លោក ង៉ែត ជូ អ្នកអភិវឌ្ឍន៍គម្រោងបុរីធម្មជាតិ និងជាអ្នកជំនាញសេដ្ឋកិច្ចមួយរូប បានអត្ថាធិប្បាយថា នៅឆ្នាំ២០៣០ ក្រុងភ្នំពេញនឹងត្រូវការដីសង់លំនៅដ្ឋានរហូតដល់ ៣៦០០ហិកតា។ បើតាមលោក ង៉ែត ជូ ក្នុងមួយឆ្នាំ ប្រជាជនក្នុងក្រុងភ្នំពេញ ត្រូវការផ្ទះចំនួន២ម៉ឺនផ្ទះ ពោល គឺត្រូវការដី ៣០០ហិកតាក្នុងមួយឆ្នាំដើម្បីសង់លំនៅដ្ឋានដោយបូករួមទាំងសួនច្បារ សាលារៀន និងផ្លូវថ្នល់ជាដើម ហើយមិនទាន់គិតពីដីសម្រាប់សង់រោងចក្រ និងឃ្លាំងនៅឡើយទេ។
លោកបញ្ជាក់យ៉ាងដូច្នេះ៖ «យោងតាមតម្រូវការខាងលើ យើងអាចធ្វើផែនការក្នុងការវិនិយោគដីធ្លីសម្រាប់រយៈពេលវែង ដើម្បីចាប់យកឱកាសពីតម្រូវការទាំងនេះ។ សម្រាប់រដ្ឋាភិបាល គួរមានផែនការមេសម្រាប់អភិវឌ្ឍក្រុងក្នុងរយៈពេល១០០ឆ្នាំទៅមុខទៀត។ ក្រុងភ្នំពេញ សព្វថ្ងៃ ជាការផ្តួចផ្តើមកសាងដោយបារាំងកាលពី១០០ឆ្នាំមុន ដូច្នេះ មិនអាចឆ្លើយតបសមស្របតាមតម្រូវការនៃកំណើនប្រជាជននាពេលបច្ចុប្បន្ន និងអនាគតបានទេ»។
លោកបន្ថែមថា ការធ្វើផែនការមេសម្រាប់ក្រុងភ្នំពេញ គួរតែគិតបញ្ចូលផ្នែកបច្ចេសទេស លទ្ធភាពផ្នែកសេដ្ឋកិច្ច ទំហំវិនិយោគសម្រាប់ផែនការមេហេដ្ឋារចនាសម្ព័ន្ធ និងផលប៉ះពាល់បរិស្ថាន និងសង្គម ជាដើម។
លោកពន្យល់ប្រាប់ ខេមបូណូមីស ថា ការមានផែនការមេក្នុងការអភិវឌ្ឍទីក្រុងច្បាស់លាស់ មានផលវិជ្ជមានជាច្រើន ដូចជា ការបែងចែកតំបន់ក្នុងការអភិវឌ្ឍ (តំបន់ធនាគារនិងហិរញ្ញវត្ថុ តំបន់គមនាគមន៍ តំបន់លក់រថយន្ដ…)។ លើសពីនេះ ការដែលមានផែនការមេក្នុងការអភិវឌ្ឍហេដ្ឋារចនាសម្ព័ន្ធ គឺជាការបម្រើដល់អ្នករស់នៅទីក្រុងទាំងមូល ហើយវាជាតម្រូវការរបស់អ្នកអភិវឌ្ឍន៍លំនៅដ្ឋាន។
តើអ្នកបានអានអត្ថបទនេះឬនៅ?
