ជុំវិញទៅនឹងការបោះផ្សាយលក់មូលបត្ររដ្ឋនេះដែរ ថ្នាក់ដឹកនាំជាន់ខ្ពស់ផ្សារមូលបត្រកម្ពុជាបានមើលឃើញថា ទំហំបោះផ្សាយដំបូង៣០០លានដុល្លារនេះ គឺជាការសាកល្បងមើលសមត្ថភាពទីផ្សារមូលធនក្នុងស្រុក រដ្ឋាភិបាលអាចនឹងបង្កើនទំហំបោះផ្សាយថែមទៀត អាស្រ័យតាមស្ថានភាពទីផ្សារជាក់ស្ដែងនាឆ្នាំក្រោយៗ។ ជាមួយគ្នានេះ ក្រោមការដឹកនាំរបស់ក្រសួងសេដ្ឋកិច្ច និងហិរញ្ញវត្ថុ និងស្ថាប័នពាក់ព័ន្ធផ្សេងទៀត ផ្សារមូលបត្រកម្ពុជា ប្តេជ្ញាជួយគាំទ្ររាជរដ្ឋាភិបាលសម្រេចឲ្យបានគោលដៅប្រមូលទុនលើកដំបូងពីទីផ្សារមូលបត្រនេះឲ្យខាងតែបាន។
ឯកឧត្តម ហុង សុហួរ អគ្គនាយកផ្សារមូលបត្រកម្ពុជា បានអះអាងថា ការបោះផ្សាយលក់មូលបត្របំណុលរដ្ឋរបស់រាជរដ្ឋាភិបាលកម្ពុជាទំហំ៣០០លានដុល្លារ ដែលគ្រោងនឹងចាប់ផ្ដើមបោះផ្សាយនៅឆ្នាំក្រោយនេះ គឺជាការសាកល្បងមើលពីសមត្ថភាពទីផ្សារមូលធនក្នុងក្នុងស្រុក ហើយទំហំនៃការបោះផ្សាយនេះ បើធៀបនឹងបណ្ដាប្រទេសនៅអាស៊ាន គឺនៅមានទំហំមួយតូចនៅឡើយទេ ជាក់ស្ដែង នៅឆ្នាំ២០២០ ប្រទេសមួយចំនួននៅអាស៊ាន បានធ្វើការបោះផ្សាយលក់មូលបត្ររដ្ឋនេះ រហូតដល់ទំហំ ២០០ពាន់លានដុល្លារាមេរិកឯណោះក្នុងមួយឆ្នាំ។
អត្ថបទគួរអាន
បើតាមឯកឧត្តម ហុង សុហួរ បច្ចុប្បន្ន ផ្សារមូលបត្រកម្ពុជាកំពុងធ្វើការលើវិធានប្រតិបត្តិការ និងបទប្បញ្ញត្តិរបស់ខ្លួន ជាមួយនឹងការធ្វើតេស្ដសាកល្បងប្រព័ន្ធ ដែលពាក់ព័ន្ធនឹងមូលបត្ររដ្ឋ ហើយកំពុងធ្វើការជាមួយនឹងភាគីពាក់ព័ន្ធផ្សេងទៀតដែរ ដើម្បីជំរុញគាំទ្រដល់គោលដៅនៃការផ្សាយមូលបត្ររដ្ឋឲ្យទទួលបានជោគជ័យ។
គិតត្រឹមរយៈពេល៩ខែដំបូងនៃឆ្នាំ២០២១ ផ្សារមូលបត្រកម្ពុជាទទួលបានក្រុមហ៊ុនចុះបញ្ជីថ្មីចំនួន២ក្រុមហ៊ុន ដែលធ្វើឲ្យចំនួនក្រុមហ៊ុនចុះបញ្ជីសរុបកើនដល់ ១៥ក្រុមហ៊ុនហើយ ដែលបានប្រមូលទុនសរុបពីទីផ្សារមូលបត្រប្រមាណជាង ២៧៧លានដុល្លារ។ សម្រាប់ត្រីមាសចុងក្រោយនៃឆ្នាំ២០២១នេះ ផ្សារមូលបត្រកម្ពុជារំពឹងថា នឹងទទួលបានក្រុមហ៊ុនចុះបញ្ជី ២ ឬ៣ ទៀតដែលរាប់ទាំងភាគហ៊ុននិងសញ្ញាបណ្ណ ប្រសិនបើកិច្ចការការរៀបចំនិងការបោះផ្សាយលក់ដំណើរការរលូន។ ដោយឡែក ចំនួនគណនីជួញដូរមានចំនួនសរុប ជាង៣ម៉ឺនគណនី បានកើនឡើង ជិត១៣% និងទំហំជួញដូរជាមធ្យមប្រចាំថ្ងៃមានចំនួន ២២ម៉ឺនដុល្លារ ដែលកើនឡើងជាង ៨៦% បើប្រៀបធៀបនឹងឆ្នាំ២០២០។
អគ្គនាយកផ្សារមូលបត្រកម្ពុជាគូសបញ្ជាក់ថា សម្រាប់ឆ្នាំ២០២២ខាងមុខនេះ ផ្សារមូលបត្រកម្ពុជានឹងមានដំណើរការល្អប្រសើរជាងឆ្នាំ២០២១ ហើយរំពឹងថាទំហំជួញដូរជាមធ្យមក្នុង១ថ្ងៃ នឹងអាចឈានទៅដល់ ១លានដុល្លារប្រចាំថ្ងៃ ក្នុងអំឡុងពេល ២ឬ៣ឆ្នាំខាងមុខទៀត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
