ធនាគារកណ្តាលអឺរ៉ុប (ECB) បានព្រមានថា បណ្ដាទីផ្សារមាសអាចគំរាមកំហែងដល់ស្ថិរភាពហិរញ្ញវត្ថុរបស់តំបន់ចាយប្រាក់អឺរ៉ូ ប្រសិនបើភាពតានតឹងផ្នែកភូមិសាស្ត្រនយោបាយពិភពលោកកាន់តែកើនឡើងកម្ដៅ។ អ្នកជំនាញសេដ្ឋកិច្ចចំនួន៤រូបនៃធនាគារកណ្តាលអឺរ៉ុប (ECB) បានសរសេរក្នុងរបាយការណ៍មួយចេញផ្សាយកាលពីថ្ងៃទី១៩ ខែឧសភា ថា តម្រូវការខ្ពស់នៃដុំមាសពិតជាក់ស្ដែងដែលភាគច្រើនស្ថិតក្រោមការគ្រប់គ្រងរបស់ឈ្មួញធំៗ គួបផ្សំជាមួយកង្វះតម្លាភាពនៃការជួញដូរមាសទាំងនោះ បង្កការគំរាមកំហែងកាន់តែធំ ប្រសិនបើទីផ្សារមាសជួបបញ្ហា។
អ្នកជំនាញសេដ្ឋកិច្ចទាំងនេះ បានលើកឡើងថា ប្រសិនបើមានស្ថានការណ៍ដ៏អាក្រក់កើតឡើង បណ្ដាទីផ្សារមាសអាចនឹងជះផលប៉ះពាល់ដល់ស្ថិរភាពហិរញ្ញវត្ថុ។ ហានិភ័យទាំងនោះកើតចេញពីក្រុមហ៊ុនធំៗមួយចំនួនដែលគ្រប់គ្រងទីផ្សារមាស ការប្រើប្រាស់ច្រើនលើសលប់នៃប្រាក់ដែលបណ្ដាវិនិយោគិនបានខ្ចី និងកង្វះតម្លាភាពពីការជួញដូរមាសដោយផ្ទាល់រវាងភាគីអ្នកលក់ និងភាគីអ្នកទិញដោយមិនបានឆ្លងកាត់ផ្សារហ៊ុន។
គួររំឭកថា ហាងឆេងមាសនៅលើទីផ្សារអន្តរជាតិ បានហក់ឡើងឈានដល់កម្រិតកំណត់ត្រា៣,៥០០ដុល្លារអាម៉េរិក ក្នុងមួយអោន ឬជិត៤,២៧០ដុល្លារអាម៉េរិក ក្នុងមួយតម្លឹងកាលពីខែមេសា បន្ទាប់ពីប្រធានាធិបតីអាម៉េរិក លោក ដូណាល់ ត្រាំ បានប្រកាសដំឡើងពន្ធគយបដិការលើបណ្ដាប្រទេសជាដៃគូពាណិជ្ជកម្មទូទាំងពិភពលោក។ ហើយទោះបីជាហាងឆេងមាសបានធ្លាក់ចុះចាប់តាំងពីពេលនោះមកយ៉ាងណាក្ដី ក៏អ្នកជំនាញសេដ្ឋកិច្ចទាំងនេះនៅតែមើលឃើញពីហានិភ័យនៅឡើយ។
ក្រុមអ្នកជំនាញសេដ្ឋកិច្ចដែលមកពីធនាគារកណ្តាលអឺរ៉ុប (ECB) នេះបានព្រមានថា ប្រសិនបើបណ្ដាវិនិយោគិនដែលប្រើប្រាស់ប្រាក់កម្ចីដើម្បីទិញចូលមាស ត្រូវបង្ខំចិត្តលក់ចេញមាសទាំងខាតដើម វានឹងបង្កការជ្រួលច្របល់ដែលអាចជះផលប៉ះពាល់ដល់ប្រព័ន្ធហិរញ្ញវត្ថុទាំងមូលរបស់តំបន់ចាយប្រាក់អឺរ៉ូ។ អ្នកជំនាញទាំងនេះបានបន្ថែមទៀតថា បញ្ហានៅក្នុងទីផ្សារមាសដែលជួញដូរដុំមាសពិតជាក់ស្ដែងដូចជាការពន្យារពេលប្រគល់មាសជាដើម អាចនឹងធ្វើឱ្យស្ថានការណ៍កាន់តែអាក្រក់ថែមទៀត៕
ដោយ: តែម សុខុម
