អូស្រ្តាលីនឹងឈានទៅមានកិច្ចព្រមព្រៀងពាណិជ្ជកម្មសេរីជាមួយអង់គ្លេសក្នុងពេលខាងមុខ

រដ្ឋមន្រ្តីក្រសួងពាណិជ្ជកម្មអូស្ត្រាលីលោក ដាន តេហាន (Dan Tehan) បាននិយាយថា នាយករដ្ឋមន្ត្រីអង់គ្លេស លោក ប៉ូរីស ចនស៊ុន (Boris Johnson) និងសមភាគីអូស្ត្រាលីលោក ស្កុត ម៉ូរីសុន (Scott Morrison) បានឈានដល់ការព្រមព្រៀងគ្នា ស្តីពីកិច្ចព្រមព្រៀងពាណិជ្ជកម្មសេរីនេះក្នុងអំឡុងពេលលោកទាំងពីរបានជួបពិភាក្សាគ្នានៅទីក្រុងឡុងដ៍ ចក្រភពអង់គ្លេស កាលពីសប្តាហ៍មុន។

ស្របពេលដែលកិច្ចព្រមព្រៀងជាមួយប្រទេសជាច្រើនកន្លងមកត្រូវបានធ្វើឡើងតាមរយៈសហភាពអឺរ៉ុប ការចរចារកិច្ចព្រមព្រៀងពាណិជ្ជកម្មសេរីជាមួយអូស្រ្តាលីនេះ ត្រូវបានគេដឹងថាជាកិច្ចព្រមព្រៀងដំបូងបង្អស់របស់អង់គ្លេសដែលបានធ្វើការចរចា ក្រោយពេលចែកផ្លូវពីសហភាពអឺរ៉ុបកាលពីខែកុម្ភៈឆ្នាំ ២០២០។ 

ទោះយ៉ាងណា រដ្ឋមន្រ្តីក្រសួងកសិកម្មអូស្រ្តាលីលោក ដេវីដ លីថលប្រោត (David Littleproud) បានហៅកិច្ចព្រមព្រៀងនេះថា ជាកិច្ចព្រមព្រៀងមានត្រឹមគោលការណ៍នៅឡើយ។

លោកបានបន្ថែមថា អូស្រ្តាលីកំពុងធ្វើការយ៉ាងស្វាហាប់ដើម្បីធ្វើឱ្យប្រាកដថាសេចក្តីប្រកាសព័ត៌មានមួយអាចត្រូវបានធ្វើឡើងឆាប់ៗ ដូច្នេះប្រជាជន និងជាពិសេសកសិករអូស្រ្តាលីនឹងបានឃើញយ៉ាងច្បាស់នូវផលប្រយោជន៍ដែលមាននៅក្នុងកិច្ចព្រមព្រៀងនេះ។

សូមបញ្ជាក់ថា អង់គ្លេសជាដៃគូពាណិជ្ជកម្មលំដាប់ទី៥ របស់អូស្រ្តាលីដោយគិតជាទំហំទឹកប្រាក់ប្រមាណជាង ៣៦ពាន់លានដុល្លារអូស្រ្តាលី ឬស្មើនឹងជាង ២៨ពាន់លានដុល្លារអាមេរិក ក្នុងមួយឆ្នាំៗ។ ភាគីអូស្រ្តាលី បានបង្ហាញសុទិដ្ឋិនិយមថា ទំហំពាណិជ្ជកម្មរវាងប្រទេសទាំងពីរប្រាកដជាកើនឡើងថែមទៀត ក្រោយវត្តមានរបស់កិច្ចព្រមព្រៀងខាងលើ៕