លោក សុខ ចាន់ នាយកទំនាក់ទំនងសាធារណៈនៃសមាគមធនាគារនៅកម្ពុជា បានគូសបញ្ជាក់ថា ទោះបីបច្ចុប្បន្នបញ្ហាជម្លោះព្រំដែនរវាងប្រទេសកម្ពុជា និងថៃ កំពុងមានភាពតានតឹងយ៉ាងណាក្តី ប៉ុន្តែបញ្ហានេះមិនបានបង្កផលប៉ះពាល់ ឬជះឥទ្ធិពលអវិជ្ជមានណាមួយដល់ប្រតិបត្តិការទូទាត់ឆ្លងដែនរវាងប្រទេសទាំងពីរនោះទេ ពោលគឺមកទល់ពេលនេះសកម្មភាពប្រតិបត្តិការនៅតែដំណើរធម្មតា។ ពាក់ព័ន្ធការស្នើឱ្យសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ជួយសម្រាលបន្ទុកហិរញ្ញវត្ថុដល់ពលករខ្មែរដែលត្រលប់មកពីថៃ លោក សុខ ចាន់ បានឱ្យដឹងថា គិតមកទល់ពេលនេះ នៅតាមបណ្តាគ្រឹះស្ថានធនាគារ និងហិរញ្ញវត្ថុនានា នៅទូទាំងប្រទេស ពុំទាន់ទទួលបានការស្នើសុំរៀបចំឥណទានឡើងវិញពីសំណាក់ប្រជាពលរដ្ឋដែលពលករខ្មែរ ទើបត្រឡប់មកពីប្រទេសថៃ នៅឡើយទេ។
ជាមួយគ្នានេះ លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា បានគូសបញ្ជាក់ថា បច្ចុប្បន្នគ្រឹះស្ថានធនាគារ អេស៊ីលីដា នៅក្នុងខេត្តទាំង៧ជាប់ព្រំដែនថៃ នៅដំណើរការជាធម្មតា ទោះបីបញ្ហាជម្លោះព្រំដែនរវាងប្រទេសកម្ពុជា-ថៃ កំពុងមានភាពតានតឹងក្តី។ ម្យ៉ាងទៀតចំពោះប្រតិបត្តិការទូទាត់ឆ្លងដែន ដែលជាឧបករណ៍យ៉ាងសំខាន់ក្នុងការប្រើប្រាស់ប្រចាំថ្ងៃ ការធ្វើពាណិជ្ជ និងទេសចរណ៍រវាងប្រទេសទាំងពីរនោះ ក៏បានដំណើរការជាប្រក្រតីផងដែរ មកទល់ពេលនេះ។
សូមជម្រាបថា កាលពីពេលថ្មីៗនេះ សមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា បានប្រកាសគាំទ្រយ៉ាងពេញទំហឹងចំពោះការអំពាវនាវរបស់ប្រមុខរាជរដ្ឋាភិបាលកម្ពុជា ដែលស្នើឱ្យសមាគមទាំងពីរ ពិនិត្យលទ្ធភាពក្នុងការជួយសម្រាលបន្ទុកហិរញ្ញវត្ថុសម្រាប់ពលករខ្មែរដែលត្រលប់មកពីប្រទេសថៃ វិញ ចំពោះអ្នកដែលមានជាប់ជំពាក់កម្ចីជាមួយធនាគារ ឬគ្រឹះស្ថានមីក្រូហិរញ្ញវត្ថុ ទៅតាមលទ្ធភាព ឬក្នុងរយៈពេលកំណត់ណាមួយដែលអាចធ្វើទៅបាន៕
