លោក ស៊ី ចាត់ទុកបញ្ហាអំពើពុករលួយជាការគំរាមកំហែងដ៏ធំបំផុតរបស់បក្សកុម្មុយនីស្តចិន

កាលពីឆ្នាំមុនប្រទេសចិន បានរង្គោះរង្គើយ៉ាងខ្លាំងដោយការស៊ើបអង្កេតអំពើពុករលួយទៅលើបុគ្គលដែលមានឋានៈខ្ពស់ៗ នៅក្នុងជួរបក្សកុម្មុយនីស្តចិន ចាប់ពីអភិបាលរងធនាគារកណ្តាលរហូតដល់អតីតប្រធានក្រុមហ៊ុនប្រេង និងឧស្ម័នដ៏ធំបំផុតរបស់ចិន ព្រមទាំងឧត្តមនាវីដ៏កំពូលរបស់ចិនមួយរូប គឺលោក ម្យ៉ាវ វ៉េ (Miao Hua) ផងដែរ។

ប្រធានាធិបតីចិន លោក ស៊ី បានថ្លែងក្នុងសមាជបក្សកុម្មុយនីស្តចិន កាលពីពេលថ្មីៗថា អំពើពុករលួយមិនត្រឹមតែកំពុងរីករាលដាលក្នុងប្រទេសចិន ប៉ុណ្ណោះទេ ថែមទាំងកំពុងកើនឡើងទៀតផង ដោយលោក ស៊ី បានសង្កត់ធ្ងន់ថា អំពើពុករលួយជាការគំរាមកំហែងដ៏ធំបំផុតចំពោះបក្សកុម្មុយនីស្តចិន ដែលកំពុងកាន់អំណាច។

ការព្រមានដោយចំហនេះ គឺជាសារមួយដែលទាមទារឱ្យគណបក្សកំពុងកាន់អំណាចនេះត្រូវតែដោះស្រាយបញ្ហាបានអូសបន្លាយពេលយូរមកហើយមួយនេះ ដែលពេលនេះវាកំពុងចាក់ឫសយ៉ាងរឹងមាំនៅតាមផ្នែកជាច្រើននៅក្នុងសង្គមចិន។ លោក ស៊ី ក៏បានសង្កត់ធ្ងន់អំពីអភិបាលកិច្ចរបស់បក្សជាមួយស្មារតី​នៃការធ្វើកំណែទម្រង់ឱ្យបានខ្លាំងក្លា ដើម្បីប្រយុទ្ធប្រឆាំងនឹងអំពើពុករលួយផងដែរ។

លោក ស៊ី បានអះអាងថា ទោះបីជាកន្លងមក វាមានបញ្ហាប្រឈមសំខាន់ៗក្នុងការប្រយុទ្ធប្រឆាំងនឹងអំពើពុករលួយក៏ដោយ ក៏គណបក្សរបស់លោកនៅតែប្តេជ្ញាចិត្តបន្តស៊ើបអង្កេត ​និងដោះស្រាយរាល់ករណីពុករលួយទាំងអស់ ដើម្បីរក្សាភាពស្មោះត្រង់របស់មន្ត្រីក្រោមឱវាទ។ តែយ៉ាងណាលោកចាត់ទុក ការប្រយុទ្ធប្រឆាំងនឹងអំពើពុករលួយជាបញ្ហាប្រឈមដ៏ធ្ងន់ធ្ងរ និងស្មុគស្មាញមួយ ដូច្នេះលោកជំរុញឱ្យមានការពង្រឹងលើការដោះស្រាយ៕

អត្ថបទ៖ សុខ មង្គល