បច្ចុប្បន្ន សម្រាប់ភាគីកម្ពុជាបានរៀបចំ និងឆ្លងកាត់ការអនុម័តនីតិវិធីផ្ទៃក្នុងរួចរាល់ហើយ នៅឡើយរង់ចាំតែភាគីកូរ៉េខាងត្បូងតែប៉ុណ្ណោះ។ ទោះយ៉ាងណាកម្ពុជារំពឹងថា កូរ៉េខាងត្បូងនឹងអាចបញ្ចប់ការរៀបចំនីតិវិធីផ្ទៃក្នុង ក្នុងពេលឆាប់ៗខាងមុខនេះ។
បន្ទាប់ពីបានចុះហត្ថលេខាផ្លូវការរួចកាលពីចុងខែតុលា ឆ្នាំ២០២១ កិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង ធ្លាប់ត្រូវបានក្រសួងពាណិជ្ជកម្មរំពឹងថា នឹងអាចចូលរជាធរមាននៅដើមឆ្នាំ២០២២ ក៏ប៉ុន្ដែ មកទល់ពេលនេះ វានៅមិនទាន់បានចូលជាធរមាននៅឡើយទេ ខណៈដែលខាងភាគីកម្ពុជាបានឆ្លងកាត់ការអនុម័តនីតិវិធីផ្ទៃក្នុងរបស់ខ្លួនរាល់អស់ហើយ នៅរង់ចាំតែខាងភាគីកូរ៉េខាងត្បូងតែប៉ុណ្ណោះ។
ឯកឧត្តម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបានគូសបញ្ជាក់ថា ការចូលជាធរមាននៃកិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូងនឹងមានភាពយឺតយ៉ាវជាងការរំពឹងទុក។ យឺតយ៉ាវ ក៏ដោយសារកូរ៉េខាងត្បូង នាមួយរយៈចុងក្រោយនេះ មានការមមាញឹកច្រើនលើការរៀបចំការបោះឆ្នោតជ្រើសរើសប្រធានាធិបតីថ្មី មកជំនួសលោក មូន ចេអ៊ីន ដែលផុតអាណត្តិ កាលពីថ្ងៃទី៩ ខែមីនា កន្លងទៅ ដែលជាហេតុធ្វើឲ្យដំណើររៀបចំនីតិវិធីផ្ទៃសម្រាប់ការផ្ដល់សច្ចាប័នសម្រាប់កិច្ចព្រមព្រៀងនេះមានការរាំងស្ទះ។
ទោះយ៉ាងណាឯកឧត្តម ប៉ែន សុវិជាតិ រំពឹងថា ក្រោយកូរ៉េខាងត្បូងជ្រើសរើសបានប្រធានាធិបតីថ្មីសម្រាប់ដឹកនាំប្រទេសវានឹងជួយជំរុញឲ្យដំណើរការចូលជាធរមាននៃកិច្ចព្រមព្រៀងនេះ នឹងចូលជាធរមាននៅក្នុងឆ្នាំនេះ។
គួរបញ្ជាក់ថា កម្ពុជានិងកូរ៉េខាងត្បូងបានចុះហត្ថលេខាលើកិច្ចព្រមព្រៀងទ្វេភាគីកម្ពុជាកូរ៉េកាលពីថ្ងៃ២៦ ខែតុលា ឆ្នាំ២០២១ បន្ទាប់ពីបានចុះហត្ថលេខាបិទបញ្ចប់កិច្ចចរចានៅអំឡុងខែកុម្ភៈ ឆ្នាំ២០២១។ ក្រៅពីកិច្ចព្រមព្រៀងនេះ កម្ពុជាក៏មានកិច្ចព្រមព្រៀងពាណិជ្ជកម្មសេរីកម្ពុជា-ចិន និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ ឬហៅកាត់ថា RCEP ដែលបានចូលជាធរមាននៅដើមឆ្នាំ២០២២នេះផងដែរ។
ក្រោមកិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង និងកិច្ចព្រមព្រៀង RCEP កម្ពុជានឹងទទួលបានការលើកលែងពន្ធប្រមាណ៩៥,៦% លើការនាំចេញផលិតផលទៅកូរ៉េខាងត្បូង ខណៈកូរ៉េខាងត្បូងនឹងទទួលបានការលើកលែងពន្ធប្រមាណ៩៣,៨% លើការនាំចូលផលិតផលមកកម្ពុជា។
សូមបញ្ជាក់ថា នៅក្នុងរយៈពេល៤ខែឆ្នាំ២០២២ ការធ្វើពាណិជ្ជកម្មរវាងកម្ពុជាជាមួយកូរ៉េខាងត្បូង សម្រេចបានក្នុងទំហំជិង៣រយលានដុល្លារកើនឡើង២៨% បើធៀបនឹងរយៈពេលដូចគ្នាកាលពីឆ្នាំ២០២១ ដែលមានជាង២៣២លានដុល្លារ។ ក្នុងនោះ កម្ពុជា នាំចេញទំនិញទៅកូរ៉េ សម្រេចបានជាង៧៥លានដុល្លារ ខណៈនាំចូលមានទំហំជាង២២២លានដុល្លារ។ នេះបើតាមទិន្នន័យពីក្រសួងពាណិជ្ជកម្មកម្ពុជា៕
