ផ្សារមូលបត្រកម្ពុជា នៅដើមខែសីហានេះ បានសម្រេចអនុញ្ញាតជាគោលការណ៍លើពាក្យស្នើសុំពិនិត្យលទ្ធភាពចុះបញ្ជីលក់មូលបត្រកម្មសិទ្ធិរបស់ក្រុមហ៊ុនថ្មីមួយទៀត ឈ្មោះថា ជេអេស លែន ភីអិលស៊ី ដែលជាក្រុមហ៊ុនទី២ ទទួលបានការឯកភាពជាគោលការណ៍ លើសំណើចុះបញ្ជីលក់មូលបត្រកម្មសិទ្ធិនៅទីផ្សារកំណើនរបស់ផ្សារមូលបត្រកម្ពុជា បន្ទាប់ពីក្រុមហ៊ុន ឌី ប៊ី ឌី អ៊ិនជីនារីង ដែលថ្មីៗទើបតែបានធ្វើកម្មវិធីរ៉ូដសូរបស់ខ្លួនរួចហើយ និងគ្រោងចូលគោះជួងបោះផ្សាយលក់ភាគហ៊ុនរបស់ខ្លួនជាផ្លូវការនៅពេលឆាប់ៗនេះ។
ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុកជាអគ្គនាយកក្រុមហ៊ុនផ្សារមូលបត្រកម្ពុជា បានឲ្យដឹងថា ក្រុមហ៊ុន ជេអេស លែន ភីអិលស៊ី ជាក្រុមហ៊ុនមានសកម្មភាពអាជីវកម្មចម្បងអភិវឌ្ឍន៍គម្រោងខុនដូ ហើយបន្ទាប់ពីទទួលបានគោលការអនុញ្ញាតពីផ្សារមូលបត្រកម្ពុជាហើយ ក្រុមហ៊ុននេះ នឹងត្រូវបន្ដស្នើសុំគោលការណ៍ពីនិយ័តករមូលបត្រកម្ពុជាបន្ដទៀត ដើម្បីអាចអនុវត្តនីតិវិធីបន្ដ មុនឈានទៅបោះផ្សាយលក់ភាគហ៊ុននៅក្នុងផ្សារមូលបត្រកម្ពុជាដែលរំពឹងថានឹងអាចធ្វើឡើងនៅក្នុងឆ្នាំនេះ។
អត្ថបទទាក់ទង
ឯកឧត្តម ហុង សុហួរ បានគូសបញ្ជាក់ពីស្ថានភាពទីផ្សារភាគហ៊ុននៅកម្ពុជាថា នៅតែមានកំណើនខ្ពស់ក្នុងឆ្នាំ២០២១នេះ បើធៀបនឹងឆ្នាំ២០២០ ទោះបីជាមានកូវីដ-១៩រីករាតត្បាតក៏ដោយ។ ក្នុងនោះ ទាំងសកម្មភាពជួញ, ទីផ្សារ និងការបើកគណនីជួញដូរ គឺមានការកើនឡើងគួរឲ្យកត់សម្គាល់ ជាក់ស្ដែង អ្នកមកបើកគណនីជួញដូរបានកើនឡើងខ្លាំងនៅ ២ខែចុងក្រោយនេះ ពោលគឺកើនពីជាង២០០ ទៅ៣០០នាក់ក្នុងមួយខែ មកដល់ជាង៥០០នាក់ក្នុងមួយខែ។
បើតាមក្ដីរំពឹងរបស់អគ្គនាយកផ្សារមូលបត្រកម្ពុជា នៅឆ្នាំ ២០២១ ផ្សារមូលបត្រកម្ពុជា រំពឹងថា នឹងទទួលបានក្រុមហ៊ុនចុះបញ្ជីចំនួន ៥ ទៅ៦ក្រុមហ៊ុនបន្ថែមទៀត ដែលមានប្រហាក់ប្រហែលនឹងឆ្នាំ២០២០ដែរ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
