លោក លូ ម៉េង ប្រធានសហព័ន្ធទេសចរណ៍កម្ពុជា បានអះអាងថា នៅរយៈពេល១សប្ដាហ៍ចុងក្រោយនេះ វិស័យសណ្ឋាគារ និងភោជនីយដ្ឋានគឺមានការធ្លាក់ចុះខ្លាំងជាងកាលពីប៉ុន្មាន ២ ទៅ៣សប្ដាហ៍ ដោយកាលពីមុន មានការធ្លាក់ខ្លាំងតែនៅខេត្តសៀមរាបទេ ប៉ុន្ដែ ចុងក្រោយនេះ គឺបានធ្លាក់ចុះនៅទូទាំងប្រទេសទៅហើយ។
បើតាមការប៉ាន់ស្មានរបស់លោក លូ ម៉េង វិស័យសណ្ឋាគារ និងភោជនីយដ្ឋាន គឺមានការធ្លាក់ចុះចំណូលប្រមាណ៧០% ទៅ៨០% ដែលវាបាននិងកំពុងធ្វើឲ្យម្ចាស់អាជីវកម្ម កំពុងមានការលំបាកកាន់តែខ្លាំង ដោយសារតែការចំណាយមានច្រើន។ ហើយបច្ចុប្បន្ន ក៏មានអាជីកម្មសណ្ឋាគារ និងភោជនីយដ្ឋានច្រើនគួរសមដែរ បានបិទទ្វារ និងខ្លះទៀតកំពុងគិតគូរថានឹងបិទ ដែលភាគច្រើននៅសៀមរាប ភ្នំពេញ និងខេត្តព្រះសីហនុ។ នេះបើតាមការគូសបញ្ជាក់របស់លោក លូ ម៉េង។
អត្ថបទទាក់ទង!
គេនៅចាំថា កាលពីចុងខែកុម្ភៈ កន្លងទៅ រាជរដ្ឋាភិបាល បានចេញនូវសេចក្ដីសម្រេច លើកលែងពន្ធលើអាជីវកម្មសណ្ឋាគារ និងផ្ទះសំណាក់រយៈពេល ៤ខែ ប៉ុន្ដែសម្រាប់តែខេត្ត សៀមរាបប៉ុណ្ណោះ។ ជុំវិញ នឹងការលើកលែងពន្ធនេះដែរ ប្រធានសហព័ន្ធទេសចរណ៍កម្ពុជា លោក លូ ម៉េង បានបញ្ជាក់ថា ខាងសហព័ន្ធ ក៏ស្នើឲ្យរាជរដ្ឋាភិបាល គួរតែពិចារណាលើកលែងពន្ធសម្រាប់អាជីវកម្មសណ្ឋាគារ និងផ្ទះសំណាក់នេះនៅទូទាំងប្រទេសតែម្ដង ព្រោះថាឥឡូវវាមិនមែនប៉ះពាល់តែនៅសៀមរាបនោះទេ។ មួយវិញទៀត សម្រាប់អាជីវកម្មភោជនីយដ្ឋាន ក៏ដូចជា អាជីវកម្មទាក់ទងនឹងសេវាទេសចរណ៍ផ្សេងទៀត ក៏គួរតែត្រូវបានលើកលែងពន្ធផងដែរ។
លោក លូ ម៉េង បានបន្ថែមទៀតថា ក្នុងកាលៈទេសៈនេះ លោកក៏ស្នើឲ្យម្ចាស់អចលនវត្ថុដូចជា ដីជួល ឬផ្ទះជួល សម្រាប់បើកហាង ភោជនីយដ្ឋាន ឬសណ្ឋាគារជាដើម សូមយោគយល់ និងបញ្ចុះថ្លៃជួលខ្លះ ដើម្បីរួមចំណែកជួយដល់វិស័យទេសចរណ៍របស់កម្ពុជាទាំងអស់គ្នា។ លើសពីនេះ លោកក៏ស្នើដល់ខាងធនាគារ ឲ្យគិតគូរក្នុងការសម្រួលដល់ការសងការប្រាក់ពីសំណាក់ម្ចាស់អាជីវកម្មក្នុងវិស័យទេសចរណ៍ផងដែរ ព្រោះថា បើមិនមានការចូលរួមជួយអន្តរាគមន៍ទេនោះ ចង់ ឬមិនចង់ បើបញ្ហាអាក្រក់នេះនៅតែបន្ដ ចំនួនហាង ភោជនីយដ្ឋាន សណ្ឋាគារ និងផ្ទះសំណាក់ ដែលបិទទ្វារនឹងបន្ដកើតឡើងកាន់តែច្រើន។
ទាក់ទងនឹងឥណទានពីធនាគារ សម្រាប់អាជីវកម្មក្នុងវិស័យទេសចរណ៍នេះដែរ ខាងធនាគារជាតិនៃកម្ពុជា នាពេលថ្មីៗនេះ បានធ្វើការអំពាវនាវឲ្យគ្រឹះស្ថានធនាគារ និងហិរញ្ញវត្ថុនៅកម្ពុជា បន្តផ្ដល់ឥណទានដល់វិស័យអាទិភាព ដូចជាអាជីវកម្មក្នុងវិស័យទេសចរណ៍ សណ្ឋាគារ និងផ្ទសំណាក់ និងភោជនីយដ្ឋានជាដើម។
ជុំវិញនឹងបញ្ហានេះ លោក បណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា និងជាប្រធានសមាគមធនាគារនៅកម្ពុជា បានអះអះអាងថា ខាងសមាគមធនាគារ គឺមានការគាំទ្រចំពោះវិធានការរបស់ធនាគារជាតិ ហើយចំពោះ ធនាគារអេស៊ីលីដាផ្ទាល់ គឺនៅតែបន្ដផ្ដល់កម្ចីសម្រាប់វិស័យអាទិភាពជាពិសេសក្នុងវិស័យទេសចរណ៍ ក៏ដូចជាវិស័យផ្សេងទៀតផងដែរ។
អត្ថបទគួរឲ្យចាប់អារម្មណ៍
សូមបញ្ជាក់ថា វិស័យទេសចរណ៍ គឺជាវិស័យឆ្អឹងខ្នងសេដ្ឋកិច្ចដ៏សំខាន់មួយ ដែលបានចូលរួមចំណែកក្នុងផលិតផលក្នុងស្រុកសរុបរបស់កម្ពុជា ប្រមាណ ១៣%។ ក្នុងនោះដែរ បើតាមរបាយការណ៍ពីក្រសួងសេដ្ឋកិច្ច និងហិរញ្ញវត្ថុ ដែលបានចេញផ្សាយកាលពីថ្ងៃទី ៣០ ខែមករា ឆ្នាំ២០២០ បានឲ្យដឹងថា កំណើននៃវិស័យសណ្ឋាគារ និងភោជនីយដ្ឋាន សម្រាប់ឆ្នាំ២០២០នេះ រំពឹងថា នឹងរក្សាបានត្រឹមតែ ២,៧% ប៉ុណ្ណោះ ខណៈដែលកាលពីឆ្នាំ២០១៩ មានកំណើន ៥,៣%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
