ក្នុងនោះ សហភាពអឺរ៉ុបបានសម្រេចជាគោលការណ៍នឹងដាក់ទណ្ឌកម្មលើការកាត់ផ្តាច់ការនាំចូលប្រេងពីរុស្ស៊ី រហូតដល់៩០% ទៅក្នុងប្លុករបស់ខ្លួនរហូតដល់ត្រឹមចុងឆ្នាំ ២០២២ រួមទាំងទណ្ឌកម្មផ្សេងទៀតនៅក្នុងកញ្ចប់ទណ្ឌកម្មទី៦នេះផងដែរ ដែលវាជាផ្នែកនៃទណ្ឌកម្មថ្មីចុងក្រោយបំផុតមួយ ដែលសហភាពអឺរ៉ុបបានសម្រេចនឹងដាក់ទៅលើទីក្រុងមូស្គូ ដែលបានឈ្លានពានអ៊ុយក្រែន។ នេះបើតាមការចុះផ្សាយសារព័ត៌មានធំៗជាច្រើន។
លោកស្រី Ursula Von der Leyen ប្រធានផ្នែកប្រតិបត្តិរបស់ប្លុកនេះបាននិយាយថា វិធានការដាក់ទណ្ឌកម្មនឹងកាត់បន្ថយការនាំចូលប្រេងប្រហែល ៩០% ពីរុស្ស៊ីទៅកាន់សហភាពអឺរ៉ុប រហូតដល់ចុងឆ្នាំនេះ។
ទន្ទឹមនឹងនោះ កញ្ចប់ទណ្ឌកម្មថ្មីក៏នឹងរួមបញ្ចូលនូវការបង្កកទ្រព្យសកម្ម និង ការហាមឃាត់ការធ្វើដំណើរលើបុគ្គលរុស្ស៊ីមួយចំនួនទៅកាន់សហភាពអឺរ៉ុប ខណៈដែលធនាគារធំជាងគេរបស់រុស្ស៊ីគឺ Sberbank នឹងត្រូវបានដកចេញពីប្រព័ន្ធទូទាត់អន្តជាតិ SWIFT ដែលជាប្រព័ន្ធទូទាត់ពិភពលោកដ៏សំខាន់សម្រាប់ការផ្ទេរហិរញ្ញវត្ថុអន្តជាតិ ហើយទូរទស្សន៍រដ្ឋធំៗចំនួនបីរបស់រុស្ស៊ី នឹងត្រូវបានរារាំងពីការចែកចាយខ្លឹមសារព័ត៌មានរបស់ពួកគេនៅក្នុងសហភាពអឺរ៉ុបផងដែរ។
ប្រធានក្រុមប្រឹក្សាសហភាពអឺរ៉ុប លោក Charles Michel បាននិយាយថា កិច្ចព្រមព្រៀងនៃទណ្ឌកម្មទី ៦ នេះនឹងគ្របដណ្តប់ច្រើនជាងពីរភាគបីនៃការនាំចូលប្រេងពីប្រទេសរុស្ស៊ី។ លោក Michel បានគូសបញ្ចាក់ថា ទណ្ឌកម្មថ្មីដែលត្រូវការការគាំទ្រពីប្រទេសសមាជិកទាំង ២៧ នឹងត្រូវបានអនុម័តដោយជាស្ថាពរនៅថ្ងៃពុធ សប្តាហ៍នេះ។ លោកបានបន្ថែមថា មេដឹកនាំនៃរដ្ឋជាសមាជិក ក៏បានយល់ព្រមផ្តល់ជំនួយថវិកាដល់អ៊ុយក្រែនចំនួនជិត១០ពាន់លានដុល្លារបន្ថែមទៀត ដើម្បីគាំទ្រសេដ្ឋកិច្ចរបស់ប្រទេស ដែលហែកហួរដោយសារសង្គ្រាមមួយនេះផងដែរ។ ប៉ុន្តែមិនមានការបញ្ចាក់ណាមួយថា តើប្រាក់នេះនឹងផ្តល់ជាជំនួយ ឬជាកម្ចីនោះទេ។
អត្ថបទគួរអាន
យ៉ាងណាមិញ សេចក្តីអនុម័តនៃទណ្ឌកម្មទី ៦ នឹងគ្របដណ្តប់លើការហាមឃាត់ប្រេងរុស្ស៊ី ដែលនាំមកតាមសមុទ្រ ក៏ប៉ុន្តែនឹងអនុញ្ញាតឱ្យមានការលើកលែង បណ្តោះអាសន្នសម្រាប់ការនាំចូលដែលបញ្ជូនតាមបំពង់បង្ហូរប្រេង ដើម្បីនាំចូលទៅកាន់ប្រទេសហុងគ្រី។
គួររំឭកថា កញ្ចប់ទណ្ឌកម្មទី៦ បានប្រកាសកាលពីថ្ងៃទី ៤ ឧសភា ដែលមានទិសដៅធំចង់ហ៊ុមព័ទ្ធប្រេងរុស្ស៊ី ដែលកន្លងមកសំណើនេះត្រូវបានជាប់គាំងមកអស់ជារយៈពេលជិត ១ខែមកហើយ ដោយសារប្រទេសហុងគ្រី បានបដិសេធវិធានការនេះ ហើយបានអះអាងថា ខ្លួនអាចគាំទ្រការដាក់ទណ្ឌកម្មថ្មីនេះបាន លុះត្រាតែសន្តិសុខផ្គត់ផ្គង់ប្រេងរបស់ប្រទេសហុងគ្រីត្រូវបានធានា។
ការជាប់គាំងបានធ្វើឱ្យប្លុកនេះរងការអាម៉ាស់យ៉ាងខ្លាំង ដែលត្រូវបានបង្ខំឱ្យកាត់បន្ថយមហិច្ឆតារបស់ខ្លួន ដើម្បីបញ្ចុះបញ្ចូលការប្រឆាំងរបស់ហុងគ្រីឲ្យយល់ពេលទៅលើការបញ្ឈប់ការនាំចូលប្រេងពីទីក្រុងម៉ូស្គូ។
គួរជម្រាបថា សហភាពអឺរ៉ុបបានដាក់ទណ្ឌកម្មលើកមុនចំនួន ៥ លើករួចមកហើយលើរុស្ស៊ី ជុំវិញការបង្កើតសង្គ្រាមឈ្លានពានអ៊ុយក្រែន។ ទណ្ឌកម្មទាំងនោះរួមមាន ការបង្កកទ្រព្យសម្បត្តិបុគ្គលជាង ១ ពាន់នាក់ រួមទាំងប្រធានាធិបតីរុស្ស៊ី លោក វ្ល៉ាឌីមៀ ពូទីន និង មន្ត្រីរដ្ឋាភិបាលកំពូល ក៏ដូចជាក្រុមអភិជនដែលគាំទ្រវិមានក្រឹមឡាំង ធនាគារ វិស័យធ្យូងថ្ម និង ផ្នែកសំខាន់ៗជាច្រើនទៀតផងដែរ៕
None
