ការព្រមានរបស់សហភាពអឺរ៉ុបនេះ ធ្វើឡើងបន្ទាប់ពីមានការចោទប្រកាន់តាមរយៈតួរលេខធុរកិច្ចរបស់ប្រទេសលីទុយអានី ដែលបានបង្ហាញថា មន្ត្រីគយចិនបាននិងកំពុងរារាំងទំនិញរបស់លីទុយអានីមិនឱ្យនាំចេញ ឬនាំចូលទៅកាន់ប្រទេសចិននោះទេ។ សហភាពអឺរ៉ុបបានបញ្ជាក់ថា ខ្លួនកំពុងស៊ើបអង្កេតការចោទប្រកាន់នេះ ហើយបានព្រមានទៀតថា ប្រសិនបើ ការចោទនេះពិតជាត្រឹមត្រូវមែន នោះ ទំនាក់ទំនងរបស់លីទុយអានីជាមួយចិន ក៏នឹងជះឥទ្ធិពលទៅលើទំនាក់ទំនង អឺរ៉ុប-ចិនទាំងមូលផងដែរ។
ទន្ទឹមនេះ ក្រុមហ៊ុននាំចេញរបស់ប្រទេសលីទុយអានីមួយចំនួនបានត្អូញត្អែរថា ប្រទេសលីទុយអានីត្រូវបានលុបចោល ពីប្រព័ន្ធគយរបស់ចិនរួចទៅហើយ។ ប្រការនេះ បានធ្វើឱ្យ ការនាំចេញទំនិញកំពុងធ្លាក់ចុះនៅតាមកំពង់ផែរបស់ចិន ខណៈពេលដែលការចំណាយសំខាន់ៗសម្រាប់ការនាំចេញក៏កំពុងតែកើតឡើង ហើយចាប់តាំងពីសប្តាហ៍មុនមកមាន ៨០ ភាគរយនៃទំនិញពីប្រទេសលីទុយអានីដែលត្រូវដឹកចេញទៅចិន នៅមិនទាន់ត្រូវបានដឹកជញ្ជូនចេញទៅនៅឡើយទេ។ ទាក់ទិននឹងបញ្ហានេះ ក្រុមហ៊ុនបញ្ជាទិញចិន បានលើកឡើងថា មូលហេតុ គឺដោយសារតែកំហុសបច្ចេក។
យ៉ាងណាក៏ដោយចុះ រដ្ឋមន្ត្រីក្រសួងហិរញ្ញវត្ថុ លីទុយអានី បាននិយាយថា ការនាំចេញរបស់លីទុយអានី ទៅចិនគឺមានតិចជាង១%ប៉ុណ្ណោះ នៃការនាំចេញសរុប ដូច្នេះ វាមិនមានផលប៉ះពាល់ជាមូលដ្ឋានលើសេដ្ឋកិច្ចរបស់ខ្លួននោះទេ។អត្ថបទគួរអាន
មែនទែនទៅ ទំនាក់ទំនងរវាងចិន និងប្រទេសលីទុយអានី បានចាប់ផ្ដើមអាប់អួរខ្លាំង ចាប់តាំងពីពេលដែលប្រទេសលីទុយអានីមានកិច្ចខិតខំប្រឹងប្រែងខ្លាំងមែនទែន នៅក្នុងការពង្រីកទំនាក់ទំនងជាមួយកោះតៃវ៉ាន់ ពោលគឺ បន្ទាប់ពីសមាជិកសភាប្រទេសអឺរ៉ុបមួយនេះ បានធ្វើដំណើរទស្សនកិច្ចទៅកាន់កោះតៃវ៉ាន់ ដែលសកម្មភាពនេះត្រូវបានរដ្ឋាភិបាលក្រុងប៉េកាំង ចាត់ទុកថាជា ការប្រឆាំងជាមួយប្រទេសចិន។ រដ្ឋាភិបាលចិនអះអាងថា ប្រទេសលីទុយអានីបានបំពានគោលនយោបាយចិនតែមួយដែលគោលនយោបាយនេះ ក៏ត្រូវបានទទួលស្គាល់ដោយសហភាពអឺរ៉ុបផងដែរ។
យ៉ាងណាមិញ ចំពោះដំណោះស្រាយជុំវិញបញ្ហានេះ សហភាពអឺរ៉ុបប្រហែលជាមានសមត្ថភាពតិចតួចណាស់ ដែលអាចដោះស្រាយអំពីស្ថានភាពនេះក្នុងរយៈពេលខ្លីបាន ហើយប្រសិនបើអឺរ៉ុបជ្រើសរើស បើក សំណុំរឿងនេះនៅ អង្គការពាណិជ្ជកម្មពិភពលោក WTO ទោះបីជា ដំណើរការលឿនក៏ដោយ ក៏វាអាចនឹងចំណាយពេលរាប់ខែដែរ។ ដូចនេះ ការកាំរកូសនៃការនាំការចេញទំនិញរបស់លីទុយអានីទៅកាន់ប្រទេសចិន អាចនឹងអូសប្រឡាយកាន់តែយូរថែមទៀត៕
អត្ថបទ ស៊ើង និមល់
None
