ពាក់ព័ន្ធនឹងវិស័យកសិកម្មនេះដែរ លោកឧកញ៉ា ចេង ខេង បានឲ្យដឹងថា កន្លងមកថ្មីៗនេះ លោកបានបោះជំហាន ទៅក្នុងវិស័យកសិកម្មនេះ ដោយសារតែកម្ពុជាមានអំណោយផលយ៉ាងច្រើនសម្រាប់ការអភិវឌ្ឍ។ លោកឧកញ៉ា បានបញ្ជាក់ថា «ខ្ញុំគិតថា វាជាឱកាសល្អមែនទែននៅក្នុងប្រទេសរបស់យើង ដោយសារតែរាជរដ្ឋាភិបាលរបស់យើងជំរុញ និងគាំទ្រទៅលើវិស័យកសិកម្មនៅក្នុងប្រទេសយើងដែរ ជាពិសេសនៅក្នុងអំឡុងពេលកូវីដ-១៩ ដោយបានកាត់បន្ថយការនាំចូលផលិតផលកសិកម្ម ដូចនេះវាជាចំណុចមួយដែលល្អសម្រាប់អ្នកចង់វិនិយោគលើវិស័យនេះ»។
ទោះជាយ៉ាងណាក៏ដោយ លោកឧកញ៉ាថា តាមបទពិសោធន៍ដែលលោកធ្លាប់ទៅដល់ប្រទេសអ៊ីស្រាអែលកាលនាពេលកន្លងមកនេះ លោកពិតជាស្ញប់ស្ញែងនូវបច្ចេកទេស និងបច្ចេកវិទ្យា ដែលស្តេចប្រទេសកសិកម្មមួយនេះ បានធ្វើណាស់ ដោយលោកថា កម្ពុជាអាចយកជាគំរូបាន។
អត្ថបទគួរអាន
លោកឧកញ៉ា ចេង ខេង បន្ថែមថា « យើងត្រូវដឹងថា នៅលើពិភពលោក គេមិនមែនធ្វើកសិកម្មដូចជំនាន់បុរាណជំនាន់មុនទៀតទេ គេគឺធ្វើរបៀបឧស្សាហកម្ម បានន័យថា កសិកម្មរបៀបទំនើប របៀបដែលមានបច្ចេកវិទ្យាទាន់សម័យ ដែលមានប្រព័ន្ធបច្ចេកវិទ្យាស្រោចស្រព មានអ្នកជំនាញពិតប្រាកដ ហ្នឹងបានគេហៅថាកសិកម្មមួយដែលអាចទ្រទ្រង់ប្រទេសជាតិបាន តែបើធ្វើដូចពីមុនយកកម្លាំងមនុស្សទៅធ្វើទាំងស្រុង គឺទៅមិនរួចទេ ហើយបើសិនជាយើងធ្វើវិស័យហ្នឹងឲ្យទំនើប មានអ្នកបច្ចេកទេសពិតប្រាកដ ជាពិសេសយកប្រទេសដែលជាមហាអំណាចកសិកម្ម ធ្វើជាគំរូ នោះប្រទេសយើងនឹងរុងរឿងទៅលើវិស័យនេះ »។
ដោយមើលឃើញធនធានដីកសិកម្មដែលកម្ពុជាប្រើប្រាស់មិនទាន់អស់សក្តានុពល អគ្គនាយកក្រុមហ៊ុនអចលទ្រព្យស៊ីភីអិលរូបនេះ បានចុះទៅមើលការអភិវឌ្ឍវិស័យកសិកម្មច្រើនកន្លែង ព្រមទាំងបានពិភាក្សាជាមួយអ្នកជំនាញមួយចំនួន ដើម្បីធ្វើយ៉ាងណា អាចប្រើប្រាស់អចលនវត្ថុនៅក្នុងស្រុកឲ្យមានប្រសិទ្ធភាព៕
None
