រុស្ស៊ី អ៊ីរ៉ង់ ចិន និងប្រទេសជាច្រើនទៀតថ្កោលទោសការវាយប្រហាររបស់អាម៉េរិកលើវេណេស៊ុយអេឡា

ប្រទេសសម្ព័ន្ធមិត្តរបស់វេណេស៊ុយអេឡាជាច្រើនដូចជារុស្ស៊ី អ៊ីរ៉ង់ និងចិនជាដើមបានថ្កោលទោសប្រតិបត្តិការយោធារបស់សហរដ្ឋអាម៉េរិកប្រឆាំងនឹងប្រទេសវេណេស៊ុយអេឡា និងការចាប់ខ្លួនលោក នីកូឡាស ម៉ាឌូរ៉ូ និងភរិយា កាលពីថ្ងៃទី៣ ខែមករា ខណៈប្រទេសលោកខាងលិចនិងសម្ព័ន្ធមិត្តរបស់អាម៉េរិកបានសម្តែងការព្រួយបារម្ភ និងអំពាវនាវឱ្យមានការបន្ធូរបន្ថយភាពតានតឹង និងប្រកាសថា ពួកគេនឹងតាមដានស្ថានការណ៍ជម្លោះនៅក្នុងតំបន់នេះយ៉ាងដិតដល់។

ក្រសួងការបរទេសរុស្ស៊ីបានបញ្ជាក់ថា រុស្ស៊ីមានការព្រួយបារម្ភយ៉ាងខ្លាំង និងថ្កោលទោសចំពោះការវាយប្រហាររបស់អាម៉េរិកលើប្រទេសវេណេស៊ុយអេឡា និងបានលើកឡើងថា ស្ថិតក្នុងស្ថានភាពបច្ចុប្បន្ននេះ រឿងសំខាន់ដែលត្រូវធ្វើ គឺទប់ស្កាត់ការកើនឡើងនៃភាពតានតឹង និងស្វែងរកដំណោះស្រាយតាមរយៈការសន្ទនា។ មិនខុសគ្នានោះទេ អ៊ីរ៉ង់ក៏បានផ្កោលទោសចំពោះទង្វើរបស់អាម៉េរិកផងដែរ និងបានចាត់ទុកការវាយប្រហារនេះថា ជាការរំលោភបំពានយ៉ាងធ្ងន់ធ្ងរលើអធិបតេយ្យភាពរបស់វេណេស៊ុយអេឡា និងទាមទារឱ្យក្រុមប្រឹក្សាសន្តិសុខអង្គការសហប្រជាជាតិចេញសេចក្ដីថ្លែងការណ៍ឱ្យបញ្ឈប់ការឈ្លានពានខុសច្បាប់នេះជាបន្ទាន់ និងនាំខ្លួនអ្នកដែលបង្កហេតុការណ៍នេះមកកាត់ទោស។

ជាមួយគ្នានេះ ប្រទេសចិន ដែលមានសេដ្ឋកិច្ចធំបំផុតទី២នៅលើពិភពលោកបានថ្កោលទោសសហរដ្ឋអាម៉េរិកចំពោះការប្រើកម្លាំងយោធាវាយឆ្មក់ចូលចាប់ខ្លួនមេដឹកនាំវេណេស៊ុយអេឡា និងទាមទារឱ្យបញ្ឈប់ជាបន្ទាន់ចំពោះការរំលោភដែនអធិបតេយ្យ និងសន្តិសុខរបស់ប្រទេសដទៃ។ ចំណែកប្រទេសអាល្លឺម៉ង់ ដែលជាបងធំនៅសហភាពអឺរ៉ុបបានអះអាងថា ខ្លួនកំពុងតាមដានស្ថានភាពនៅក្នុងប្រទេសវេណេស៊ុយអេឡា យ៉ាងយកចិត្តទុកដាក់ និងព្រួយបារម្ភយ៉ាងខ្លាំង ហើយថា ក្រុមការងារនឹងជួបប្រជុំគ្នានៅពេលឆាប់ៗនេះ ដើម្បីពិភាក្សាបន្ថែមទៀតអំពីស្ថានការណ៍ដ៏តានតឹងនេះ។

ស្រដៀងគ្នានេះ រដ្ឋមន្ត្រីការបរទេសអ៊ីតាលីលោក អង់តូនីញ៉ូ តាចានី (António Tajani) បានអះអាងថា ប្រទេសអ៊ីតាលីកំពុងតាមដានយ៉ាងដិតដល់ពីការវិវត្តថ្មីៗនៅក្នុងប្រទេសវេណេស៊ុយអេឡា ជាពិសេសសហគមន៍អ៊ីតាលីនៅក្នុងវេណេស៊ុយអេឡា ដែលមានសមាជិកប្រមាណ១៦ម៉ឹននាក់។ ចំណែកប្រទេសអេស្ប៉ាញឯណោះវិញ បានអំពាវនាវឱ្យមានការបន្ធូរបន្ថយភាពតានតឹង អត់ធ្មត់ និងគោរពច្បាប់អន្តរជាតិនៅក្នុងប្រទេសវេណេស៊ុយអេឡាឡើងវិញ និងប្រកាសស្ម័គ្រចិត្តធ្វើជាអ្នកសម្របសម្រួល ដើម្បីជួយស្វែងរកដំណោះស្រាយដោយសន្តិវិធីទៀតផង។

ជាមួយគ្នានេះ អគ្គលេខាធិការអង្គការសហប្រជាជាតិ(UN)លោក អាន់តូនីញ៉ូ ហ្គោតេរ៉េស ក៏បានចេញប្រតិកម្ម និងបង្ហាញការព្រួយបារម្ភចំពោះការវាយប្រហាររបស់យោធាអាម៉េរិកលើប្រទេសវេណេស៊ុយអេឡារហូតឈានដល់ការចាប់ខ្លួនមេដឹកនាំប្រទេសនេះរួមទាំងភរិយាផងដែរ។ ទន្ទឹមនឹងនេះ មេ UN រូបនេះចាត់ទុកទង្វើរបស់លោក ត្រាំ ជាគំរូដ៏អាក្រក់បំផុតមួយ។

ក្រៅពីបណ្តាប្រទេសទាំងនេះ ក៏មានប្រទេសជាច្រើនទៀតផងដែរ ដែលបានចេញមកប្រតិកម្មចំពោះការបើកប្រតិបត្តិការយោធារបស់អាម៉េរិកមកលើប្រទេសវេណេស៊ុយអេឡា និងស្នើឱ្យបន្ធូរបន្ថយស្ថានការណ៍ និងងាកមកគោរពច្បាប់អន្តរជាតិ និងសន្ធិសញ្ញាអង្គការសហប្រជាជាតិ៕

អត្ថបទ សួន ឡង់ទី, រូបភាពឯកសារ