចំនួន១០០លានដុល្លារ និងហិរញ្ញប្បទានឥតសំណងពីសហគមន៍អឺរ៉ុបចំនួន១៥លានដុល្លារ និងថវិកាបដិភាគរបស់រដ្ឋាករទឹកស្វយ័តក្រុងភ្នំពេញចំនួន៤៧លានដុល្លារ ដោយឡែកចំពោះរាជរដ្ឋាភិបាលគឺទទួលបន្ទុកលើពន្ធនាំចូលសម្ភារផ្សេងៗ។ ជាមួយគ្នានេះ សម្តេចតេជោ ហ៊ុន សែន ក៏បានស្នើសុំឲ្យសហគមន៍អឺរ៉ុប និងរដ្ឋាភិបាលបារាំង បន្តផ្តល់ជំនួយបន្តទៀតដល់កម្ពុជាសម្រាប់សាងសង់រោងចក្រប្រព្រឹត្តកម្មទឹកស្អាតបាក់ខែងជំហានទី៣ផងដែរ៕
