ក្រុមហ៊ុនមួយក្នុងចំណោមក្រុមហ៊ុនជាច្រើន ដែលគេសង្កេតឃើញថា បានទទួលជោគជ័យ និងពេញនិយមពីអ្នកប្រើប្រាស់នោះ គឺក្រុមហ៊ុន Tesla របស់មហាសេដ្ឋី Elon Musk។ Tesla បង្កើតឡើងក្នុងឆ្នាំ២០០៣ និងផ្តើមបញ្ចេញលក់រថយន្តអគ្គិសនីដំបូងរបស់ខ្លួនម៉ូឌែល Tesla Roadster នៅឆ្នាំ២០០៨។ គិមកមដល់ពេលនេះ Tesla បញ្ចេញរថយន្តអគ្គិសនី បាន ៥ម៉ូឌែលហើយ រួមមាន Roadster, Model3, ModelS, ModelX និង ModelY។
កាលពីឆ្នាំ២០២០កន្លងទៅថ្មីៗនេះ Tesla អាចរកចំណូលបាន ជាង៨ពាន់លានដុល្លារអាមេរិកពីការលក់រថយន្តអគ្គិសនីរបស់ខ្លួន។ គួរជម្រាបជូនថា រថយន្តរបស់ Tesla ទទួលបានការពេញនិយមពេញនិយមខ្លាំង នៅសហរដ្ឋអាមេរិក អឺរ៉ុប និងប្រទេសចិន។
ស្របពេលដែលតម្រូវការរថយន្ដអគ្គិសនីកើនឡើង ថ្មីៗនេះ សូម្បីតែក្រុមហ៊ុន Apple ដែលជាក្រុមហ៊ុនផលិតទូរស័ព្ទដ៏ធំរបស់អាមេរិក ក៏បានទំលាយព័ត៌មានមកថាខ្លួន នឹងសហការជាមួយក្រុមហ៊ុន Hyundai-Kia របស់កូរ៉េក្នុងការផលិតរថយន្តអគ្គិសនីម៉ាក Apple នៅឆ្នាំ ២០២៤ ដែរ បន្ទាប់ពី Apple បានសិក្សាលើគម្រោងនេះ អស់ជាច្រើនឆ្នាំមកហើយ។អត្ថបទទាក់ទង
ក្រឡេកទៅមើលក្រុមហ៊ុនផលិតរថយន្តយក្សមួយទៀតរបស់អាមេរិក គឺក្រុមហ៊ុន Ford ដែលថ្មីៗនេះខ្លួនទើបតែបញ្ចេញផែនការសម្រាប់ឆ្នាំ ២០២១-២០២៥ ដោយគ្រោងនឹងចំណាយទឹកប្រាក់ប្រមាណ ២២ពាន់លានដុល្លារអាមេរិក ដើម្បីផលិតរថយន្តអគ្គិសនីប្រភេទ SUV របស់ខ្លួន ក្នុងទឹក ដីប្រទេស ចិន។
មិនឲ្យចាញ់ប្រទេសធំៗនៅអឺរ៉ុបប៉ុន្មានដែរ វៀតណាមដែលជាប្រទេសក្បែរខាងកម្ពុជាឯណេះវិញ ក៏មានក្រុមហ៊ុនផលិតរថយន្តក្នុងស្រុកមួយរបស់ខ្លួន គឺ VinFast ទើបតែប្រកាសពីរថយន្តអគ្គិសនីរបស់ខ្លួន ដែលមានសមត្ថភាពអាចបើកបរដោយស្វ័យប្រវត្តិ និងអាចបើកបរបានចន្លោះពី ៣០០ ទៅ ៥០០គីឡូម៉ែត្រ ពេលសាកថ្មពេញម្តង។ នេះជាផ្នែកមួយនៃគម្រោងរបស់វៀតណាម ដើម្បីប្រកួតប្រជែងក្នុងទីផ្សាររថយន្តអគ្គិសនី។
សូមបញ្ជាក់ថា មិនមែនមានតែក្រុមហ៊ុនដែលបានរៀបរាប់ខាងលើនោះទេ ដែលមានការផលិតនិងដាក់លក់រថយន្តអគ្គិសនី ពោលគឺសឹងតែគ្រប់ក្រុមហ៊ុនផលិតរថយន្តនៅទូទាំងពិភពលោកទៅហើយ ដែលងាកមកចាប់យកការផលិតរថយន្តអគ្គិសនីនេះ។ ជាក់ស្តែងកាលពីឆ្នាំ២០១៧ ក្រុមហ៊ុនរថយន្តយក្សពីររបស់ប្រទេសជប៉ុនគឺ ក្រុមហ៊ុនតូយ៉ូតា Toyota និង Mazda ក៏បានចូលរួមជាមួយគ្នាដើម្បីបង្កើតក្រុមហ៊ុនថ្មីមួយ និងរៀបចំអភិវឌ្ឍបច្ចេកវិទ្យារថយន្តប្រើប្រាស់ដោយថាមពលអគ្គិសនីដែរ។ ក្រៅពីនេះទៀត ក៏មាន រថយន្តអគ្គិសនីរបស់ BMW, Volkswagen និង Hyundai។ល។
រដ្ឋាភិបាលនៅតាមបណ្តាប្រទេសជាទូទៅ នៅទូទាំងពិភពលោក ជឿថា រថយន្តអគ្គិសនីដើរតួនាទីដ៏សំខាន់ នៅក្នុងការកាត់បន្ថយការបញ្ចេញឧស្ម័នផ្ទះកញ្ចក់ និងអាចជួយទប់ស្កាត់ការឡើងកម្តៅនៃភពផែនដី។ យ៉ាងណាមិញ អ្នកវិទ្យាសាស្រ្តមួយចំនួនបានចោទជាសំណួរជុំវិញប្រសិទ្ធភាពនៃរថយន្តអគ្គិសនី ក្នុងការជួយដល់បរិស្ថាន។ ជាការពិតថា រថយន្តអគ្គិសនីមិនបញ្ចេញឧស្ម័នកាបូនិកដូចជារថយន្តប្រើប្រេងធម្មតានោះទេ។ អ្នកវិទ្យាសាស្រ្តជាទូទៅ សុទ្ធតែឯកភាពគ្នានៅត្រង់ចំណុចនេះ។ ក៏ប៉ុន្តែ អ្វីដែលអាចចោទជាបញ្ហាចំពោះបរិស្ថាន មិនមែនចេញពីរថយន្តអគ្គិសនីដោយផ្ទាល់នោះទេ គឺចេញពីចំណុចពីរផ្សេងទៀត គឺទីមួយ ដំណើរការផលិតតួរថយន្ត និងអាគុយ និង ទីពីរ ដំណើរការផលិតថាមពលអគ្គិសនី ដើម្បីយកទៅប្រើក្នុងរថយន្តអគ្គិសនី។
ការសិក្សាជាទូទៅបង្ហាញថា នៅក្នុងដំណាក់កាលនៃការផលិត រថយន្តអគ្គិសនីបង្កផលប៉ះពាល់ដល់បរិស្ថានច្រើនជាងរថយន្តធម្មតា ដោយសារតែដំណើរការផលិតរថយន្តអគ្គិសនីត្រូវបញ្ចេញឧស្ម័នកាបូនិកច្រើនជាងការផលិតរថយន្តធម្មតា៕
None
