ការប្រកួតប្រជែងតំណែងនាយករដ្ឋមន្ត្រីអង់គ្លេសបានចាប់ផ្ដើមធ្វើឡើងកាលពីសប្តាហ៍មុននៅពេលលោក ចនសុន អាយុ ៥៨ ឆ្នាំត្រូវបានបង្ខំឱ្យចុះចេញពីតំណែងបន្ទាប់ពីជួររដ្ឋាភិបាលអង់គ្លេសមានភាពច្របូកច្របល់យ៉ាងខ្លាំង ក្រោយមានរដ្ឋមន្ត្រី និងមន្ត្រីសំខាន់ៗជាង ៥០ នាក់ក្នុងជួររដ្ឋាភិបាលរបស់លោក ចនសុនបានលាលែងចេញពីតំណែង ដើម្បីប្រឆាំងនឹងការដឹកនាំរបស់លោកចនសុន ដែលជានាយករដ្ឋមន្ត្រីមានរឿងអាស្រូវជាច្រើន។
ការតែងតាំងបេក្ខជននឹងត្រូវបើក និងបិទជាផ្លូវការនៅត្រឹមថ្ងៃអង្គារនេះ ហើយនាយករដ្ឋមន្ត្រីថ្មីនឹងត្រូវជ្រើសតាំងនៅពេលសមាជិកសភាត្រលប់មកពីការឈប់សម្រាករដូវក្តៅនៅថ្ងៃទី០៥ ខែកញ្ញា។ នេះបើតាមការបញ្ជាក់របស់លោក Graham Brady ប្រធានគណៈកម្មាធិការរៀបចំការបោះឆ្នោតក្នុងសភាបានប្រាប់អ្នកយកព័ត៌មាន។
គណៈកម្មាធិការរៀបចំការបោះឆ្នោតនេះនឹងសម្រិតសម្រាំងឈ្មោះបេក្ខជន ដែលបានចូលរួមការប្រកួតប្រជែងតំណែងនេះឱ្យនៅសល់ត្រឹមតែ២នាក់ តាមរយៈការបោះឆ្នោតជាបន្តបន្ទាប់ដោយនឹងត្រូវជម្រុះចោលបេក្ខជន ដែលមិនបំពេញការងារបានត្រឹមត្រូវតាមជុំនីមួយៗរហូតទាល់តែសមាជិកបក្សនេះជ្រើសរើសបានអ្នកឈ្នះ ដើម្បីធ្វើជានាយករដ្ឋមន្ត្រីថ្មី។
ដោយសារមានការអំពាវនាវឱ្យលោក ចនសុន ចាកចេញពីការិយាល័យរដ្ឋាភិបាលនៅផ្លូវ Downing Street ឱ្យបានឆាប់តាមដែលអាចធ្វើទៅបាន និងដើម្បីជៀសវាងកុំឱ្យដំណើការនេះអូសបន្លាយពេលចូលដល់ថ្ងៃឈប់សម្រាករដូវក្តៅរបស់សមាជិកសភានោះ ដូច្នេះហើយចំនួនបេក្ខជនទំនងជានឹងត្រូវកាត់បន្ថយឱ្យបានយ៉ាងឆាប់រហ័សមកត្រឹមតែពីរនាក់ប៉ុណ្ណោះ។
អត្ថបទគួរអាន
លេខាប្រតិបត្តិរួមនៃគណៈកម្មាធិការរៀបចំការបោះឆ្នោតនេះគឺលោក Bob Blackman បាននិយាយថា ពួកគេបានប្តេជ្ញាចិត្តថានឹងសម្រេចកិច្ចការងាររៀបចំនេះឱ្យបាននៅត្រឹមថ្ងៃទី២១ ខែកក្កដា។ លោក ប្រេដឌី បាននិយាយថា ការបោះឆ្នោតលើកដំបូងនឹងធ្វើនៅថ្ងៃពុធស្អែកនេះ ហើយការបោះឆ្នោតលើកទី២នឹងធ្វើនៅថ្ងៃព្រហស្បតិ៍។
ដើម្បីពន្លឿនដំណើរការនេះបេក្ខជនត្រូវមានសមាជិកសភាយ៉ាងតិច ២០ នាក់ដើម្បីគាំទ្រពួកគេក្នុងការចូលរួមប្រកួតប្រជែងនេះ ហើយប្រសិនបើបេក្ខជនណា ដែលមិនទទួលបានការគាំទ្រពីសមាជិកសភាចំនួន ៣០ នាក់ក្នុងការបោះឆ្នោតដំបូងនោះទេ ពួកគេនឹងត្រូវលុបចោលពីការប្រកួតប្រជែងនេះ។
ក្នុងចំណោមអ្នកចូលរួមប្រកួតប្រជែងទាំងនោះរួមមានលោក Rishi Sunak អតីតរដ្ឋមន្ត្រីហិរញ្ញវត្ថុ លោក Sajid Javid អតីតរដ្ឋមន្ត្រីសុខាភិបាល រដ្ឋមន្ត្រីការបរទេសលោកស្រី Liz Truss លោក Nadhim Zahawi រដ្ឋមន្ត្រីហិរញ្ញវត្ថុ និងរដ្ឋមន្ត្រីក្រសួងមហាផ្ទៃលោកស្រី Priti Patel ផងដែរ។
ប៉ុន្តែការស្ទង់មតិរបស់សមាជិកមូលដ្ឋានដោយគេហទំព័រ ConservativeHome ដ៏មានឥទ្ធិពលដែលបានចេញផ្សាយកាលពីថ្ងៃច័ន្ទបានបង្ហាញពីការគាំទ្រយ៉ាងខ្លាំងចំពោះបេក្ខជនដែលមិនសូវល្បីឈ្មោះគឹអតីតរដ្ឋមន្ត្រីការពារជាតិលោកស្រី Penny Mordaunt និងលោកស្រី Kemi Badenoch ដែលជាសមាជិកបក្សអរក្សនិយមដែលអ្នកទាំង២ក៏បានចូលរួមប្រកួតប្រជែងផងដែរ៕
អត្ថបទ៖ សុខ ជា
