របាយការណ៍ដែលរដ្ឋាភិបាលអូស្ត្រាលី ធ្វើការសិក្សាក្នុងឆ្នាំ២០២១អំពីប៉ះពាល់លើមនុស្សច្រើនជំនាន់ បានបង្ហាញឲ្យឃើញថា ឱនភាពថវិកាជាតិនៅតែបន្តកើតមានយ៉ាងហោចណាស់រហូតដល់ ៤០ឆ្នាំទៀត។
របាយការណ៍ដដែលបានបន្តថា ទោះបីជាសេដ្ឋកិច្ចអូស្ត្រាលីអាចងើបឡើងវិញបានប្រសើរជាងការរំពឹងទុកក្តី ក៏កំណើននេះនឹងមិនអាចយកមកទូទាត់ ជាមួយនឹងផលប៉ះពាល់ដែលបង្កឡើងដោយកូវីដ១៩បានដែរ ពោលកញ្ចប់ថវិកាប្រចាំឆ្នាំ នឹងនៅតែទទួលរងការប៉ះទង្គិច សម្រាប់រយៈពេលច្រើនឆ្នាំទៅមុខទៀត។ ប៉ះទង្គិចគឺនៅត្រង់ថា គេត្រូវប្រើប្រាស់ថវិកាដើម្បីស្តារវិស័យដែលរងគ្រោះ ហើយគេមិនអាចប្រើប្រាស់ថវិកា ដើម្បីអភិវឌ្ឍវិស័យផ្សេងៗទៀតបាននោះទេ។
ជាមួយគ្នានេះ អត្រាកំណើនប្រជាជនក៏ត្រូវបានគេព្យាករថា នឹងមានចំនួនសរុបត្រឹមតែជាង ៣៨លាននាក់ប៉ុណ្ណោះគិតត្រឹមឆ្នាំ២០៦១ខាងមុខនេះ ធ្លាក់ចុះជាង ២លាននាក់ធៀបនឹងការព្យាករកាលពីឆ្នាំ២០១៥ ដែលបានព្យាករថាមានដល់ជាង ៤០លាននាក់ត្រឹមឆ្នាំ ២០៥៦។
អត្ថបទគួរអាន
ប្រការនេះបានសបញ្ជាក់ឲ្យឃើញថា ទំហំសេដ្ឋកិច្ចអូស្ត្រាលីនឹងរួមតូចជាងមុន ស្របពេលដែលចំនួនប្រជាជនក៏មានតិចក្នុងក្របខណ្ឌ ៤០ឆ្នាំទៀត ដែលធ្វើឲ្យអូស្ត្រាលីបាត់បង់កម្លាំងពលកម្មកាន់តែច្រើន។ បច្ចុប្បន្ន អូស្ត្រាលីមានប្រជាជនសរុបប្រមាណ ២៦លាននាក់។
គួរជម្រាបដែរថា ក្រោយបន្ធូរបន្ថយការរឹតត្បិតមិនបានប៉ុន្មានផង អូស្ត្រាលីទើបបានប្រកាសដាក់ក្រុងស៊ីដនី ក្នុងការបិទខ្ទប់ជាថ្មី ខណៈដែលតំបន់ផ្សេងៗទៀតត្រូវបង្កើនការរឹតបន្ដឹងវិធានការសុវត្ថិភាពឡើងវិញ បន្ទាប់ពីករណីឆ្លងកូវីដ១៩បានហក់ឡើងជាបន្តបន្ទាប់ ព្រមទាំងបាន រកឃើញនូវមេរោគបំប្លែងថ្មីឌែលតាផងដែរ។
យ៉ាងណាមិញការបិទខ្ទប់ជាញឹកញាប់របស់អូស្ត្រាលី ហាក់បង្ហាញពីប្រសិទ្ធភាពខ្ពស់ក្នុងការទប់ទល់នឹងកូវីដ១៩ ជាក់ស្តែង មកទល់នឹងពេលនេះ អូស្ត្រាលីមានករណីឆ្លងសរុបតែជាង ៣ម៉ឺនករណីប៉ុណ្ណោះ ក្នុងនោះអ្នកស្លាប់សរុបមានជាង ៩០០នាក់៕
None