ផ្ទុយទៅវិញ អ្នកអភិវឌ្ឍន៍លំនៅដ្ឋានបានរអ៊ូរទាំជុំវិញផលលំបាកក្នុងការអភិវឌ្ឍលំនៅដ្ឋាននៅពេលគ្មានប្លង់មេក្រុងភ្នំពេញ។
លោក ង៉ែត ជូ បញ្ជាក់យ៉ាងដូច្នេះថា៖ «ផលអវិជ្ជមាន គឺកង្វះប្រសិទ្ធភាពនៃការវិនិយោគសាធារណៈ ដូចជា ផ្លូវតូចចង្អៀតមិនអាចពង្រីកបាន ធ្វើឲ្យមានការកកស្ទះចរាចរណ៍ និងការធ្វើផ្លូវរួច តែត្រូវកាប់គាស់ផ្លូវដាក់ខ្សែកាប ឬដាក់លូ ដែលបង្កផលលំបាកដល់ពលរដ្ឋ»។
ទាក់ទងនឹងបញ្ហានេះដែរ លោក ឧកញ៉ា សៀ ឫទ្ធី អគ្គនាយកក្រុមហ៊ុន WorldBridge Land ដែលវិនិយោគលើលំនៅដ្ឋានតម្លៃសមរម្យ លំនៅដ្ឋានប្រណីត និងអគារខ្ពស់ៗ ដូចជា The Bridge, The Peak, The Palms ជាដើម បានអត្ថាធិប្បាយថា ការធ្វើប្លង់មេ បើសម្រាប់រដ្ឋាភិបាល គឺជាត្រីវិស័យមួយ ដើម្បីចង្អុលបង្ហាញក្នុងការអភិវឌ្ឍប្រទេសមួយ ឬតំបន់មួយ។
លោកឧកញ៉ាបញ្ជាក់យ៉ាងដូច្នេះថា៖ «បើគ្មានប្លង់គោល ឬប្លង់មេ និយាយដោយឡែក ក្នុងនាមខ្ញុំជាអ្នកអភិវឌ្ឍន៍ ខ្ញុំពិបាកក្នុងការស្វែងយល់ថា តើខ្ញុំគួរអភិវឌ្ឍទៅចំណុចណា? បើខ្ញុំមិនបានយល់ពីប្លង់មេ ឬប្លង់គោលនោះទេ។ ក្នុងនាមយើងជាអ្នកអភិវឌ្ឍន៍ យើងត្រូវគិតឲ្យបានច្បាស់លាស់ តើរដ្ឋាភិបាលមានប្លង់មេអភិវឌ្ឍន៍ទៅទិសខាងណា ដែលរដ្ឋាភិបាលចង់ឲ្យមានការរីកចម្រើន បានន័យថា ទិសខាងកើតរដ្ឋាភិបាលត្រូវធ្វើអ្វី? ទិសខាងលិច រដ្ឋាភិបាលត្រូវធ្វើអ្វី? ទិសខាងជើង និងខាងត្បូងត្រូវធ្វើអ្វី? ដូច្នេះ ទើបអ្នកអភិវឌ្ឍន៍អាចយកប្លង់មេរបស់រដ្ឋាភិបាល ជាត្រីវិស័យមួយក្នុងការកំណត់ខ្លួនឯងក្នុងការអភិវឌ្ឍឲ្យស្របនឹងប្លង់មេរបស់រដ្ឋាភិបាល ព្រោះ អ្នកអភិវឌ្ឍន៍ដូចពួកខ្ញុំ ត្រូវសិក្សា ឬដើរតាមប្លង់មេ និងគោលនយោបាយរបស់រដ្ឋាភិបាល»។
តើអ្នកបានអានអត្ថបទនេះ ឬនៅ?
បើតាមឧកញ៉ា សៀ ឫទ្ធី រដ្ឋាភិបាល ជាពិសេស ក្រសួងរៀបចំដែនដី នគរូបនីយកម្ម និងសំណង់ និងសាលារាជធានីភ្នំពេញ មានប្លង់មេ ឬប្លង់គោល ប៉ុន្ដែ មិនបានកំណត់ឲ្យបានច្បាស់លាស់ និងមិនទាន់បានផ្សព្វផ្សាយបន្ថែមដល់ប្រជាជន។
