បណ្តឹងនេះបានប្តឹងដល់តុលាការក្រុងម៉ៃអាមី (Miami) ដោយលោកត្រាំ បានចោទប្រកាន់បណ្តាញសង្គមធំៗទាំងអស់នោះថា រំលោភសិទ្ធិបញ្ចញមតិ ដែលធានាដោយរដ្ឋធម្មនុញ្ញសហរដ្ឋអាមេរិក។
លោកត្រាំ បានដាក់ពាក្យបណ្តឹងក្រុមហ៊ុន និង នាយកប្រតិបត្តិក្រុមហ៊ុនដូចជា ក្រុមហ៊ុន Facebook និង នាយកប្រតិបត្តិគឺ លោក Mark Zuckerberg , បណ្តាញសង្គម Twitter និងនាយកប្រតិបត្តិ គឺ Jack Dorsey . និង ក្រុមហ៊ុន Google រួមទាំងនាយកប្រតិបត្តិក្រុមហ៊ុនគឺលោក Sundar Pichai។
លោក Donald trump បានបញ្ជាក់បន្ថែមនៅក្នុងសន្និសីទសារព័ត៌មានថា ពួកយើងសម្រេចនូវជ័យជំនះជាប្រវត្តិសាស្ត្រនូវសេរីភាពរបស់ពលរដ្ឋអាមេរិក និងសេរីភាពបញ្ចេញមតិ។
អត្ថបទគួរអាន
ទាក់ទងនឹងបញ្ហានេះ ខាងតំណាងក្រុមហ៊ុន Facebook, Twitter និង Google មិនទាន់ផ្ដល់ការឆ្លើយតបយ៉ាងណានៅឡើយចំពោះបណ្ដឹងរបស់លោកត្រាំនេះ។
គេនៅចាំថា បណ្ដាញសង្គមរបស់ លោក Trump ដូចជាទំព័រហ្វេសប៊ុក និង គណនី Twitter របស់លោកជាដើម ត្រូវបានក្រុមហ៊ុនទាំងនោះបិទលែងឲ្យប្រើប្រាស់នៅឆ្នាំនេះ បន្ទាប់ពីក្រុមហ៊ុនទាំងនោះកត់សម្គាល់ឃើញថា អតីតប្រធានាធិបតីអាមេរិករូបនេះ បានរំលោភគោលការណ៍របស់ក្រុមហ៊ុន ពោលគឺនៅក្រោយពេលមានការបាតុកម្មនៅវិមានរដ្ឋសភាអាមេរិកកាលពីថ្ងៃទី ០៦ខែមករា ហើយអំឡុងពេលនោះ លោកត្រាំបានលើកឡើងជាដដែលៗ ទាក់ទងនឹងលទ្ធផលបោះឆ្នោតថា ជាការលួចបន្លំ បើទោះបីជាមានការច្រានចោលដោយតុលាជាច្រើន រួមទាំងមន្ត្រីបោះឆ្នោតជាតិ និងសមាជិកនៅក្នុងរដ្ឋបាលរបស់លោកផ្ទាល់ក៏ដោយ៕
អត្ថបទ៖ សុខ សិទ្ធិការ្យ
None
