ថ្លែងប្រាប់អ្នកសារព័ត៌មាននៅទីក្រុងភ្នំពេញ ឯកឧត្ដម អ៊ិត សំហេង រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវៈ បានមានប្រសាសន៍ថា ការជ្រើសរើសអ្នកធ្វើការតាមផ្ទះគឺធ្វើឡើងតាមការស្ម័គ្រចិត្ត ហើយបានបន្តថា ប្រហែលខែក្រោយ កម្ពុជានឹងបញ្ជូនចំនួន២០នាក់ ជាលើកដំបូង។
ឯកឧត្ដម អ៊ិត សំហេង មានប្រសាសន៍ដូច្នេះ ថា៖ «២០នាក់ នឹងចេញទៅដំបូង។»
ឯកឧត្តម អ៊ិត សំហេង ថ្លែងថា នេះគឺជាក្រុមទីមួយដែលត្រូវចេញទៅ និងបានអះអាងថា ការផ្សព្វផ្សាយបានធ្វើរួចហើយអំពីតម្រូវការផ្នែកអ្នកធ្វើការតាមផ្ទះនៅហុងកុង។
ឯកឧត្តម អ៊ិត សំហេង មានប្រសាសន៍ដូច្នេះ ថា៖ «សំខាន់ថា តើមាននរណាខ្លះដែលចង់ទៅធ្វើការនៅទីនោះ? វាស្ថិតទៅតាមការស្ម័គ្រចិត្តរបស់ពួកគេ។»
តើអ្នកបានអានអត្ថបទនេះ ឬនៅ?
ហុងកុង បានចុះកិច្ចព្រមព្រៀងជាមួយកម្ពុជា នៅឆ្នាំនេះ ដើម្បីយកអ្នកធ្វើការតាមផ្ទះពីកម្ពុជា ចំនួនប្រមាណជា ១ពាន់នាក់ សម្រាប់រយៈពេលពីរទៅបីឆ្នាំខាងមុខ ដើម្បីយកទៅធ្វើការនៅទីក្រុងហុងកុង ដែលកំពុងតែជួបប្រទះកង្វះអ្នកធ្វើការតាមផ្ទះ។
ឯកឧត្ដម អ៊ិត សំហេង ធ្លាប់បានមានប្រសាសន៍ថា ប្រាក់ឈ្នួលប្រចាំខែអប្បបរមាសម្រាប់ស្ត្រីបម្រើតាមផ្ទះនៅហុងកុង មានចំនួន ៥៥០ដុល្លារ និងលក្ខខណ្ឌការងារប្រសើរជាងប្រទេសផ្សេងទៀត។
យោងតាមតួលេខផ្លូវការ មានអ្នកធ្វើការតាមផ្ទះចំនួន ៣២ម៉ឺននាក់នៅហុងកុង គិតត្រឹមឆ្នាំ២០១៣ ដែលពួកគេមកពីប្រទេសហ្វ៊ីលីពីន ឥណ្ឌូនេស៊ី និងថៃ៕
