បញ្ហាកូវីដ១៩ បានធ្វើឲ្យវិស័យដឹកជញ្ជូននៅកម្ពុជា ជួបបញ្ហាប្រឈម ដូចជា ការកើនឡើងនៃថ្លៃដឹកជញ្ជូនទំនិញ និងការខ្វះទូកុងតឺន័រ ជាដើម ហើយក្រុមអ្នកជំនាញអះអាងថា បើសិនបញ្ហាសង្គ្រាមរវាងរុស្សី-អ៊ុយក្រែន បន្តអូសបន្លាយកាន់តែយូរទៀត នោះវាអាចនឹងកាន់តែប៉ះពាល់ខ្លាំង ដល់វិស័យដឹកជញ្ជូននៅកម្ពុជា ដោយសារការកើនឡើងនៃតម្លៃប្រេង។
គិតមកដល់ពេលនេះ សង្គ្រាមរវាងរុស្សី-អ៊ុយក្រែន បានអូសបន្លាយអស់រយៈពេលជាង២០ថ្ងៃ មកហើយ និងបានធ្វើឲ្យសេដ្ឋកិច្ចពិភពលោករង្គោះរង្គើយ៉ាងខ្លាំង ដោយសារទំនិញមួយចំនួន ដូចជា ប្រេង ឧស្ម័ន និងមាស ជាដើម សុទ្ធតែបានឡើងថ្លៃ។ ដោយឡែក សម្រាប់កម្ពុជា វិញក៏បានរងផលប៉ះពាល់ដែរ ដូចជា ការកើនឡើងនៃតម្លៃប្រេងសាំងជាបន្តបន្ទាប់ ចាប់ពីមានការផ្ទុះឡើងនៃសង្គ្រាមរវាងរុស្សី និងអ៊ុយក្រែន ដែលបានជះឥទ្ធិពលដល់ជីវភាពប្រជាពលរដ្ឋផងដែរ។
អ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាល និងជាអគ្គនាយកនៃក្រុមហ៊ុន World Bridge Group បានកត់សម្គាល់ឃើញថា វិស័យដឹកជញ្ជូន គឺជាសរសៃឈាមសេដ្ឋកិច្ច ដែលជួយសម្រួលសេដ្ឋកិច្ចរបស់ប្រទេសនីមួយៗ ហើយវិស័យឡូជីស្ទីក ជាចលករនៃការជំរុញកំណើនសេដ្ឋកិច្ច។ អ្នកឧកញ៉ា សៀ ឫទ្ធី បានគូសបញ្ជាក់ថា វិបត្តិកូវីដ១៩ និងបញ្ហាសង្គ្រាមរវាងរុស្សី និងអ៊ុយក្រែន បានជះឥទ្ធពលមួយចំនួនដល់វិស័យឡូជីស្ទីក ពិសេសប៉ះពាល់ដល់តម្លៃដឹកជញ្ជូន។ អ្នកជំនួញដ៏ល្បីឈ្មោះក្នុងវិស័យឡូជីស្ទិករូបនេះ បានពន្យល់ដូច្នេះ ស្របពេលតម្លៃប្រេង និងហ្គាស កើនឡើង ក៏បានធ្វើឲ្យតម្លៃខ្សែច្រវ៉ាក់ផលិតកម្មកើនឡើងដែរ ខណៈពេលនេះ តម្លៃដឹកជញ្ជូនតាមផ្លូវទឹក បានកើនឡើងប្រមាណ ១០% ទៅហើយ ហើយវាអាចនឹងកើនឡើងបន្ថែមទៀត បើសិនបញ្ហានេះនៅតែបន្តអូសបន្លាយ។
អត្ថបទគួរអាន
ដោយឡែក លោកឧកញ៉ា ស៊ិន ចន្ធី ប្រធានសមាគមភស្ដុភារកម្មកម្ពុជា បានគូសបញ្ជាក់ដូច្នេះ បញ្ហាសង្គ្រាមរវាងរុស្សី និងអ៊ុយក្រែន ហាក់មិនសូវជះឥទ្ធិពលខ្លាំងដល់វិស័យដឹកជញ្ជូន និងឡូជីស្ទីកនៅកម្ពុជា ដូចនឹងបញ្ហាកូវីដ១៩ ដែលធ្វើឲ្យសកម្មភាពនៃការដឹកជញ្ជូនមួយចំនួន ត្រូវផ្អាកសកម្មភាពនោះទេ។ ក៏ប៉ុន្តែ ដោយសារបញ្ហាសង្គ្រាម បានធ្វើឲ្យប៉ះពាល់យ៉ាងខ្លាំងដល់តម្លៃប្រេងលើពិភពលោក រួមទាំងកម្ពុជា ហេតុនេះក៏បានធ្វើឲ្យប៉ះពាល់ដល់តម្លៃដឹកជញ្ជូនកម្ពុជាខ្លះដែរ។ បើតាមឧកញ៉ា ស៊ិន ចន្ធី វិបត្តិកូវីដ១៩ និងសង្គ្រាមនៅអ៊ុយក្រែន បានធ្វើឲ្យវិស័យដឹកជញ្ជូន និងឡូជីស្ទីក នៅកម្ពុជា ជួបបញ្ហាប្រឈមមួយចំនួន ដូចជា ការកើនឡើងនៃតម្លៃដឹកជញ្ជូនតាមផ្លូវទឹក,ការខ្វះខាតនូវទូកុងតឺន័រ ពិសេសបញ្ហាប្រេងសាំងឡើងថ្លៃ។ តែទោះជាបែបនេះក្ដី ឧកញ៉ា ស៊ិន ចន្ធី បានសង្កត់ធ្ងន់ថា រហូតមកដល់ពេលនេះ សកម្មភាពនៃការដឹកជញ្ជូនទំនិញ នៅតែដំណើរការជាធម្មតា។
យ៉ាងណាក៏ដោយ ក្រុមអ្នកជំនាញ បានកត់សម្គាល់ឃើញថា នារយៈពេលប៉ុន្មានឆ្នាំចុងក្រោយនេះ វិស័យដឹកជញ្ជូន និងឡូជីស្ទីក នៅកម្ពុជា មានការរីកចម្រើនគួរឲ្យកត់សម្គាល់ ហើយបើទោះបី វិស័យនេះរងគ្រោះដោយសារបញ្ហាកូវីដ១៩ តែសកម្មភាពការដឹកជញ្ជូននៅតែដំណើរការជាធម្មតា។ ក៏ប៉ុន្តែ ដើម្បី ជំរុញឲ្យវិស័យនេះកាន់តែបន្តរីកចម្រើន ក្រុមអ្នកជំនាញបានស្នើឲ្យរាជរដ្ឋាភិបាល បង្កើនការវិនិយោគលើមធ្យោបាយដឹកជញ្ជូនបន្ថែមទៀត ដូចជា ការដឹកជញ្ជូនតាមផ្លូវដែក ដើម្បីជួយសម្រួលដល់តម្លៃនៃការដឹកជញ្ជូនទំនិញ៕
None
