បញ្ហា Covid-19 ជំរុញឲ្យ សម្តេច ហ៊ុន សែន សុខចិត្តធ្វើការអត់យកប្រាក់ខែ ៧ខែ

សម្តេច ហ៊ុន សែននាយករដ្ឋមន្ត្រីនៃកម្ពុជា នៅថ្ងៃទី ០១ ខែមេសានេះ បានផ្ញើលិខិតមួយទៅកាន់ រដ្ឋមន្ត្រីក្រសួងសេដ្ឋកិច្ច និងហិរញ្ញវវត្ថុ និងរដ្ឋមន្ត្រីក្រសួងសុខាភិបាល ដោយបញ្ជាក់ថា សម្តេច ស្ម័គ្រចិត្តជូនប្រាក់បៀវត្សរ៍នាយករដ្ឋមន្ត្រី ចំនួន ៧ខែ ទៅកាន់គណៈកម្មាធិការជាតិប្រយុទ្ធនឹងជំងឺកូវីដ១៩ ស្របពេលដែលស្វានភាពនៃជំងឺនេះ នៅកម្ពុជា មិនទាន់មានសញ្ញានៃការថមថយណាមួយនៅឡើយទេ។

សម្តេច ហ៊ុន សែន ៖ខ្ញុំបានបញ្ជាទិញម៉ាស ៣លានម៉ាស និងសម្ភារៈការពារមេរោគចំនួន៥ពាន់សម្រាប់បន្ថែម

នៅក្នុងលិខិតនេះ សម្តេច ហ៊ុន សែន បានរៀបរាប់ប្រាប់ថា «ដោយសារស្ថានភាពនៃការវិវត្តន៍របស់ជំងឺ កូវីដ១៩ (Covid-19) នៅក្នុងព្រះរាជាណាចក្រកម្ពុជា នៅមិនទាន់បង្ហាញសញ្ញានៃការថមថយណាមួយនោះ ខ្ញុំសូមសំដែងនូវសមានចិត្តតាមរយៈការស្ម័គ្រចិត្តជូនទៅ គណៈកម្មាធិការជាតិប្រយុទ្ធនឹងជំងឺកូវីដ១៩ នូវប្រាក់បៀវត្សរ៍របស់ខ្ញុំជានាយករដ្ឋមន្ត្រី ចំនួនស្មើនឹង ៧ខែ ដោយរាប់ចាប់តាំងពីខែមីនា រហូតដល់ខែកញ្ញា ឆ្នាំ២០២០។»

សម្ដេច ក៏បានស្នើឲ្យរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ចាត់ចែងធ្វើការបង្វែរ ប្រាក់បៀវត្សរបស់លោក បញ្ចូលទៅក្នុងគណនីរបស់គណៈកម្មាធិការជាតិប្រយុទ្ធនឹងជំងឺកូវីដ១៩ តាមការគួរ។