តើអ្នកជំនាញមានការយល់ឃើញបែបណាចំពោះការលែងឱ្យបើកកាស៊ីណូនៅខេត្តកំពត និងខេត្តកែប?

សម្ដេចធីបតី ហ៊ុន ម៉ាណែត នាយករដ្ឋមន្រ្តីកម្ពុជា បានចាត់ទុកខេត្តកំពត និងខេត្តកែប គឺជាខេត្តជាប់មាត់សមុទ្រ ដែលមានសក្ដានុពលផ្នែកទេសចរណ៍ និងការវិនិយោគ។ ទន្ទឹមនឹងនេះប្រមុខរាជរដ្ឋាភិបាល បានប្រកាសឈប់ផ្ដល់អាជ្ញាធរបណ្ណឱ្យបើកកាស៊ីណូក្នុងខេត្តជាប់មាត់សមុទ្រទាំងពីរនេះ លើកលែងតែកាស៊ីណូដែលមានស្រាប់នៅលើភ្នំបូកគោ ប៉ុន្តែគេអាចបើកបាននៅច្រកព្រែកចាក ជិតព្រំដែនវៀតណាម។

បើតាមសម្ដេចនាយករដ្ឋមន្រ្តី ការមិនអនុញ្ញាតផ្ដល់អាជ្ញាធរបណ្ណដល់កាស៊ីណូនេះ គឺដោយសារសម្តេចចង់រក្សាទុកខេត្តទាំងពីរនេះ សម្រាប់បម្រើដល់វិស័យទេសចរណ៍ ឧស្សាហកម្ម កម្មន្តសាល កសិ-ឧស្សាហកម្ម និងភស្តុភារកម្ម និងឡូជីស្ទីកជាដើម។

​ជាមួយគ្នានេះ លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានបង្ហាញការគាំទ្រចំពោះការសម្រេចរបស់រដ្ឋាភិបាលនេះ។ សម្រាប់អ្នកជំនាញរូបនេះ វត្តមានរបស់ការស៊ីណូ ពុំបានស្រូបទាញផលប្រយោជន៍ជាសាធារណៈឡើយ ក្រៅតែពីការបង់ពន្ធ និងជួយដល់កម្លាំងពលកម្មមួយចំនួន។

បើតាមលោក ធួន ស៊ីណាន ក្រៅពីវត្តមានកាស៊ីណូនៅតាមព្រំដែន គឺកម្ពុជាពុំគួរឱ្យមានកាស៊ីណូបន្ថែមទៀតនោះទេ ព្រោះការមានវត្តមានកាស៊ីណូច្រើនអាចបង្កឱ្យមានឧក្រិដ្ឋកម្មកើតឡើងកាន់តែច្រើនផងដែរ។

ស្រដៀងគ្នានេះដែរលោក យង់ គិមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព យល់ឃើញថា ការសម្រេចរបស់រដ្ឋាភិបាល មិនឱ្យមានកាស៊ីណូនៅខេត្តកំពត និងខេត្តកែប បន្ថែមនេះ គឺជារឿងល្អប្រសើរ ខណៈកន្លងមកលោកសង្កេតឃើញថា ល្បែងស៊ីសងបានរាលដាលក្នុងសហគមន៍។បន្ថែមពីនេះមន្រ្តីអង្គការសង្គមស៊ីវិលរូបនេះ ស្នើឱ្យរដ្ឋាភិបាល គួរចាត់វិធានការទប់ស្កាត់បន្ថែមទៀតចំពោះការលេងល្បែងស៊ីសងនៅតាមសហគមន៍ ដើម្បីបង្កាបាតុភាពសង្គមផ្សេងៗ។

​ជាមួយគ្នានេះលោកបណ្ឌិត ឈត ប៊ុនថង អ្នកស្រាវជ្រាវ និងជាអ្នកជំនាញទស្សនវិជ្ជា នៃរាជបណ្ឌិត្យសភាកម្ពុជា បានចាត់ទុកការសម្រេចរបស់រដ្ឋាភិបាលថា ជាវិធានការមួយដ៏ល្អ។ ទន្ទឹមនេះ អ្នកជំនាញរូបនេះសង្កេតឃើញថា កាស៊ីណូ ដែលមានអាជ្ញាបណ្ណកន្លងមក គឺពុំអនុញ្ញាតឱ្យជនជាតិខ្មែរចូលលេងនោះទេ ប៉ុន្តែនៅតែមានពលរដ្ឋខ្មែរចូលលេង ដែលករណីនេះបង្កឱ្យមានផលប៉ះពាល់ដល់សេដ្ឋកិច្ចគ្រួសារ និងបាតុភាពក្នុងសង្គមជាច្រើនទៀត៕

អត្ថបទ៖ បូ ដូឡា​