យុទ្ធនាការមួយនេះ ប្រព្រឹត្តទៅរយៈពេល១ខែ នៅលើប្រព័ន្ធបណ្តាញសង្គម ចាប់ពីថ្ងៃទី១៩ ខែមករា ឆ្នាំ២០២២ ដល់ថ្ងៃទី១៩ ខែកុម្ភៈ ឆ្នាំ២០២២ ដោយផ្តោតទៅលើ «សិទ្ធិ ស្ដង់ដារ ការបំពេញការងារ និងថវិការបស់មណ្ឌលសុខភាព» និង «សិទ្ធិ ស្តង់ដារ ការបំពេញការងារ និងព័ត៌មានអំពីថវិកានៅសាលារៀន»។
ការអនុវត្តនេះ គាំទ្រដល់ការប្តេជ្ញាចិត្តផ្នែកនយោបាយ របស់រាជរដ្ឋាភិបាលក្នុងការអនុវត្តក្របខណ្ឌគណនេយ្យភាពសង្គម ដើម្បីលើកកម្ពស់សិទ្ធិអំណាចដល់ពលរដ្ឋ ពង្រឹងភាពជាដៃគូវាងរដ្ឋបាលថ្នាក់ក្រោមជាតិ និងពលរដ្ឋ ព្រមទាំងពង្រីកគណនេយ្យភាពរបស់រដ្ឋបាលថ្នាក់ក្រោមទាំងនោះ ឱ្យកែលម្អការផ្តល់សេវាសាធារណៈ បានកាន់តែមានប្រសិទ្ធភាព។
លោក ទន់ យូហៀង មន្ត្រីជំនាញគណនេយ្យភាពសង្គមនៃអង្គការសុខភាពគ្រួសារអន្តរជាតិ៣៦០(FHI360) បានថ្លែងឲ្យដឹងថា យុទ្ធនាការផ្សព្វផ្សាយកញ្ចប់ព័ត៌សម្រាប់ប្រជាពលរដ្ឋ (I4C)នេះ គឺតែងតែធ្វើឡើងនៅរាងរាល់ខែមករា ដល់ ខែមីនា ប៉ុន្តែយុទ្ធនាការតាមប្រព័ន្ធបណ្តាញសង្គមនេះ គឺមានរយៈពេល១ខែប៉ុណ្ណោះ ក្រៅពីនោះ គឺធ្វើការផ្សព្វផ្សាយបែបប្រពៃណី ដោយអង្គការដៃគូថ្នាក់ខេត្ត និងអ្នកសម្របសម្រួលគណនេយ្យភាពសហគមន៍ នឹងចុះធ្វើការផ្សព្វផ្សាយផ្ទាល់តែម្តង ទៅដល់ពលរដ្ឋនៅតាមទីប្រជុំជន និងវត្តអារាមជាដើម។
លោក ទន់ យូហៀង៖«យើងធ្វើយ៉ាងណាផ្សព្វផ្សាយព័ត៌មានដល់ប្រជាពលរដ្ឋដើម្បីលោកបានយល់ និងអាចប្រើប្រាស់ ព័ត៌មានអំពីសិទ្ធិរបស់ពលរដ្ឋ សេវាសាធារណៈ ស្តង់ដារសេវា និងការបើកចំហថវិការបស់រដ្ឋបាលថ្នាក់ក្រោមជាតិ ពិសេសសកម្មចូលរួម ក្នុងការអនុវត្តសកម្មភាពគណនេយ្យភាពសង្គម ដើម្បីលើកកម្ពស់សេវានៅមូលដ្ឋាន។ យើងរំពឹងទុកថា បន្ទាប់ពីប្រជាពលរដ្ឋទទួលបានព័ត៌មានទំាងនេះ លោកនឹងសកម្មចូលរួមក្នុងការពង្រឹងការចាត់ចែង ការប្រើប្រាស់ថវិកា និង ការផ្តល់សេវាសាធារណៈនៅមូលដ្ឋាន»។
លោកយូហៀងថា គម្រោង (ISAC) គឺជាការផ្សារភ្ជាប់ប្រជាពលរដ្ឋ ដើម្បីចូលរួមធ្វើឱ្យប្រសើរឡើងសម្រាប់សេវាសាធារណៈ តាមរយៈការងារ គណនេយ្យភាពសង្គម និងលើកកម្ពស់ការចូលរួម ព្រមទាំងកិច្ចសន្ទនាជាប្រចាំរបស់ប្រជាពលរដ្ឋគ្រប់ភូមិ ក្នុងតំបន់គោលដៅ ជាមួយអាជ្ញាធរថ្នាក់មូលដ្ឋាន ដើម្បីពង្រឹងដល់គុណភាពសេវាសាធារណៈទាំងអស់នោះ។
គួរបញ្ជាក់ថា គម្រោងការច្នៃប្រឌិតថ្មីសម្រាប់គណនេយ្យភាពសង្គមនៅក្នុងប្រទេសកម្ពុជា(ISAC) ទទួលការគាំទ្រពីមូលនិធិពីទីភ្នាក់សហរដ្ឋអាមេរិក សម្រាប់ការអភិវឌ្ឍអន្តរជាតិ(USAID) តាមរយៈអង្គការសុខភាពគ្រួសារអន្តរជាតិ៣៦០(FHI360) ដែលមានរយៈ៥ឆ្នាំ (២០១៩-២០២៤) ក្នុងតំបន់គោលដៅ នៃក្រុងមួយចំនួនដូចជា បាត់ដំបង បន្ទាយមានជ័យ សៀមរាប កំពត កណ្តាល កំពង់ឆ្នាំង និងភ្នំពេញជាដើម៕
