ប្រធានគណៈកម្មការអឺរ៉ុប លោកស្រី វ៉នឌឺលែន បានថ្លែងនៅក្នុងសន្និសីទសារព័ត៌មានថា ពេលនេះប្រទេសសមាជិកសហភាពអឺរ៉ុបជាច្រើនកំពុងជួបប្រទះនឹងការឆ្លងកូវីដ-១៩ រលកទី៣ ហើយយើងចង់ពន្លឿនការចាក់វ៉ាក់សាំងឲ្យបានឆាប់រហ័ស ហើយយើងចង់ធានាឲ្យបានថា ពលរដ្ឋនៅសហភាពអឺរ៉ុបនឹងទទួលបានការចាក់វ៉ាក់សាំងទាំងអស់គ្នា។
លោកស្រី ឌឺលែនបន្តថា EU ត្រូវផ្អាកការនាំចេញវ៉ាក់សាំងទៅប្រទេស ដែលជាអ្នកផលិតវ៉ាក់សាំងដូចគ្នាសិន។ ក្នុងន័យនេះ EU ចង់សំដៅដល់ អង់គ្លេសដែលជារឿយៗត្រូវបានប្រទេសនៅអឺរ៉ុបរិះគន់ពីភាពយឺតយ៉ាវ ក្នុងការដឹកជញ្ជូនវ៉ាក់សាំងរបស់ខ្លួនដល់ប្រទេសនៅសហភាពអឺរ៉ុប រួមមាន អាល្លឺម៉ង់ បារាំង អ៊ីតាលី ជាដើម។
អត្ថបទគួរអាន
គួររំឭកថាកន្លងមក EU បាននាំចេញវ៉ាក់សាំងរបស់ខ្លួនចំនួនជាង ១០លានដូសរួចហើយទៅឲ្យអង់គ្លេស ស្របពេលដែល EU កំពុងរង់ចាំវ៉ាក់សាំងជាច្រើនលានដូសពីអង់គ្លេសវិញដែរ។
ជាការឆ្លើយតប រដ្ឋមន្ត្រីក្រសួងការបរទេសអង់គ្លេស លោក ដូមីនីក រ៉ាប (Dominic Rabb) បានលើកឡើងថា សហភាពអឺរ៉ុបធ្វើបែបនេះ គឺកំពុងរុញឲ្យអង់គ្លេសជួបទុក្ខលំបាកហើយ ខណៈបច្ចុប្បន្នអង់គ្លេសកំពុងមានអ្នកឆ្លងកូវីដ-១៩ជាច្រើន។ អង់គ្លេស បានស្នើឲ្យមានបកស្រាយអំពីបញ្ហានេះឲ្យបានច្បាស់ ដោយរំពឹងថា EU នឹងធានាបានពីការផ្គត់ផ្គង់ និងគោរពតាមកិច្ចសន្យាដែលបានចុះហត្ថលេខារវាងគ្នា។
សូមបញ្ជាក់ថា ប្រទេសនៅអឺរ៉ុបជាច្រើនមកដល់ពេលនេះ នៅតែបន្តប្រឈមនឹងវិបត្តិជំងឺកូវីដ រលកទី៣ រាលដាលឆ្លងខ្លាំងដដែល ជាក់ស្តែងនៅទីក្រុងបារីស ប្រទេសបារាំង និងតំបន់ជុំវិញក្រុងប៉ារីស កំពុងមានស្ថានភាពធ្ងន់ធ្ងរយ៉ាងខ្លាំង ខណៈប្រទេសអ៊ីតាលីបានប្រកាសបិទប្រទេស (Lockdown) ម្តងទៀតហើយ ក្នុងសប្ដាហ៍នេះដោយសារតែរលកឆ្លងលើកទី៣កំពុងរាតត្បាតខ្លាំង៕
None
