ថ្លែងនៅក្នុងឱកាសចូលរួមជាធិបតីភាពនៃពិធីចុះហត្ថលេខាលើកិច្ចសន្យាកសិកម្ម កាលពីថ្ងៃទី ២៩ ខែកញ្ញា កន្លងទៅនេះ ឯកឧត្តម វេង សាខុន រដ្ឋមន្ត្រីក្រសួងកសិកម្មបានបញ្ជាក់ថា រាជរដ្ឋាភិបាល កំពុងធ្វើពិពិធកម្មផលិតផលកសិកម្ម ហើយក្នុងនោះ សាច់គោ គឺជាផលិតផលម្ហូបអាហារដ៏មានសក្ដានុពលមួយ ដើម្បីនាំចេញទៅកាន់ទីផ្សារប្រទេសចិនបាន។ ស្រពេលដែល កិច្ចព្រមព្រៀងពាណិជ្ជកម្ម រវាងកម្ពុជា និងចិនក៏បានបិទបញ្ចប់ការចរចាជាស្ថាពរ គ្រោងចុះហត្ថលេខានៅក្នុងពេលឆាប់ៗនេះ។
ជាមួយនឹងកិច្ចព្រមព្រៀងពាណិជ្ជកម្មសេរីកម្ពុជា-ចិននេះដែរ ឯកឧត្តម វេង សាខុន បានគូសបញ្ជាក់ពីក្ដីរំពឹងទុកថា ប្រទេសចិននឹងក្លាយជាទីផ្សារដ៏ធំបំផុតសម្រាប់ផលិតផលកសិកម្មរបស់កម្ពុជា។
អត្ថបទទាក់ទង!
រដ្ឋមន្ត្រីក្រសួងកសិកម្ម បានអះអាងទៀតថា កម្ពុជានឹងទទួលបានអត្ថប្រយោជន៍កាន់តែច្រើន ពីសង្គ្រាមពាណិជ្ជកម្មរវាងអាមេរិក និងចិន ក៏ដូចជាភាពតានតឹងផ្នែកពាណិជ្ជកម្មរវាងចិន និងអូស្ត្រាលី ដែលប្រទេសអូស្ត្រាលីនេះ គឺជាអ្នកនាំចេញសាច់គោច្រើនជាងគេបំផុតទៅកាន់ប្រទេសចិន។
នៅក្នុងពេលអនាគតដ៏ខ្លីនេះ ប្រទេសកម្ពុជានឹងពង្រីកទីផ្សារកាន់តែច្រើន ពិសេស គឺសម្រាប់ផលិតផលកសិកម្ម សម្រាប់ការនាំចេញ។
ថ្មីៗនេះកម្ពុជា ក៏មានការនាំចេញគោរស់ទៅកាន់ប្រទេសវៀតណាម និងមានការនាំចូលសត្វគោពីប្រទេសអូស្ត្រាលីសម្រាប់ការចិញ្ចឹមក្នុងស្រុកផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
