លោក David Malpass ប្រធានធនាគារពិភពលោកបានអះអាងនៅក្នុងថ្ងៃព្រហស្បត្តិ៍សប្ដាហ៍នេះថា សេដ្ឋកិច្ចតំបន់អាស៊ីបូព៌ា និងប៉ាស៊ីហ្វិក ដោយមិនរាប់បញ្ចូលប្រទេសចិន ត្រូវបានរំពឹងថានឹងមានកំណើន ៤% នៅក្នុងឆ្នាំ២០២១នេះ ដែលមានទាបជាងអ្វីដែលបានព្យាករទុក ៤,៤% កាលពីខែមីនាកន្លងទៅ ដោយក្នុងនោះ មានប្រទេសខ្លះដូចជា ភូមាជាដើម គឺកំពុងប្រឈមនឹងវិបត្តិសេដ្ឋកិច្ចធ្លាក់ចុះកាន់តែកប់ជ្រៅជាងការរំពឹងទុក។
ប្រសិនបើរួមបញ្ចូលទាំងប្រទេសចិន ដែលកំណើនសេដ្ឋកិច្ចចិននឹងកើនដល់៨,៥% នៅឆ្នាំ២០២១នេះ ធនាគារពិភពលោករំពឹងថា កំណើនសេដ្ឋកិច្ចនៅតំបន់អាស៊ីបូព៌ា និងប៉ាស៊ីហ្វិក នឹងអាចកើនដល់៧,៧% នៅឆ្នាំនេះ គឺកើនលើសពីអ្វីដែលបានព្យាករទុក៧,៤% កាលពីខែមីនា។
ថ្នាក់ដឹកនាំធនាគារពិភពលោកបានគូសបញ្ជាក់ថា ល្បឿននៃការចាក់វ៉ាក់សាំងនៅតាមប្រទេសនានា នៅតែជាហានិភ័យសម្រាប់ទស្សនវិស័យសេដ្ឋកិច្ច ដោយសារតែមានប្រទេសជាច្រើននៅក្នុងតំបន់នេះទំនងជាមិនអាចចាក់វ៉ាក់សាំងបានគ្រប់ចំនួនដូសសម្រាប់ប្រជាជនរបស់ពួកគេបានទេរហូតដល់ឆ្នាំ២០២៤។ប្រធានធនាគារពិភពលោកលោក Malpass បានលើកឡើងទៀតថា អាទិភាពជាបន្ទាន់សម្រាប់ប្រទេសកំពុងអភិវឌ្ឍន៍ គឺការទទួលបានវ៉ាក់សាំងកូវីដ-១៩ ដែលត្រូវទៅនឹងកម្មវិធីដាក់ពង្រាយសម្រាប់ការចាក់វ៉ាក់សាំងរបស់ពួកគេ។ ទោះយ៉ាងណា ថ្នាក់ដឹកនាំធនាគារពិភពលោករូបនេះ នៅតែមានក្ដីបារម្ភចំពោះប្រទេសកំពុងអភិវឌ្ឍន៍ថា អាចនឹងដើរថយក្រោយទាក់ទងនឹងល្បឿននៃការងើបឡើងវិញនៃសេដ្ឋកិច្ចនេះ ធៀបនឹងប្រទេសអភិវឌ្ឍន៍ហាក់កំពុងដើរទៅមុន ជាមួយកំណើនមួយរឹងមាំជាង ស្របពេលដែលពលរដ្ឋកាន់តែច្រើនឡើងនៅក្នុងប្រទេសជឿនលឿនទាំងនោះ បានចាក់វ៉ាក់សាំងគ្រប់ចំនួនដូសបានរួចរាល់។
អត្ថបទគួរអាន
ដោយមើលឃើញបញ្ហាទាំងអស់នេះហើយ ទើបធនាគារពិភពលោក បានផ្ដោតជាសំខាន់ទៅលើការពង្រីកលទ្ធភាពក្នុងការទទួលបានវ៉ាក់សាំង ដោយកាលពីដើមខែនេះ ធនាគារពិភពលោកបានបង្កើនហិរញ្ញប្បទានសម្រាប់ការបញ្ជាទិញវ៉ាក់សាំងដល់ទៅ២០ពាន់លានដុល្លារអាមេរិក។ ទន្ទឹមគ្នានេះ ថ្នាក់ដឹកនាំធនាគារពិភពលោក លោក Malpass ក៏បានទទូចស្នើទៅកាន់ប្រទេសសេដ្ឋកិច្ចជឿនលឿនឲ្យផ្ដល់វ៉ាក់សាំងបន្ថែមទៀតទៅឲ្យប្រទេសកំពុងអភិវឌ្ឍន៍ ដែលកំពុងមានតម្រូវការកាន់តែកាន់តែខ្លាំងឡើង។ធនាគារពិភពលោក ក៏បានលើកឡើងពី វិបត្តិនៅប្រទេសភូមា ដែលជាប្រទេសកំពុងមានសេដ្ឋកិច្ចយ៉ាប់យ៉ឺនជាងគេបំផុតក្នុងតំបន់ ក្រោយពេលមានការធ្វើរដ្ឋប្រហារ ហើយកំពុងបន្ដមានវិបត្តិនយោបាយរ៉ាំរៃរកច្រកចេញមិនទាន់បាននៅឡើយ។ ស្ថាប័នហិរញ្ញវត្ថុអន្តរជាតិមួយនេះ បានមើលឃើញថា វិបត្តិកូវីដ-១៩នៅភូមា គឺកាន់តែអាក្រក់ទៅៗហើយ ដែលវាបានចាប់ផ្ដើមឡើងតាំងតែពីមានការធ្វើរដ្ឋប្រហារដោយយោធានៅថ្ងៃទី ១ខែកុម្ភៈមក។ វិបត្តិនេះ អាចនឹងរុញឲ្យសេដ្ឋកិច្ចប្រទេសអាស៊ានមួយនេះ ដាំក្បាលចុះកប់កាន់តែជ្រៅនៅឆ្នាំនេះ ខណៈដែលកាលពីខែមីនាធនាគារពិភពលោកព្យាករថា សេដ្ឋកិច្ចភូមានឹងមានធ្លាក់ចុះដល់ -១0% នៅឆ្នាំ២០២១៕
None