លោកឧកញ៉ាបញ្ជាក់យ៉ាងដូច្នេះថា៖ «តាមពិត រដ្ឋាភិបាលមានប្លង់មេ ឬប្លង់គោល ប៉ុន្ដែ អត់ទាន់មានការកំណត់ជាកំហិតថា ទិសខាងណេះត្រូវធ្វើអី ទិសខាងនោះត្រូវធ្វើអីទេ។ បានន័យថា វានៅតែអាស្រ័យលើអ្នកអភិវឌ្ឍន៍ ដែលធ្វើឲ្យវិស័យឯកជន គាត់គិតថា ទីផ្សារណាដែលគាត់អាចអភិវឌ្ឍន៍ទៅបាន គាត់ធ្វើតែម្តង។ ដូច្នេះ ធ្វើឲ្យការអភិវឌ្ឍមានការយឺតយ៉ាវ។… អ្នកអភិវឌ្ឍន៍គម្រោងណាមួយ ពិបាកទៅអភិវឌ្ឍនៅកន្លែងដែលគ្មានហេដ្ឋារចនាសម្ព័ន្ធ ទោះបីតំបន់នោះមានសក្ដានុពលយ៉ាងណាក៏ដោយ។ ជារួម រាជរដ្ឋាភិបាលគួរកំណត់ទិសដៅក្នុងការអភិឌ្ឍហេដ្ឋារចនាសម្ព័ន្ធតាមប្លង់មេនិងប្លង់គោលរបស់រដ្ឋាភិបាល ដើម្បីឲ្យពួកយើងដែលជាអ្នកអភិវឌ្ឍន៍ ធ្វើការអភិវឌ្ឍស្របតាមប្លង់មេរបស់រដ្ឋាភិបាល»។
លោកឧកញ៉ាបន្ថែមថា៖ «រដ្ឋាភិបាលបានខិតខំកសាងហេដ្ឋារចនាសម្ព័ន្ធរួចហើយ ដោយបានខិតខំរកលុយច្រើនដើម្បីកសាង ព្រោះ ការកសាងហេដ្ឋារចនាសម្ព័ន្ធ ត្រូវការលុយច្រើនណាស់។…ខ្ញុំសំណូមពរឲ្យរដ្ឋាភិបាលអភិវឌ្ឍផ្លូវ ដោយភ្ជាប់ជាមួយប្រព័ន្ធទឹក ភ្លើង និងលូ ទៅព្រមគ្នាតែម្តង ដើម្បីងាយស្រួលដល់អ្នកអភិវឌ្ឍន៍ ព្រោះ សម្រាប់ពួកខ្ញុំជាអ្នកអភិវឌ្ឍន៍ ពិតជាលំបាក បើសិនជាមានតែផ្លូវ តែគ្មានទឹកភ្លើងនិងលូ។ ឧទាហរណ៍ថា ខ្ញុំបានអភិវឌ្ឍគម្រោងលំនៅដ្ឋានតម្លៃសមរម្យ យើងមានផ្លូវធំល្អ យើងសប្បាយចិត្ត តែអត់មានលូនិងទឹក ដូច្នេះ តម្រូវឲ្យខ្ញុំធ្វើរឿងនេះខ្លួនឯង ប៉ុន្ដែ សួរថា តើការអភិវឌ្ឍប្រព័ន្ធលូនិងទឹករបស់យើង ស្របនឹងប្លង់មេ ឬប្លង់គោលរបស់រដ្ឋាភិបាលដែរទេ?»។
សារព័ត៌មាន ខេមបូណូមីស បានទូរស័ព្ទទៅកាន់លោក ម៉េត មាសភក្ដី អ្នកនាំពាក្យសាលារាជធានីភ្នំពេញ ប៉ុន្ដែ លោកបានបដិសេធការធ្វើអត្ថាធិប្បាយអំពីបញ្ហានេះ។ យ៉ាងណាក៏ដោយ បើតាមអតីតអ្នកនាំពាក្យសាលាក្រុងភ្នំពេញ លោក ឡុង ឌីម៉ង់ ដែលបានថ្លែងកាលពីចុងឆ្នាំ២០១៦ បានឲ្យដឹងថា អភិបាលក្រុងបានយល់ស្របគម្រោងសាងសង់បណ្ណាល័យសាធារណៈមួយនៅក្នុងអគារថ្មីដែលនឹងមានដាក់ប្លង់មេ ដែលអ្នកណាក៏អាចចូលមើលបានដែរ។
ប្លង់មេដែលដាក់ថា «ការប្រើប្រាស់ដីនៅរាជធានីភ្នំពេញសម្រាប់ឆ្នាំ២០៣៥ គឺជាបណ្ដុំឯកសារចំនួន៣៣០ទំព័រជាភាសាបារាំងដែលត្រូវផ្តល់មូលនិធិដោយស្ថានទូតបារាំងហើយមានឈ្មោះថា Livre Blanc ដោយត្រូវអនុម័តបន្ទាប់ពីរយៈពេល៨ឆ្នាំ ហើយក្រោយមក ត្រូវបានសង្ខេបទៅជាឯកសារត្រឹមតែ ៣៥ទំព័រ ជាភាសាខ្មែរ ដែលបានផ្សព្វផ្សាយជាសាធារណៈកាលពីឆ្នាំ២០១៥ កន្លងមក។ នេះបើតាមកាសែតភ្នំពេញប៉ុស្តិ៍ ចុះផ្សាយកាលពីខែសីហា ឆ្នាំ២០១៦ កន្លងទៅ៕
None
