លោក ងួន ឡាយ ប្រធានសមាគមម្រេចកំពតកម្ពុជា បានគូសបញ្ជាក់ថា នៅក្នុងរយៈពេល២ខែដំបូងដើមឆ្នាំ២០២៤ នេះ ការនាំចេញម្រេចកំពត ដែលជាផលិតផលសម្គាល់ភូមិសាស្ត្រ (GI) ទៅកាន់ទីផ្សារអន្តរជាតិ សម្រេចបានជាង១២តោន។ តែយ៉ាងណា នៅក្នុងឆ្នាំ២០២៤ នេះ ការនាំចេញម្រេចកំពតអាចនឹងធ្លាក់ចុះទិន្នផលច្រើន ក្រោយបញ្ហាបម្រែបម្រួលអាកាសាធាតុ បានធ្វើឱ្យម្រេចកំពត ដែលចេញផ្កាប្រមាណ៨០% ត្រូវបានជ្រុះ និងងាប់ ខណៈបច្ចុប្បន្នកំពុងជួបបញ្ហាអាកាសធាតុក្តៅខ្លាំង។ ការប្រែប្រួលអាកាសធាតុយ៉ាងឆាប់រហ័សនេះ បានធ្វើអ្នកដាំម្រេចកំពត ដែលធ្លាប់ថែទាំដំណាំរបស់ខ្លួនក្នុងអាកាសធតុធម្មតា មិនអាចបត់បែនទាន់សភាពការណ៍។ កត្តានេះបានធ្វើឱ្យអ្នកជំនាញរូបនេះវាយតម្លៃថា ទិន្នផលម្រេចនៅឆ្នាំនេះ ទំនងជាមិនអាចឆ្លើយតបនឹងការបញ្ជាទិញរបស់ក្រុមហ៊ុននោះទេ។
សូមជម្រាបថា ជាច្រើនឆ្នាំមកហើយ តម្លៃម្រេចកំពត ដែលជាផលិតផលសម្គាល់ភូមិសាស្ត្រ GI ពុំមានការប្រែប្រួលនោះទេ ក្នុងនោះម្រេចខ្មៅមានតម្លៃ១៥ដុល្លារ រីឯម្រេចក្រហម មានតម្លៃ២៥ដុល្លារ និងម្រេច ស មានតម្លៃ២៨ដុល្លារ ក្នុងមួយគីឡូក្រាម។ ទីផ្សារសំខាន់ៗសម្រាប់ការនាំចេញម្រេចកំពតកម្ពុជា រួមមានសហភាពអឺរ៉ុប សហរដ្ឋអាម៉េរិក ជប៉ុន កូរ៉េខាងត្បូង ហុងកុង និងតៃវ៉ាន់ជាដើម។ នៅក្នុងឆ្នាំ២០២៣ កន្លងទៅ ការនាំចេញម្រេចកំពតទៅកាន់ទីផ្សារអន្តរជាតិ សម្រេចបានជាង១០០តោន កើនឡើងប្រមាណ២០% បើធៀបនឹងឆ្នាំ២០២២។ គិតត្រឹម ឆ្នាំ២០២៣ ផ្ទៃដីដាំដុះដំណាំម្រេចកំពតសរុបមានប្រមាណ ២៤០ហិកតា៕
