ទន្ទឹមនឹងការស្នើឲ្យបង្កើនការផ្តល់សព្វាវុធ អឺរ៉ុបក៏បានបើកផ្លូវ និងជួយសម្រួលដល់ដំណើរការស្នើសមាជិកភាពអ៊ុយក្រែនមកកាន់ប្លុកទាំង២៧ប្រទេសផងដែរ។ ប្រមុខដឹកនាំអឺរ៉ុបរូបនេះ បង្ហើបឲ្យដឹងដែរថា ធនាគារ Sberbank ដ៏មានឥទ្ធិពលរបស់រុស្ស៊ី និងរួមបញ្ចូលការហ៊ុមព័ទ្ធប្រេងរបស់រុស្ស៊ី អាចជាគោលដៅទណ្ឌកម្មបន្ទាប់របស់ខ្លួន។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។
លោកស្រី វ៉ុនឌឺលីយេន ប្រធានគណៈកម្មការអឺរ៉ុប បានប្រាប់សារព័ត៌មានថា៖ រដ្ឋជាសមាជិកអាចអនុវត្តបែបនេះទាំងអស់គ្នា ពោលគឺ អ្នកណាដែលអាចបញ្ជូនសព្វាវុធទៅបាន សូមបញ្ចូនឲ្យបានឆាប់រហ័ស ពីព្រោះមានតែវិធីនេះទេ ដែលអ៊ុយក្រែនអាចរស់រានបាននៅក្នុងសមរភូមិ ការពារទឹកដីប្រឆាំងនឹងរុស្ស៊ីបាន។
ការជំរុញរបស់ថ្នាក់ដឹកនាំសហភាពអឺរ៉ុបដូចនេះ ធ្វើឡើងនៅក្រោយបណ្តាប្រទេសសមាជិកមួយចំនួន ទោះបីសង្គ្រាមផ្ទុះឡើងចូលជិត២ខែហើយក្តី នៅហាក់បីដូចជាមានការស្ទាក់ស្ទើរជុំវិញការផ្តល់អាវុធធុនធ្ងន់ ដូចជារថក្រោះ ឬយន្តហោះចម្បាំងទៅឲ្យអ៊ុយក្រែន ដោយព្រួយបារម្ភថា ទង្វើបែបនេះអាចធ្វើឲ្យសង្គ្រាមនៅអ៊ុយក្រែន ក្លាយជាជម្លោះផ្ទាល់រវាងរុស្ស៊ី និង រដ្ឋសមាជិកអឺរ៉ុប ឬ អង្គការណាតូ។
ទោះបីជាបែបនេះក្តី លោកស្រី វ៉ុនឌឺលីយេន នៅតែជំរុញឱ្យមេដឹកនាំអឺរ៉ុបកុំពន្យារពេលលើការសម្រេចចិត្តដ៏សំខាន់មួយនេះ ទោះបីជាសព្វាវុធទាំងនោះជាប្រភេទធុនធ្ងន់ក្តី ឬ ស្រាលក្តី។ លោកស្រីប្រធានគណៈកម្មការអឺរ៉ុប លើកឡើងយ៉ាងដូច្នេះថា៖ «ខ្ញុំមិនបែងចែករវាងអាវុធធុនធ្ងន់ និងស្រាលទេ អ៊ុយក្រែនត្រូវតែទទួលបានអ្វីដែលគេត្រូវការដើម្បីការពារខ្លួន។»
អត្ថបទគួរអាន
ដោយឡែកនៅក្នុងសុន្ទរកថាជាវីដេអូ ទៅកាន់ប្រជាជនកាលពីចុងសប្តាហ៍មុននេះប្រធានាធិបតីអ៊ុយក្រែន លោកហ្សេលេនស្គី បានទទូចឡើងវិញថា អ៊ុយក្រែនត្រូវការជំនួយផ្នែកសម្ភារៈយោធាបន្ថែមទៀតពីលោកខាងលិច ដើម្បីមានឱកាសជួយសង្គ្រោះទីក្រុង Mariupol ដែលត្រូវបានឡោមព័ទ្ធ និង ស្ទើតែធ្លាក់ទៅក្នុងដៃរុស្ស៊ីទៅហើយ។
