គិតមកទល់ពេលនេះ មានរយៈពេលជាង ១សប្ដាហ៍ហើយ ដែលសហភាពអឺរ៉ុបបានលើកសំណើដាក់ទណ្ឌកម្មលើកទី៦ចំពោះប្រទេសរុស្ស៊ី ប៉ុន្ដែសំណើនេះនៅតែស្ថិតក្នុងការពិភាក្សារវាងរដ្ឋជាសមាជិក មិនទាន់មានការសម្រេចនៅឡើយទេ ដ្បិតថា មានមានសមាជិកខ្លះ មិនយល់ព្រមលើសំណើនេះឡើយ ព្រោះថាការផ្ដាច់ប្រេងពីរុស្ស៊ី នឹងអាចធ្វើឲ្យពួកគេជួបបញ្ហាសេដ្ឋកិច្ច ដ្បិតថាពួកគេរស់ពឹងផ្អែកលើប្រេងពីរុស្ស៊ីស្ទើរតែទាំងស្រុង។ នេះបើតាមការចុះផ្សាយសារព័ត៌មាន Euronews។
ប្រធានគណៈកម្មការសហភាពអឺរ៉ុបលោកស្រី Ursula von der Leyen បានបង្ហាញជាលើកដំបូងនូវសំណើទណ្ឌកម្មទី ៦កាលពីថ្ងៃពុធសប្តាហ៍មុន ដោយបានលើកឡើង ពីបញ្ហាស្មុគស្មាញបំផុតនៃទណ្ឌកម្មថ្មីដែលត្រូវដាក់ទៅលើរុស្ស៊ី ដែលផ្តោតលើការហាមឃាត់ការនាំចូលប្រេងពីរុស្ស៊ីឲ្យបាននៅក្នុងរយៈពេល ៦ ខែខាងមុខនេះ។
ប្រភពគណៈកម្មាការរបស់សហភាពអឺរ៉ុបមួយរូប បានអះអាងប្រាប់សារព័ត៌មាន Euronews ថា បញ្ហាជាប់គាំងនៃទណ្ឌកម្មទី៦ នេះ ដោយសារប្រទេសហុងគ្រី និងស្លូវ៉ាគី និងសាធារណរដ្ឋឆេក មិនព្រមទទួលយកសំណើរបស់គណៈកម្មការសហភាពអឺរ៉ុបនោះឡើយ។
មែនទែនទៅ គណកម្មការបានបើកកិច្ចសន្ទនាជាន់ខ្ពស់ជាមួយប្រទេសហុងគ្រី និងស្លូវ៉ាគី និងសាធារណរដ្ឋឆេក មុនពេលការប្រកាសនូវទណ្ឌកម្មនេះផងដែរ ។
ក៏ប៉ុន្តែ ក្នុងរយៈពេលប៉ុន្មានម៉ោង នៃការដាក់ជូនសេចក្ដីព្រាងចុងក្រោយនៃសំណើទណ្ឌកម្ម ទៅកាន់ឯកអគ្គរដ្ឋទូតនៃរដ្ឋនីមួយៗ សម្រាប់តែមានការប្រកែកតវ៉ាក៏បានកើតមានឡើងចេញពីប្រទេសទាំង ៣ ខាងលើនេះ ដោយពួកគេ បានស្នើពន្យារពេលបន្ថែមលើការឈប់ទិញប្រេងពីរុស្ស៊ី ដែលកំណត់ត្រឹមឆ្នាំ២០២៣ មកកំណត់នៅឆ្នាំ២០២៥វិញ ព្រោះថា ប្រទេសទាំងបីនេះ ពឹងផ្អែកខ្លាំងណាស់លើប្រេងពីរុស្ស៊ី។
អត្ថបទគួរអាន
ឥឡូវនេះ កិច្ចពិភាក្សាលើសេក្ដីសម្រេចសំណើទណ្ឌកម្មនេះ បានអូសបន្លាយមក១សប្ដាហ៍ហើយ ហើយកិច្ចចរចាត្រូវបានគេមើលឃើញថា គឺមានដំណើរការយឺតមែនទែន ខណៈដែលគណកម្មការអឹរ៉ុប កំពុងសម្រុកធ្វើកិច្ចការងារពីក្រោយឆាក ដើម្បីជួយសម្រុះសម្រួលឲ្យសមាជិកទាំងអស់មានការសម្រេចរួមគ្នាលើសំណើទណ្ឌកម្មថ្មីនេះ។
គួរំលឹងថា ប្រទេសហុងគ្រី និង ស្លូវ៉ាគី ក៏ដូចជាសាធារណរដ្ឋឆេក ជាប្រទេសដែលមានការពឹងផ្អែកទៅលើប្រេងរបស់រុស្ស៊ីយ៉ាងខ្លាំង ហើយប្រទេសហុងគ្រីគឺស្ថិតក្នុងចំណោមរដ្ឋជាសមាជិកសហភាពអឺរ៉ុបមួយចំនួន ដែលបានច្រានចោលទណ្ឌកម្មថាមពលប្រឆាំងនឹងទីក្រុងម៉ូស្គូចាប់តាំងពីរុស្ស៊ីមានការលុកលុយនៅអ៊ុយក្រែននៅថ្ងៃដំបូងមកម្ល៉េះ។
ដោយឡែក ឯកអគ្គរដ្ឋទូតអ៊ុយក្រែនប្រចាំនៅសហភាពអឺរ៉ុប លោក សេវូឡូដ ឆិនសូវ (Vsevolod Chentsov) បានគូសបញ្ចាក់ថា បណ្តាប្រទេសជាសមាជិកសហភាពអឺរ៉ុបទាំងអស់គួរតែត្រៀមខ្លួនទៅលើការ ពលីសេដ្ឋកិច្ច និងត្រូវអនុម័តទៅលើការហាមឃាត់ការនាំចូលប្រេងពីរុស្ស៊ីឲ្យបានម៉ឺងម៉ាត់ ដើម្បីបង្ហាញពីការប្រឆាំងទៅលើទង្វើឈ្លានពានដ៏គគ្លើនរបស់រុស្ស៊ីមកលើអ៊ុយក្រែន៕
អត្ថបទ៖ វ៉ាន់ ស្រីរ័ត្ន
None
