ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានលើកឡើងថា ផ្សារគំរូព្រំដែននេះនឹងជួយបង្កើនទំហំពាណិជ្ជកម្មនៅតាមព្រំដែន និងលើកកម្ពស់ជីវភាពប្រជាជនកម្ពុជា-វៀតណាម។ លើសពីនេះ វាក៏ជាផ្នែកមួយនៃការពង្រឹងកិច្ចសហការ និងសម្រួលពាណិជ្ជកម្មនៅតាមព្រំដែននៃប្រទេសទាំងពីរ ឲ្យកាន់តែមានភាពងាយស្រួលនិងជិតប្រជាពលរដ្ឋ ជាពិសេស ឈានទៅសម្រេចឲ្យបាននូវទំហំពាណិជ្ជកម្មចំនួន ៥.០០០លានដុល្លារ តាមផែនការមេដែលបានគ្រោងទុកក្នុងពេលអនាគតរបស់រាជរដ្ឋាភិបាល។
បើមិនមានអ្វីប្រែប្រួលនោះទេ ការសាងសង់ផ្សារដារ នេះឲ្យបានរួចរាល់ជាស្ថាពរក្នុងរយៈពេល១២ខែ តាមកិច្ចសន្យាដែលក្រុមហ៊ុនវៀតណាមបានព្រមព្រៀងជាមួយនឹងរាជរដ្ឋាភិបាលកម្ពុជា។
បើតាមការអះអាងពីមន្ត្រីជាន់ខ្ពស់របស់ក្រសួងពាណិជ្ជកម្ម ផ្សារ ដារ ដែលកំពុងសាងសង់នៅក្នុងឃុំដារ ស្រុកមេមត់ ខេត្តត្បូងឃ្មុំនេះ នឹងត្រូវដាក់ឲ្យដំណើរការសម្រាប់ប្រជាពលរដ្ឋប្រទេសទាំងពីរ ក្នុងការទិញលក់ ដោះដូរទំនិញសំខាន់ៗ រវាងគ្នាទៅវិញទៅមក ពិសេស គឺផលិតផលកសិកម្មតែម្ដង។
គម្រោងសាងសង់ផ្សារគំរូជាប់ព្រំដែនកម្ពុជា-វៀតណាមមួយនេះ ត្រូវបានអនុម័តលើកដំបូងកាលពីឆ្នាំ២០១៣ ហើយត្រូវបានបន្តអនុវត្តឡើងវិញនៅឆ្នាំ២០១៦ នៅលើផ្ទែដីទំហំជិត ២ម៉ឺនម៉ែត្រការ៉េ ស្ថិតក្នុងតំបន់សេដ្ឋកិច្ចពិសេស ថារី ត្បូងឃ្មុំ ជាមួយទុនវិនិយោគសរុបប្រមាណជិត ២លានដុល្លារអាមេរិក ដែលជាជំនួយរបស់រដ្ឋាភិបាលវៀតណាម។
តើអ្នកបានអានអត្ថបទនេះ ឬនៅ?
បើតាមប្រសាសន៍របស់ឯកអគ្គរដ្ឋទូតវៀតណាម ឯកឧត្តម វ៉ូ ហ្គុងមិញ បានគូសបញ្ជាក់ដែរថា ការសាង់សង់ផ្សារដារនេះ នឹងនាំមកនូវក្តីសង្ឃឹមថ្មីសម្រាប់ប្រជាជនកម្ពុជា និងវៀតណាម ហើយនឹងក្លាយជាគំរូនៃការអភិវឌ្ឍ និងការពង្រីកកិច្ចសហការសេដ្ឋកិច្ច និងពាណិជ្ជកម្មនៅតាមព្រំដែននៃប្រទេសទាំងពីរនៅថ្ងៃអនាគត ប្រកបដោយជោគជ័យ។
ទោះយ៉ាងណាក៏ដោយ បើតាមអ្នកជំនាញសេដ្ឋកិច្ច លោក ង៉ែត ជូ ធ្លាប់បានប្រាប់ ខេមបូណូមីស ថា ការបង្កើតផ្សារគំរូជាប់ព្រំដែនវៀតណាមនេះ កម្ពុជាហាក់ទទួលបានផលចំណេញតិចជាងប្រទេសវៀតណាម។
ចំណេញតិច គឺដោយសារតែបច្ចុប្បន្ន ការនាំចេញទំនិញពីកម្ពុជាទៅវៀតណាម គឺមានតិចតួចជាងទំនិញវៀតណាមនាំចូលមកកម្ពុជា ពិសេស គឺទំនិញដែលវៀតណាមនាំចូលត្រឡប់មកវិញ គឺជាទំនិញកែច្នៃរួចដែលមានតម្លៃថ្លៃ ដូចជា ផលិតចំណីអាហារ និងសម្ភារៈប្រើប្រាស់ជាដើម ខណៈដែលកម្ពុជានាំទៅវៀតណាមវិញ គឺមានភាគច្រើនតែកសិផលប៉ុណ្ណោះ។
សូមជម្រាបដែរថា ទំហំពាណិជ្ជកម្មទ្វេភាគីរវាងកម្ពុជា-វៀតណាម មានការកើនឡើងគួរឲ្យកត់សម្គាល់។ តួយ៉ាង គិតត្រឹមរយ:ពេល១១ខែឆ្នាំ២០១៧ កន្លងទៅ ប្រទេសទាំងពីរសម្រេចបានទំហំពាណិជ្ជកម្ម ជាង ៣៤០០លានដុល្លារ ពោលគឺបានកើនឡើង ជាង ៣១% បើធៀបនឹងគ្រាដូចគ្នាក្នុងឆ្នាំ២០១៦ ដែលមានប្រមាណតែជិត ៣ពាន់លានដុល្លារប៉ុណ្ណោះ៕