គួរជម្រាបថា សាធារណរដ្ឋឆេក កាលពីដើមខែមេសានេះបានក្លាយជាប្រទេសដំបូងគេរបស់ ណាតូ ដែលបានបញ្ជូនរថក្រោះទៅកាន់អ៊ុយក្រែនចាប់តាំងពីការចាប់ផ្តើមនៃសង្គ្រាមនៅថ្ងៃទី ២៤ ខែកុម្ភៈ។ ក្រោយមកប្រទេស ស្លូវ៉ាគី បានផ្តល់ប្រព័ន្ធការពារដែនអាកាសប្រភេទ S-300 ខណៈសហរដ្ឋអាមេរិកបានប្រកាសកាលពីថ្ងៃពុធសប្តាហ៍មុនថា ខ្លួននឹងផ្គត់ផ្គង់អ៊ុយក្រែន ជាមួយនឹងឧទ្ធម្ភាគចក្រ យន្តហោះចម្បាំង និង អាវុធធន់ធ្ងន់ផ្សេងទៀតឲ្យអ៊ុយក្រែន។
រុស្ស៊ីវាយបានស្ទើរទាំងស្រុងក្រុងកំពង់ផែម៉ារីយ៉ូប៉ូល តែអ៊ុយក្រែនថាមិនចុះចាញ់
ភាគីអ៊ុយក្រែនបាននិយាយថា កងកម្លាំងការពារក្រុងម៉ារីយ៉ូប៉ូលត្រូវបានឡោមព័ទ្ធដោយកងទ័ពរុស្ស៊ី ប៉ុន្តែពួកគេមិនបានចុះចាញ់ និងបោះបង់ចោលទីក្រុងកំពង់ផែដ៏សំខាន់មួយនេះទេ។ ការអះអាងបែបនេះ ធ្វើឡើងតែប៉ុន្មានម៉ោងប៉ុណ្ណោះបន្ទាប់ពីរដ្ឋាភិបាលក្រុងកៀវ បានព្រមានថារុស្ស៊ីអាចធ្វើប្រតិបត្តិការកងទ័ពជើងទឹកតាមរយៈកំពង់ផែក្រុងមួយនេះ និង ការវាយប្រហារតាមអាកាសបន្ថែមផងដែរ។
រុស្ស៊ីប្រកាសវាយយកបានស្ទើរទាំងស្រុងទៅហើយ ទីក្រុងយុទ្ធសាស្ត្រម៉ារីយូប៉ូល។ ក្រសួងការពារជាតិរុស្ស៊ីបានអំពាវនាវឲ្យទាហានអ៊ុយក្រែន នៅទីក្រុងមួយនេះទម្លាក់អាវុធចុះ សុំចុះចាញ់ទៅ នោះទើបទាហានអ៊ុយក្រែននឹងនៅសល់ជីវិតរស់នៅ។
ម៉ារីយូប៉ូលដែលស្ថិតក្រោមការវាយប្រហារពីគ្រប់ទិសរបស់ទាហានរុស្ស៊ី តាំងពីសង្គ្រាមឈ្លានពានរបស់រុស្ស៊ីលើអ៊ុយក្រែន កំពុងជួបបញ្ហា គ្មានទឹក គ្មានអាហារ និងថ្នាំពេទ្យ។ អង្គការកម្មវិធីស្បៀងអាហារពិភពលោកបានវាយតម្លៃថា មានប្រជាជនស៊ីវិលជាង ១សែននាក់កំពុងស្ថិតនៅមាត់ជ្រោះ ខ្វះចំណីអាហារ ខ្វះទឹក និងម៉ាស៊ីនកំដៅ។
សូមជម្រាបថា ទីក្រុងកំពង់ផែម៉ារីយូប៉ូលជាទីក្រុងយុទ្ធសាស្ត្រដ៏សំខាន់ដែលរុស្ស៊ី តែងចង់បានជាយូរមកហើយ។ បើសិន ម៉ារីយូប៉ូលធ្លាក់ក្រោមការកាន់កាប់របស់រុស្ស៊ីទាំងស្រុងមែន នោះរុស្ស៊ីនឹងអាចពង្រឹងតំបន់ភាគខាងត្បូងអ៊ុយក្រែនដែលនៅជាប់នឹងសមុទ្រ Azov ជាទីដែលរុស្ស៊ីវាយដណ្តើមកាន់កាប់បានកន្លងមក។ វាក៏នឹងបើកផ្លូវឲ្យរុស្ស៊ី អាចតភ្ជាប់តំបន់គ្រីមេដែលរុស្ស៊ីបានកាត់យកពីអ៊ុយក្រែន នៅឆ្នាំ២០១៤ ទៅកាន់តំបន់ដុនបាស់ ភាគខាងកើតអ៊ុយក្រែនផងដែរ៕
None
